Macwo 2

Ɲcèfeebii pìlʼà sà fworo Yesu na, maa u pêe

Ɲyɛ Yesu à si Zhude kùluni i, Bɛtilɛhɛmu kànhe e. Lʼà pyi Saanŋi tèni i. Ka ɲcèfeebii pìi si yîri canŋafyinmpe e mà pa Zheruzalɛmu kànhe e, 2 maa yíbe: «Yahutuubii saanŋi u à si numɛ ke, taa u ɲyɛ ke? Wuu à u woni ɲya mà wuu yaha canŋafyinmpe e. Lire e wuu à pa mpa u pêe.» 3 Saanŋi Erɔdi à puru jwumpe lógo ke, ka lire kani si u ná Zheruzalɛmu shiinbii puni funŋɔ wwòoŋɔ sèlʼe. 4 Ka u u Kile sáragawwuubii ɲùŋufeebii ná puni bínni maa pi yíbe na kyaa lʼà jwo ke, taa urʼà yaa u si ke? 5 Ka pire si u pyi: «U à yaa u si Bɛtilɛhɛmu kànhe e, Zhude kùluni i. Yire Kile tùnntunŋʼà sémɛ na

6 “Bɛtilɛhɛmu u ɲyɛ Zhude kùluni kànhe kà ke,

kuru bà ku ɲyɛ Zhude kùluni kànyi puni nimbileni mà dɛ!

Ɲaha kurugo yɛ ɲùŋufooŋi wà sí n‑pa fworo kʼe,

ŋgemu u sí n‑pyi mii sùpyire, shiinbii ɲùŋɔ na ke.”»

7 Ɲyɛ ka Erɔdi si ɲcèfeebii ŋwɔhʼa yyere, maa pi yíbe na tèni ndire e wonʼà fworo yɛ. 8 Ɲyɛ lire kàntugo ka u u pi yaha a kàre Bɛtilɛhɛmu kànhe e, pi sà yíbe pyàŋi kyaa na sèlʼe, pi aha u ɲya, pi i mpa yi jwo urʼá, uru sí n‑sà u pêe mú. 9 U à puru jwo ke, ka ɲcèfeebii si ŋkàre. Pi mpyi a fyânha a woni ndemu ɲya canŋafyinmpe e ke, lire ninuunʼà fworo pi yyaha na, maa pi yyaha cû. Cyage e pyàŋi mpyi ke, lʼà nɔ wani ke, maa yyére kuru cyage nìɲyi na. 10 Ɲcèfeebilʼà li ɲya lʼà yyére ke, ka pi funɲyi si sàa táan. 11 Ka pi i jyè bage e, mà pyàŋi ná u nuŋi Mariyama ɲya, maa niŋkure sín maa pyàŋi pêe. Lire kàntugo maa pi yaayi ɲwɔ múgo, maa sɛɛn ná wusuna ná kan pyàŋʼá. 12 Lire kàntugo ka Kile si yi jwo pi á ŋɔɔge kʼe, na pi àha núru ŋkàre Erɔdi yyére mɛ. Ɲyɛ ka pi i kuni labɛrɛ lwɔ́ a kàre pi kìni i.

Yesu sifeebilʼà fê a kàre ná u e Misira kìni i

13 Ɲyɛ ɲcèfeebii kareŋkwooni kàntugo, Kafooŋi Kile mɛ̀lɛkɛŋi wà à uye cyêe Yusufu na ŋɔɔge kʼe, maa u pyi: «Yîri, maa pyàŋi ná u nuŋi lwɔ́, maa fî maa sì kìni i, maa ntɛ̀ɛn wani fo mii aha mu pyi ma núru ma a ma tèni ndemu i ke, ɲaha na yɛ na pyàŋi caa raa bùu.» 14 Ɲyɛ ka Yusufu si yîri numpilage e, maa pyàŋi ná u nuŋi lwɔ́ mà kàre Misira kìni i. 15 U à kwôro wani fo saanŋi Erɔdi à pa ŋkwû. Lire pyiŋkanni na, nde Kafooŋi Kile mpyi a jwo u tùnntunŋi cye kurugo ke, lirʼà fûnŋɔ. U mpyi a jwo: «Mii à na Jyaŋi yyerʼa yige Misira kìni i.»

16 Ɲyɛ saanŋi Erɔdi à pa li kàanmucya mà li ɲya na ɲcèfeebilʼà uru ɲwɔhɔ yaha ke, ka u lùuni si yîri sèe sèlʼe. Maa jwo na pùnampyire ti ɲyɛ Bɛtilɛhɛmu kànhe ná ku kwùumpe kànyi na, ná pi sàha ntòro yyee shuunni na mɛ, na pi pire puni bò, ɲaha na yɛ mà tàanna ná ɲcèfeebii jwumpe e, uru pyàŋi mpyi a yaa u ta cyire yyeegii shuunniŋi ɲwɔhɔntaan pùnampyire e. 17 Nde Kile tùnntunŋi Zheremi mpyi a jwo ke, lirʼà fûnŋɔ, u mpyi a jwo:

18 «Mɛjwulʼà fworo Arama kànhe e,

myahigilʼà sú maa yamɛɛni sú sèlʼe.

Arasɛli u ɲyɛ na u pyìibii yamɛɛni súu,

u la ɲyɛ wà sì uru fɔ̀ɔnŋɔ mɛ,

ɲaha na yɛ u pyìibilʼà wílʼa fô.»

19 Ɲyɛ saanŋi Erɔdi à pa ŋkwû ke, ka Kafooŋi Kile mɛ̀lɛkɛŋi wà si uye cyêe Yusufu na ŋɔɔge kʼe, mà u yaha Misira kìni i. 20 U à jwo Yusufu á: «Yîri ma a pyàŋi ná u nuŋi lwɔ́ ma a núru ma a sì kìni i, ɲaha na yɛ mpii pi mpyi na pyàŋi caa raa bùu ke, pire saha ɲyɛ mɛ.» 21 Ɲyɛ ka Yusufu si yîri maa pyàŋi ná u nuŋi lwɔ́ a núrʼa kàre Izirayɛli kìni i.

22 Ŋka Yusufu à pa lógo na Arikilasi à tɛ̀ɛn ɲùŋufente na Zhude kùluni i u tuŋi Erɔdi kwùŋkwooni kàntugo ke, ka lire si u pyi u u fyáge takarege e wani. Ɲyɛ ka Kile si núrʼa jwo ná u e ŋɔɔge kʼe. Ka u u yîri wani mà kàre Galile kùluni i, 23 maa sà ntɛ̀ɛn kànhe kà na, kuru mɛge ɲyɛ Nazarɛti. Lire pyiŋkanni na, jwumpʼà fûnŋɔ. Pi mpyi a jwo: «U sí raa yiri Nazarɛti shinŋi.»