Yɛrɛŋkanni na Titi à yaa u a dánafeebii yɛrɛge ke
2
Mu wi ke Titi,
ta kàlaŋi niɲcɛnŋi kaan sùpyirʼá.
2 Yi jwo nàŋkolyeebilʼá na pi i piye pɛ̀rɛgɛ cè,
pi i mpyi sèeshiin,
pi i mpyi yákilifee,
pi i piye waha Kile kuni i ná tàange ná lùtaanni i.
3 Yire ninuyi taha ciɲjyeebilʼá mú,
bà pi ɲaaraŋkanni si mpyi si ntàanna ná Kile kuni i mɛ,
pi àha raa pi shinɲɛɛbii mɛyi kɛ̀ɛge mɛ,
pi àha mpyi sinmbyaa mɛ;
pi a sùpyire sannte leni kurʼe,
4 bà pi si mpyi si li cyêe cipyire na,
pyiŋkanni na pi à yaa pi pi nàmbaabii ná pi pyìibii kyaa táan piyʼá mɛ;
5 pi i mpyi yákilifee,
pi i mpyi fyìnmɛ sùpyii,
pi i piye kan pi pyɛnyi báaraŋʼá,
pi raa kacɛnŋii pyi;
pi i pi nàmbaabii ɲwɔmyahigii cû,
bà sùpyire si mpyi si Kile jwumpe le dá e mɛ.
6 Yire mu à yaa mu u jwo nàɲjiibilʼá mú,
na pi pyi yákilifee karigii puni i.
7 Mu yabiliŋʼà yaa mu u pyi yyecyeenɛ kacɛnmpyiini i.
Fànha le ma a sùpyire taanni ná zòvyinre e.
8 Ta jwuntarampe kanni yu,
bà sùpyire si mpyi pi àha raa cwo cyaga ɲaa mu na mɛ.
Mu aha jà lire na,
wuu zàmpɛɛnbii sí n‑sílege,
pi mú saha sì tajwugo ta wuu na mɛ.
9 Yi jwo bilibilʼá na pi piye tîrige pi ɲùŋufeebilʼá karigii puni i,
pi raa pi ɲyii karigii pyi.
Pi àha raa pi ɲwɔ kwùun mɛ.
10 Pi àha pi yaaga yu mɛ,
pi li cyêe tèrigii puni i na pire na ɲyɛ dánasupyii,
jwumpe wuu ɲyɛ na yu wuu Shwofooŋi Kile kyaa na ke,
bà sùpyire si mpyi si puru le dá e mɛ.
11 Ɲaha kurugo yɛ kacɛnni Kile à pyi ke,
u à lire cyêe sùpyire na.
Lire kacɛnni cye kurugo sùpyire puni sí n‑jà n‑shwɔ.
12 Lire kacɛnni kurugo,
Kile à jwo na wuu cyé kapegigii na,
wuu u kàntugo wà wuu ɲyii karigii nimpegigilʼá.
Lire ká mpyi,
wuu sí n‑pyi ŋge diɲyɛŋi i yákilifee sʼa katiigii pyi,
sʼa fyáge Kile na.
13 Wuu sɔ̀nŋɔrʼà taha canmbwɔhe ŋkemu na,
ná wuu na kuru sigili ke,
kurʼe wuu Shwofooŋi Yesu Kirisita u ɲyɛ wuu Kilebwooŋi ke,
uru sí uye cyêe u sìnampe e.
14 U à uye pyi sáraga wuu kurugo,
maa wuu ɲùŋɔ wwû kapegigii puni i.
U à lire pyi bà wuu si mpyi si mpyi sùpyii fwɔnrɔ baa wuu,
mpiimu Kile à cwɔɔnrʼa yaha uye mɛɛ na ke,
si wuye pwɔ kacɛnŋkii mpyiŋi na.
15 Ɲyɛ tayyérege Kile à kan mu á ke,
mà tàanna ná kurʼe fànha le ma a sùpyire yɛrɛge ná mpe jwumpe e bà pi si mpyi si ŋkwôro Kile kuni i mɛ.
Wà ɲyɛ a yaa u mu wílʼa faha mɛ.