Yesu tùnntunmpii báaraŋi ná pi yyefuge kani
4
Lire kurugo yii li cè na wuu na ɲyɛ Kirisita báarapyii kanna,
maa mpyi kacwɔnrii fiige.
Karigii Kile mpyi a ŋwɔhɔ sùpyire na tèecyiini i ke,
Kile à cyire cyêe wuu na,
bà wuu si mpyi sʼa cyi yyaha yu sùpyirʼá mɛ.
2 Nde sí li ɲyɛ na ɲcaa báarapyiibilʼá ke,
lire li ɲyɛ pi pyi sèeshiin pi raa pi báaraŋi pyi pi a ɲwɔge.
3 Mii wi ke,
lʼà pyi yii jworo yo,
lʼà pyi sùpyire sannte jworo yo,
mii kuro ɲyɛ tire e mɛ.
Mii mú sí ɲyɛ a naye cɛ̂ɛgɛ na báaraŋi nimpyiŋi na mɛ,
4 ɲaha na yɛ mii ɲyɛ a naye pɛn na báaraŋi wà tufiige e mɛ.
Ŋka lire ɲyɛ a li cyêe na mii báaraŋi puni pyiŋkannʼà ɲwɔ mà dɛ!
Kafooŋi kanni u sí n‑jà u ɲwɔ ná u ɲwɔmbaa jwo.
5 Lire kurugo yii àha tànga kan sùpya á,
lire ɲyɛ mɛ si u cɛ̂ɛgɛ mà li tèni ta li sàha nɔ mɛ.
Yii Kafooŋi cannuruge sige.
U aha mpa,
karigii cyi à ŋwɔhɔ numpini i numɛ ke,
u sí n‑pa cyire yige bɛ̀ɛnmpe na,
si sùpyire funzɔnŋɔre yige cyíinŋi na.
Ɲyɛ kuru canŋke,
shin maha shin à yaa ná ŋkèeŋi ŋgemu i mà tàanna ná u báaraŋi nimpyiŋi i ke,
Kile sí uru kan urufolʼá.
6 Mii cìnmpyiibii,
mii à mii ná Apolosi kani lwɔ́ a pyi yyecyeenɛ mà tɛ̀gʼa yii le kurʼe,
si li cyêe yii na,
na yii ɲaaraŋkannʼà yaa li tàanna ná Kile Jwumpe Semɛŋi yi jwuŋkanni i.
Lire e yii wà ɲyɛ a yaa u kàsimɛŋii yogolo na uru na ɲyɛ wà wu,
sʼa u shinɲɛɛŋi fwɔ́hɔre mɛ.
7 Mu u ɲyɛ na sɔ̂nŋi na mu à pwɔ́rɔ pi sanmpii na ke,
di mu ɲyɛ na maye sɔ̂nŋi bɛ?
Ɲaha ku ɲyɛ mu á mà ta Kile bà u à ku kan mu á mà yɛ?
Ɲyɛ ná Kile sí u à yi kan mu á,
mu kàsimɛnŋkii kayogoni li ɲyɛ ndire,
kee mu yabiliŋi u à yi ta mayʼá yɛ?
8 Yii pi ke,
yii na sɔ̂nŋi na yii à yaayi puni ta mà kwɔ̀,
na yii funɲyʼà ɲíŋʼa kwɔ̀,
yii na sɔ̂nŋi na ɲùŋufentʼà le yii cye e mà kwɔ̀,
maa wuu yaha.
Ŋka mii la ɲyɛ yii i mpyi ɲùŋufee sèeŋi na,
bà wuu mú si mpyi si ntɛ̀ɛn ná yii e ɲùŋufente e mɛ.
9 Yii li cè,
wuu pi ɲyɛ Yesu tùnntunmpii ke,
li ɲyɛ mu à jwo Kile à wuu yaha sùpyire puni kàntugo.
Lʼà pyi mu à jwo kwùŋi laage e wuu ɲyɛ.
Wuu à pyi yawiiye diɲyɛ ɲwɔhɔyaayi punʼá,
sùpyire bâra mɛ̀lɛkɛɛbii na.
10 Wuu à pyi sìcyerefee fiige Kirisita mɛge kurugo,
ŋka yii pi ke,
yii na sɔ̂nŋi na yii à Kirisita yákilifente puni ta a kwɔ̀.
Yii à jwo na wuu pi ɲyɛ fànhaɲcyɛrɛrɛ sùpyiibii,
maa yiye sɔ̂nŋi na yii pi ɲyɛ fànhaɲyahaga wuubii.
Sùpyire ɲyɛ a wuu le dá e mɛ,
ŋka yii pi ke,
pi à yii pêe.
11 Ali numɛ,
wuu na ŋkyaali katege ná byage cye e,
maa mpyi vàanŋkuuŋi i.
Sùpyire maha wuu bwùun,
wuu na ɲaare na mâre cyeyi yyaha kurugo.
12 Wuu na báaraŋi niŋgaŋi pyi,
bà wuu si mpyi sʼa wuu ɲùŋɔ karigii yaa mɛ.
Mpii pi maha wuu cyere ke,
wuu maha jwó leni pirʼá.
Pi maha wuu kyérege,
ŋka wuu maha li kwú wuye e.
13 Sùpyire mɛ́ɛ ká a jwumpimpe yu wuu na,
wuu maha jwuɲcɛnmpe tɛ̀gʼa pi ɲùŋɔ bɛ̂.
Ali numɛ wuu na ɲyɛ mu à jwo yakuuyo ná kàkyaya sùpyire ɲyii na.
14 Mii ɲyɛ a mpe jwumpe sémɛ si yii sílege mɛ,
ŋka mii à yii yɛrɛ ná pʼe,
ɲaha na yɛ yii pi ɲyɛ mu à jwo mii pyìibii,
yii kyalʼà táan mii á sèlʼe.
15 Ali li mɛ́ɛ nta cyelentii niɲyahaɲyahamii pi ɲyɛ na Kirisita kyaa yu yii á,
yii li cè na yii tuŋi na ɲyɛ niŋkin.
Mii wi,
ɲaha na yɛ mii u à Jwumpe Nintanmpe jwo yii á,
ka yii i dá Yesu Kirisita na.
16 Mà tàanna ná lire e,
mii na li caa yii á,
yii raa yii karigii pyi mii wogigii fiige.
17 Lire e Timɔti u ɲyɛ mii jyaŋi mà tàanna ná Kafooŋi wwoɲɛɛge e ke,
mii sí uru tun yii á.
U kyalʼà táan mii á,
ɲwɔmɛɛ niŋkinfoo u ɲyɛ u wi Kafooŋi báaraŋi i.
U aha nɔ yii na tèni ndemu i ke,
mii karigii pyiŋkanni li ɲyɛ ndemu Kirisita wwoɲɛɛge e ke,
u sí yii funŋɔ cwo lire na,
bà mii ɲyɛ na li yu na mâre cyeyi puni i dánafeebii kuruɲyʼá mɛ.
18 Pìi na ɲyɛ yii shwɔhɔlʼe,
mpiimu pi na sɔ̂nŋi na mii saha sì n‑shà wani yii yyére mɛ,
maa li ɲwɔ cû na piye yare tabwoyi i.
19 Ŋka Kafooŋi ká ɲɛɛ,
li saha sì mɔ mɛ,
mii sí núru n‑kàre wani yii yyére,
mpii pi ɲyɛ ná tire yàmpeente e ke,
kampyi jwumbwompe kanni pi na yu,
lire ɲyɛ mɛ kampyi Kile sífente ɲyɛ pi á sèeŋi na,
si lire cè.
20 Ɲaha kurugo yɛ Kile Saanre ɲyɛ jwumbwoɲjwuu mɛ,
Kile sífenɛ ti ɲyɛ ti ti.
21 Ɲyɛ di yii ko numɛ bɛ?
Yii la ɲyɛ mii u shà yii yyére ná kasorʼe laa,
ná ntàannamagare ná ɲùmpiŋke e?