Kile à ɲwɔ wuu na maa wuu shwɔ mana
3
Yi jwo dánafeebilʼá ma a pi funŋɔ cwo,
na pi piye tîrige fànhafeebii ná kìni ɲùŋufeebilʼá,
pi i pi ɲwɔmɛɛni cû,
pi i piye pwɔ kacɛnŋkii mpyiŋi na tèrigii puni i.
2 Pi àha jwumpimɛ jwo sùpya na mɛ,
pi àha raa kàshi kwùun mú mɛ,
pi pyi lùtaanfee ná ɲùmpiŋɛfee tèrigii puni i.
3 Tèni lʼe,
wuu mpyi funŋɔ baa shiin,
maa ɲùŋɔ kyán Kile na.
Wuu mpyi numpini i,
marii wuu ɲyii karigii shiŋi puni pyi.
Wuu mpyi shinpii,
maa mpyi ná yiɲcyɛge e.
Wuu kapyiiŋkii mpyi a pɛn sùpyire sanntʼá,
wuu ná wuye shwɔhɔlʼe maa wuye pɛn mú.
4 Ŋka tèni i wuu Shwofooŋi Kile à li cyêe sùpyire na na urʼà ɲwɔ,
ti kyaa mú sʼà táan urʼá ke,
5 u à wuu shwɔ mana.
Wuu kacɛnŋkii kurugo bà u à lire pyi mɛ.
Kile à wuu ɲùɲaara ta maa wuu shwɔ,
maa wuu jyé a fíniŋɛ.
U à lire pyi u Munaani fànhe cye kurugo,
maa wuu pyi sùpyii nivɔnmii bà wuu si mpyi si shìŋi nivɔnŋi ta mɛ.
6 Kile à u Munaani le wuu e ná funvyinge e,
wuu Shwofooŋi Yesu Kirisita cye kurugo.
7 Lire pyiŋkanni na,
u à ɲwɔ wuu na maa wuu tíi u yyahe taan,
shìŋi niŋkwombaaŋi na wuu sɔ̀nŋɔrʼà taha ke,
bà wuu si mpyi si uru ta mɛ.
8 Puru jwumpe na ɲyɛ kaɲyɛɛ.
Mii la ɲyɛ ma a pu jwo a waha dánafeebilʼá bà pi si mpyi sʼa kacɛnŋii pyi tèrigii puni i mɛ.
Lirʼà ɲwɔ,
sùpyire puni tɔ̀ɔn na ɲyɛ lire e.
9 Ma hà raa ma ɲwɔge leni nàkaante ɲùŋɔ baa woore e mɛ.
Pi aha a wuu tulyeyi u tulyeyi mɛyi nàkaante pyi,
ma hà ma ɲwɔge le tʼe mɛ.
Pi aha nàkaana pyi mà yyaha tíi ná Musa Saliyaŋi i marii piye tùnni,
ma hà ɲjwo ná pi e mɛ.
Tire nàkaante punʼà sìi ɲùŋɔ baa.
10 Ŋgemu ká a li caa si dánafeebii kuruŋke jya ke,
urufoo yɛrɛ,
u aha mpyi u ɲyɛ a li ɲwɔ yaha mɛ,
jwo ná u e tozhɔnwogo.
U aha mpyi u ɲyɛ a lógo mɛ,
ma hà núru ŋgwɔ̀ ná u e kyaa na mɛ.
11 Mu à li cè na shin maha shin u ɲyɛ ná kuru funŋke shiŋi i ke,
urufolʼà fworo Kile kuni i,
shinpi u ɲyɛ u wi,
ɲaha na yɛ u kapyiiŋkilʼà li cyêe na u ɲyɛ a tíi mɛ.
Yɛrɛge nizanŋke
12 Mii sí tùnntunŋɔ tun mu á,
shwɔhɔlʼe Aritemasi,
lire ɲyɛ mɛ Tisike.
Pi wà ha nɔ mu na,
ma a maye waha,
ma a mpa na yyére Nikopolisi kànhe e,
ɲaha na yɛ mii la ɲyɛ si sà wyeere tèni pyi wani.
13 Zenasi u maha kìni saliyaŋi cyêre sùpyire na ke,
maye waha ma a u ná Apolosi tɛ̀gɛ pi kùsheeni na,
bà li si mpyi yaaga kà ŋkwɔ̀ pi kùuŋɔ mɛ.
14 Wuu cìnmpyiibii ɲyɛ a yaa pi pyi kaɲwɔɔ baa mɛ.
Màban le pi e bà pi si mpyi sʼa kacɛnŋkii shiŋi puni pyi tèrigii puni i sʼa pìi tɛ̀re tèewaagilʼe mɛ.
15 Cìnmpyiibii pi naha naha ná mii i ke,
pire punʼà mu shɛ́ɛre.
Wuu kyalʼà táan mpiimu á Kile kuni i ke,
wuu à pire puni shɛ́ɛre.
Kile u ɲwɔ yii puni na,
u u jwó le yii á.