Nɔ̀ŋi ɲyɛ à yaa u u cwoŋi nàmbage kwɔ̀ mɛ
19
Ɲyɛ Yesu à kwɔ̀ puru jwumpe na ke,
maa yîri Galile kùluni i,
mà kàre Zhude kùluni i,
Zhurudɛn baŋi kàntugo.
2 Shinɲyahara mpyi a taha u fye e,
mpii pi mpyi na yà ke,
ka u u pire cùuŋɔ wani.
3 Ka Farizhɛɛnbii pìi si file si u pɛrɛ ɲcû ná jwumpe e,
maa u yíbe:
«Mà tàanna ná wuu Saliyaŋi i,
tá nɔ̀ŋʼà yaa u jà a u cwoŋi nàmbage kwɔ̀ ɲùɲyi puni na bɛ?»
4 Ka Yesu si pi pyi:
«Ɲje yʼà sémɛ Kile Jwumpe Semɛŋi i ke,
yii ɲyɛ a yire kâla mà?
Diɲyɛŋi tasiige e,
diɲyɛŋi Davooŋi à “sùpyaŋi yaa nɔ̀ ná ceewea.”
5 “Lire kurugo nɔ̀ŋi sí u tuŋi ná u nuŋi yaha si mpwɔ u cwoŋi na,
pi mú shuunni si mpyi shin niŋkinb.”
6 Lire e pi saha sì n‑pyi shiin shuunni mɛ,
ŋka pi sí n‑pyi shin niŋkin.
Lire kurugo Kile à mpiimu pyi niŋkin ke,
sùpya ɲyɛ a yaa u pire láha piye na mɛ.»
7 Ɲyɛ ka Farizhɛɛnbii si núrʼa jwo:
«Lire sanni i ke,
ɲaha na Kile tùnntunŋi Musa sʼà jwo na nɔ̀ ká a ŋko raa u cwoŋi nàmbage kwùu,
u nàmbage kwɔ̀kwɔ sémɛŋi kan ceeŋʼá,
u u nta a ku kwɔ̀ yɛ?»
8 Ka Yesu si pi pyi:
«Yii ɲjíŋgage kurugo,
Musa à cyeebii nàmbakwooni kuni kan yii á.
Lire baare e diɲyɛŋi tèesiini i,
amuni bà li mpyi mɛ.
9 Ŋka mii sí yi jwo yii á,
shin maha shin u à u cwoŋi nàmbage kwɔ̀ ɲùŋke kabɛrɛ na,
mà ta jacwɔrɔ bà mɛ,
maa ceeŋi wabɛrɛ lèŋɛ ke,
urufolʼà jacwɔrɔ pyi.»
10 Ɲyɛ ka cyelempyiibii si jwumpe lwɔ́ maa jwo:
«Kampyi nɔ̀ŋi tayyérege ku ɲyɛ kure mà yyaha tíi ná u cwoŋi i,
ɲùŋɔ mú bá naha cileŋɛni na mɛ.»
11 Ka Yesu si pi pyi:
«Sùpyire puni sì n‑jà cileŋɛmbaani na mɛ,
fo Kile ká li pyimɛ táan mpiimu á ke.
12 Karii niɲyahagii na ɲyɛ wani ɲcyiimu cyi maha jà a nɔ̀ŋi sige cileŋɛni na ke.
Pìi na ɲyɛ wani,
pi sì n‑jà ceewe lèŋɛ mɛ,
ɲaha na yɛ pi à si amuni.
Pìi u cileŋɛmbaani ɲùŋkʼà fworo sùpyire e,
ɲaha na yɛ pi à pi nànte kɛ̀ɛge.
Pìi mú maha ɲcyé cileŋɛni na Kile Saanre kurugo.
Ŋgemu u sí n‑jà ɲɛɛ puru jwumpe na ke,
urufoo u ɲɛɛ pu na.»
Yesu à jwó le nàŋkopyire tà á
13 Ɲyɛ lire kàntugo,
sùpyiibii pìlʼà pa ná nàŋkopyire tʼe Yesu yyére,
bà u si mpyi si u cyeyi taha ti na,
si Kile ɲáare tʼá mɛ.
Ka cyelempyiibii si pi faha.
14 Ka Yesu si jwo:
«Yii nàŋkopyire yaha tʼa ma mii yyére,
yii àha ti sige na na mɛ.
Ɲaha kurugo yɛ sùpyire tʼà tiye pyi nte nàŋkopyire fiige ke,
Kile Saanre ɲyɛ pire woro.»
15 Ɲyɛ u à puru jwo ke,
maa u cyeyi taha ti ɲùɲyi na maa jwó le tʼá,
maa nta a yîri kuru cyage e mà kàre.
Nàfuufooŋi kani
16 Ɲyɛ mà Yesu niŋkareŋi yaha,
nàŋi wà à file u na maa jwo:
«Cyelentuŋi!
Kacɛnni ndire mii à yaa mii u pyi si shìŋi niŋkwombaaŋi ta yɛ?»
17 Ka Yesu si u pyi:
«Ɲaha na mu ɲyɛ na mii yíbili kacɛnni kyaa na yɛ?
Shin niŋkin kanna u à ɲwɔ.
Mu la ká mpyi si shìŋi sèe wuŋi ta,
ta Kile toŋi kurigii ɲaare.»
18 Ka nàŋi si Yesu yíbe:
«Kurigii ɲcyire yɛ?»
Ka Yesu si jwo:
«“Ma hà sùpya bò mɛ,
ma hà zínni ná wabɛrɛ cwo e mɛ,
ma hà nàŋkaaga pyi mɛ,
ma hà vini ntaha wà na mɛ,
19 ma tuŋi ná ma nuŋi pêec.”
“Ma supyiɲɛɛŋi kyaa táan mayʼá bà mu kyalʼà táan mayʼá mɛd.”»
20 Ka nàɲjiiŋi si Yesu pyi:
«Mii na cyire karigii puni pyi.
Ɲaha shi saha kʼà mii fô yɛ?»
21 Ka Yesu si u pyi:
«Kampyi mu la ɲyɛ si mpyi tìgirecyaga baa,
ta sì maa sà ma cyeyaayi puni pɛ́rɛ,
maa uru wyɛ́rɛŋi kan fòŋɔfeebilʼá.
Lire ká mpyi,
mu sí nàfuu ta Kile yyére.
Maa nta a pa ntaha na fye e.»
22 Ɲyɛ uru nàɲjiiŋʼà puru lógo ke,
ka u yyetanha wuŋi si ŋkàre,
ɲaha na yɛ nàfuubwɔhɔ foo u mpyi u wi.
23 Ɲyɛ ka Yesu si yi jwo u cyelempyiibilʼá:
«Sèeŋi na mii sí yi jwo yii á,
nàfuufooŋi jyìmʼà pɛn Kile Saanre e.
24 Mii sí yi jwo yii á sahaŋki,
ɲwɔhɔŋi jyìmʼà táan músennɛŋi wyiini i,
mà tòro nàfuufooŋi u jyè Kile Saanre e.»
25 Ka puru si u cyelempyiibii kàkyanhala fo mà tòro,
ka pi i jwo:
«Lire sanni i ke,
jofoo u sí n‑jà nùmpanŋa ta bɛ?»
26 Ka Yesu si pi wíi wíi maa jwo:
«Lirʼà sùpyire jà,
ŋka kyaa ɲyɛ na Kile jìni mɛ.»
27 Ka Pyɛri si jwumpe lwɔ́ maa Yesu pyi:
«Wuu de?
Wuu à kàntugo wà wuu karigii puni na,
maa ntaha mu fye e!
Wuu nàzhanŋi u ɲyɛ ŋgire yɛ?»
28 Ka Yesu si pi pyi:
«Sèeŋi na mii sí yi jwo yii á,
yaayi puni ká mpa mpyi nivɔnyɔ tèni ndemu i ke,
Supyaŋi Jyaŋi ká mpa ntɛ̀ɛn u fànhe tatɛɛnge nisinaŋke e tèni ndemu i ke,
yii pi ɲyɛ mii fyèɲwɔhɔshiinbii ke,
yii sí n‑pa n‑tɛ̀ɛn fànhe tatɛɛnyɛ kɛ ná shuunni i,
sʼa Izirayɛli tùluyi kɛ ná shuunniŋi shiinbii kɛ̂ɛnŋi.
29 Ɲyɛ shin maha shin ká ɲɛnʼà kàntugo wà u bayi,
lire ɲyɛ mɛ u sìɲɛɛbii,
lire ɲyɛ mɛ u sifeebii,
lire ɲyɛ mɛ u pyìibii,
lire ɲyɛ mɛ u kɛrɛyi na mii mɛge kurugo ke,
urufoo sí yire fiigii ŋkuu (100) ta,
si shìŋi niŋkwombaaŋi ta.
30 Ŋka yyahe yyére shiin niɲyahamii sí n‑pyi kàntugo yyére shiin,
kàntugo yyére wuu niɲyahamii mú sí n‑pyi yyahe yyére wuu.»