Yakuba mbòŋi ná Pyɛri kàsujyiini kani
12
Lire tèni i,
saanŋi Erɔdi mpyi na dánafeebii pìi kyérege.
2 U à Yuhana cìnmpworonaŋi Yakuba bò ná kàshikwɔnŋwɔɔni i.
3 U à lire ɲya lʼà táan Yahutuubilʼe ke,
bwúuruŋi niɲjirigembaaŋi kataanni i,
ka u u pi pyi pi à Pyɛri cû mú.
4 Pi à Pyɛri cû ke,
ka u u pi pyi pi à u le kàsuŋi i,
maa sòrolashii kɛ ná baani pyi pi i u kàanmucaa.
U la mpyi kataanni ká ntòro si nta u yíbe sùpyire ɲyii na.
5 Mà Pyɛri yaha kàsuŋi i,
dánafeebii mpyi a kwôro Kileɲarege na u á.
6 Canmbilini i Erɔdi mpyi na sí Pyɛri yíbe sùpyire ɲyii na ke,
numpilage ku sí n‑tòro lire canmbilini sí n‑ta a nɔ ke,
kuru numpilage e,
mà Pyɛri nimpwɔŋi yaha ná yɔ̀rɔyɔ shuunni i sòrolashiibii pìi shuunni shwɔhɔlʼe,
u mpyi na ŋwúuni.
Sòrolashiibii pìi mpyi a yyére kasubage ɲwɔge na maa ku kàanmucaa.
7 Ka Kafooŋi Kile mɛ̀lɛkɛŋi wà si mpâlʼa jyè kasubage e,
ka ku puni si mpyi bɛ̀ɛnmɛ,
ka mɛ̀lɛkɛŋi si Pyɛri bwɔ̀n bwɔ̀n ŋkere na mà ɲɛ̀,
maa jwo:
«Yîri fwɔfwɔ!»
Ka yɔ̀rɔyi si ntílʼa kwɔ̀n a láha u cyeyi na mà cwo,
ka u u yîri.
8 Ka mɛ̀lɛkɛŋi si jwo:
«Seepwɔge tɛ̀gʼa maye bînni,
ma a ma tanhaɲyi pwɔ.»
Ka u u li pyi amuni.
Ka mɛ̀lɛkɛŋi si núrʼa jwo:
«Ma vàanntinmbwɔhe le,
ma a ma na fye e.»
9 Ka u u fworʼà taha u fye e.
Nde mɛ̀lɛkɛŋʼà pyi ke,
u ɲyɛ a mpyi a cè na lire na ɲyɛ sèe mɛ.
U mpyi na sɔ̂nŋi na ŋɔɔgɔ uru ɲyɛ na ŋwúuni.
10 Sòrolashiibii pi ɲyɛ na kasubage kàanmucaa ke,
ka Pyɛri ná mɛ̀lɛkɛŋi si ŋkàrʼa sà ntòro pire sòrolashikuruŋke niɲcyiige taan,
maa ŋkàrʼa sà ntòro kuruŋke shɔnwoge taan,
tɔɔnnte bàrage ku mpyi a tɛ̀gʼa tajyiɲwɔge tò,
ná ku ɲwɔge mpyi a kan kànhe funŋke yyére ke,
mà jwo pi nɔ kuru na ke,
ka ku u múgo kuyʼá,
ka mɛ̀lɛkɛŋi ná Pyɛri si fworo na ŋkɛ̀ɛge.
Mà pi niŋkaribii yaha,
ka mɛ̀lɛkɛŋi si mpâlʼa pînni u na.
11 Lirʼà pyi ke,
ka Pyɛri yákiliŋi si nta a múgo,
ka u u jwo:
«Numɛ sèeŋi na,
mii à dá li na na Kafooŋi u à u mɛ̀lɛkɛŋi wà tun u à pa mii shwɔ Erɔdi na,
Yahutuubii la mpyi si kapegigii ɲcyiimu pyi mii na ke,
si mii shwɔ cyire puni na mú.»
12 Pyɛri yákiliŋʼà pa ntɛ̀ɛn ke,
Yuhana pi maha mpyi Marika ná u nuŋi mɛge ɲyɛ Mariyama ke,
ka u u ŋkàre uru Mariyamaŋi pyɛnge e.
Dánafee niɲyahamii mpyi a bínni wani,
maa Kile ɲáare.
13 U à nɔ maa bage ɲwɔge kúu ke,
báarapyicwoŋi wà na mpyi wani na Ɔrɔda,
ka uru si yîrʼa pa si mpa ku múgo.
14 U à Pyɛri mɛjwuuni lógʼa cè ke,
funntange kurugo,
mà jwo u pyɛnge ɲwɔge múgo ke,
ka u u fê a kàrʼa sà yi jwo pi sanmpilʼá,
na Pyɛri niɲjyereŋi na wá pyɛnge ɲwɔge na.
15 Ka pi i jwo:
«Taha mu ɲùmbwuuni bà ɲyɛ a ɲwɔ mɛ?»
Ka Ɔrɔda si núrʼa jwo:
«Sèe,
uru u wá sìi u wi!»
Ka pi i núrʼa jwo:
«Mɛ̀lɛkɛŋi u maha u kàanmucaa ke,
uru u sí n‑ta u à uye pyi u fiige mà pa.»
16 Mà pi yaha puru na,
ka Pyɛri si ŋkwôro na pyɛnge ɲwɔge kúuli.
Pi à pa ɲwɔge múgo mà u ɲya ke,
ka li i pi bilibili.
17 Ka u u cyɛge yîrige pi á,
maa pi pyi pi à fyâha.
Pyiŋkanni na Kafooŋi à u yige kàsuŋi i ke,
ka u u yire puni yyaha jwo pi á.
Maa yi jwo pi á na pi sà yi yyaha jwo Yakubaa ná cìnmpyiibii sanmpilʼá,
maa yîri wani mà kàre cyage kabɛrʼe.
18 Ɲyɛ̀gʼà pa múgo ke,
ka sòrolashiibii si wá na ɲyàha na wùruge piye e,
maa piye yíbili:
«Di Pyɛri à pyi a jwo yɛ?»
19 Ka Erɔdi si pi pyi pi à sà a u caa,
ŋka pi ɲyɛ a u ɲya mɛ.
Ka Erɔdi si sòrolashiibii yyerʼa yíbe,
maa pi pyi pi à pi bòb.
Lire kàntugo maa yîri Zhude kùluni i,
mà kàre Sezare kànhe e mà sà tère pyi wani.
Erɔdi kwùŋkanni
20 Lire mpyi a saanŋi Erɔdi lùuni ta lʼà yîri Tiri ná Sidɔn kànyi shiinbii taan sèe sèlʼe.
Ka pire si bɛ̂ niŋkin na,
maa sà jwo a ɲwɔ ná saanŋi bage ɲùŋufooŋi i,
uru mɛge na mpyi Bilasitusi.
Lire kàntugo maa ŋkàrʼa sà saanŋi ɲáare na u uye sanŋi yaha u u yoge kwɔ̀,
ɲaha na yɛ Erɔdi kìni i pire mpyi na pi ɲjyìŋi taa.
21 Canmbilini na pi mpyi a bɛ̂ si cyire karigii yyaha cwɔɔnrɔ ke,
lirʼà pa nɔ ke,
ka Erɔdi si u fànhe vàanntinŋke le,
maa mpa ntɛ̀ɛn saanre yatɛɛnŋke e,
jwumpe pu ɲyɛ u á ke,
maa puru jwo sùpyirʼá.
22 U à kwɔ̀ u jwumpe na ke,
ka sùpyire si jwo fànha na:
«Kile u à mpe jwo lire baare e,
sùpya bà mɛ!»
23 Lire tèenuuni i,
ka Kafooŋi Kile mɛ̀lɛkɛŋi wà si ntílʼa fyɛɛnre cyán Erɔdi i mà bò,
ɲaha na yɛ pèente tʼà yaa ti taha Kile na ke,
u ɲyɛ a tire taha u na mɛ.