Silegebaare kani lʼà pyi Kɔrɛnti dánafeebii shwɔhɔlʼe ke
5
Mii cìnmpyiibii,
wuu à lógo na silegebaara kani là à pyi yii shwɔhɔlʼe,
ali Kilecembaabii mú bà sì ɲɛɛ ndemu pyi mɛ.
Pi à jwo na yii wà na wá a u tuŋi cwoŋi lèŋɛ.
2 Lire ná li wuuni mú i,
yii à yiye pêe,
mà li ta lire mpyi a yaa li pyi yyetanhara kyaa yii á,
bà yii si mpyi si lire kapiini pyifooŋi yige yiye shwɔhɔlʼe mɛ.
3 Mii laage kɔnʼà tɔɔn yii na,
ŋka mii ɲyɛ yii shwɔhɔlʼe Kile Munaani cye kurugo.
Nde lʼà yaa li pyi ŋge kapimpyiŋi na ke,
wuu Kafooŋi Yesu Kirisita mɛge na,
mii à lire lwɔ́ naye funŋʼi mà kwɔ̀.
4 Lire pyiŋkanni na,
mii ná yii ká bínnʼa tɛ̀ɛn,
Kafooŋi Yesu fànhe cye kurugo,
5 urufolʼà yaa u le Sitaanniŋi cye e,
u u ŋkyaala,
bà li si mpyi kapegigii mpyiŋi lage ká wwû u na,
ka u u cyi ɲwɔ yaha tèni ndemu i ke,
Kile si u shwɔ Kafooŋi Yesu cannuruge mɛ.
6 Yii na yiye pêre tawage e,
yii ɲyɛ a cè a jwo na:
«bwúuruŋi yîrigeyirige yaani nimbileni maha ntɛ̀gʼa farani mbyìmpe niɲcwɔnhɔmpe puni yîrige» mà?
7 Lire kurugo yii kapimpyiŋi yige yiye shwɔhɔlʼe,
bwúuruŋi yîrigeyirige yaani lʼà lyɛ ke,
u na ɲyɛ lire fiige,
bà yii si mpyi si ntɛ̀ɛn fwɔnrɔ baa mbyìvɔnmɔ niɲcwɔnhɔmɔ fiige mɛ.
Yii li cè na yatɔɔge Yahutuubii mpyi maha bò pi bilereŋkwoŋi kataanni i ke,
Yesu à bò kuru yatɔɔge fiige,
maa wuu kapegigii yàfa wuu na.
Lire e wuu ɲyɛ numɛ mu à jwo mbyìvɔnmɔ niɲcwɔnhɔmɔ,
bwúuruŋi yîrigeyirige yaani ɲyɛ a le mpemu i mɛ.
8 Lire kurugo bwúuruŋi u à yaa ná yîrigeyirige yaani niɲjyeeni i ke,
wuu àha kataanni pyi ná urʼe mɛ,
uru u ɲyɛ katupwɔhɔyi ná pege.
Bwúuruŋi u à yaa yîrigeyirige yaani baa ke,
wuu wuu kataanni pyi ná urʼe,
uru u ɲyɛ zòvyinre ná sèejwuuni.
9 Lɛtɛrɛŋi mii à fyânha a kan yii á ke,
urʼe mii mpyi a yi jwo yii á na yii àha jacwoobii pyi yii kapyiɲɛɛ mɛ.
10 Ŋka mii ɲyɛ a jwo yii á na mpii pi ɲyɛ pi ɲyɛ Kile kuni i ná yii e mɛ,
ná pi na jacwɔɔre pyi,
lire ɲyɛ mɛ na nàɲwɔhɔrɔ pyi,
lire ɲyɛ mɛ na nàŋkaage pyi,
lire ɲyɛ mɛ na kacyanhigii sunni ke,
na yii àha pire pyi yii kapyiɲɛɛ mà dɛ!
Lire baare e li sí n‑pyi kee yii sí n‑fworo diɲyɛŋi i dɛ!
11 Pu kajwuuni ɲùŋke ku mpyi ŋke:
shin maha shin u à uye pyi na uru na ɲyɛ Kile kuni i,
maa ŋkwôro na jacwɔɔre pyi,
lire ɲyɛ mɛ na nàɲwɔhɔre pyi,
lire ɲyɛ mɛ na kacyanhigii sunni,
lire ɲyɛ mɛ na jwumpimpe yu,
lire ɲyɛ mɛ mà uye yaha sinmbyaani kanni laage e,
lire ɲyɛ mɛ na nàŋkaage pyi ke,
yii àha cyire karigii pyifeebii pyi yii kapyiɲɛɛ mɛ,
yii bá kà ɲɛɛ pi a lyî ná yii e mɛ.
12-13 Yii li cè,
mpii pi ɲyɛ pi ɲyɛ Kile kuni i mɛ,
mii kuro ɲyɛ pire wogigilʼe mɛ,
Kile u sí pire wogigii cwɔɔnrɔ.
Ŋka yii ná mpii pi ɲyɛ wwoɲɛɛ Kile kuni i ke,
yii pi à yaa yii a pire karigii cwɔɔnre.
Yʼà sémɛ na:
«Yii kapimpyiŋi kɔ̀rʼa yige yiye shwɔhɔlʼea.»