Kile à Yakuba pyi u sà ntɛ̀ɛn Betɛli i
35
Ɲyɛ canŋka Kile à jwo *Yakuba á: «Yîri, mà sà ntɛ̀ɛn Bɛtɛli i. Mu aha nɔ wani, maa *sárayi tawwûgo faanra, mii, Kile á. Mii u à naye cyêe mu na, mu nivêŋi ma yyahawuŋi Ezawu yyaha na ke.» 2 Ka Yakuba si yi jwo u pyɛngɛ shiinbii ná u fyèɲwɔhɔshiinbii punʼá: «Yii kacyanhigii puni yige yii shwɔhɔlʼe. Mɛsopotami kìni yii à cyi ta. Yii yiye jyè a fíniŋɛ, yii vàanɲyi yabɛrɛ le bà yii kyaa si mpyi si ntáan Kile á mɛ. 3 Ɲaha na yɛ wuu sí n-kàre Bɛtɛli i, mii sí sárayi tawwûgo yaa Kile á wani, uru ŋgemu u à mii ɲaariyi lógo maa mii tɛ̀gɛ na kanhare tèrigilʼe, maa ŋkwôro ná mii i na ɲaani i ke.»4 Ɲyɛ ka Yakuba shiinbii si pi kacyanhigii puni kan u á, ná pi sáraga fègempii. Ka Yakuba si wyige tùgo cibwɔhe kà ɲwɔhʼi Sikɛmu taan maa yi le wani. 5 Lire kàntugo, ka pi i ŋkàre. Ka Kile si kuru cyage kànyi shiinbii fùguro sèlʼe. Pi sùpya ɲyɛ a ɲɛnʼa taha Yakuba shiinbii fye e, si kàshi *kwɔ̀n pi na mɛ.
6 Ɲyɛ Yakuba ná u fyèɲwɔhɔshiinbilʼà kàre, mà sà nɔ Luzi i, kuru kànhe mɛge mú na ɲyɛ Bɛtɛli, ku na ɲyɛ *Kana kìni i. 7 Ka Yakuba si sárayi tawwûgo yaa wani, maa ku mɛge le *Eli Bɛtɛli, ɲaha na yɛ Kile à uye cyêe uru na kuru cyage e tèni i uru mpyi na fî u yyahafooŋi yyaha na kea.
8 Ɲyɛ lire tèni i, ceeŋi u mpyi a Erebeka byé ke, urʼà kwû. Ka pi i u tò Bɛtɛli taan, cige kà ɲwɔhʼi, kuru cige mɛge kʼà pa le: «Mɛɛsuuni Cige».
9 Ɲyɛ ka Kile si núrʼa uye cyêe Yakuba na, maa jwó le u á, lirʼà u ta u à yîri Mɛsopotami kìni i. 10 Maa jwo u á: «Mu mɛge ɲyɛ Yakuba, ŋka mu mɛge saha sì n-pyi Yakuba mɛ, ku sí n-pyi *Izirayɛli.» Lire pyiŋkanni na, Kile à Yakuba mɛge le Izirayɛli. 11 Maa núrʼa jwo u á:
«Mii u ɲyɛ Kile Siŋi Punifoo.
Mii sí pyìi niɲyahamii kan mu á,
si mu pyi sùpyishiŋi wà tulyaga,
sùpyishi niɲyahawa ná saanlii sí n-fworo mu tùluge e.
12 Kìni mii à kan Ibirayima ná Ishaka á ke,
mii sí lire kìni kan mu ná ma tùlugʼá.»
13 Ɲyɛ Kile à yîri cyage e u à jwo ná Yakuba e ke. 14 Ka Yakuba si kafaabwɔhɔ yyéeŋɛ kuru cyage e mà pyi funɲcwogoyaaga, maa *ɛrɛzɛn sinmpe pà pyi sáraga mà wu ku na, lire kàntugo maa sìnmpe pà wu ku na, maa ku pyi Kile wogo. 15 Ɲyɛ cyage Kile à jwo ná Yakuba e ke, ka u u kuru mɛge le Bɛtɛli.
Bɛnzhama ziŋi ná Arasɛli kwùŋi kani
16 Ɲyɛ ka Yakuba ná u shiinbii si mpa yîri Bɛtɛli i na ŋkɛ̀ɛge Efirata kànhe kànmpanŋke na. Mà pi laage sanŋke yaha ku ɲyɛ a tɔɔn Efirata na mɛ, ka Arasɛli laani si yîri, ka u ziŋi si waha sèlʼe. 17 Mà u yaha u u laani yà, tèni i pyàŋʼà pa li ɲwɔ cû na fwore ke, ka lashwoŋi si jwo u á: «Ma hà vyá mɛ, mu à pùnambilini labɛrɛ ta.»
18 Ɲyɛ Arasɛli mpyi na kuro caa. Tèni i u múnaani mpyi na ŋko si fworo u e ke, ka u u pyàŋi mɛge le Bɛni Onib Ŋka kàntugo, tufooŋʼà pa pyàŋi mɛge le Bɛnzhamac.
19 Ɲyɛ kuru cyage e Arasɛli à kwû. Ka pi i u tò Efirata kànhe kuni na. Kuru kànhe mɛge kʼà pa le Bɛtilehemu. 20 Ka Yakuba si kafaabwɔhɔ yyéeŋɛ Arasɛli kwùunni ɲuŋʼi. Ali niɲjaa kuru kafaage na ɲyɛ wani na Arasɛli kwùunni cyêre.
Urubɛn à wwɔ̀ ná u nubileni lʼe
21 Ka *Yakuba si yîri wani mà kàre Migidali Edɛri wòrokulo kànmpanŋke na, maa u vàanŋke bayi kwòro wani, 22 Mà Yakuba yaha kuru cyage e, Urubɛn à wwɔ̀ ná u nubileni Bila e. Yakuba à pa yire cè ke, ka li i waha u na sèlʼe.
Yakuba jyaabii mɛyi yi ɲyɛ ɲje
*Yakuba pùnampyire na mpyi kɛ ná shuunni. 23 Mpii u cwoŋi Leya à si ke, pire pi ɲyɛ Urubɛn, jyafooŋi niɲcyiiŋi, ná Simiyɔn, ná Levi, ná *Zhuda, ná Isakari, ná Zabulɔn. 24 U cwoŋi Arasɛli wuubii pi mpyi Yusufu ná Bɛnzhama 25 U cwoŋi Arasɛli u báarapyicwoŋi Bila wuubii pi mpyi Dan ná Nɛfitali. 26 U cwoŋi Leya u báarapyicwoŋi Zilipa wuubii pi mpyi Gadi ná Ashɛri. Pire pi ɲyɛ Yakuba jyaabii. Mɛsopotami kìni i pi à si.
Ishaka kwùŋi kani
27 Ɲyɛ *Yakuba à kàrʼa sà nɔ Mamire cyage e, Kiriyati Ariba kànhe taan, cyage e u tulyage Ibirayima mpyi ke, ná u tuŋi Ishaka mú sí ɲyɛ ke. Kuru kànhe ku ɲyɛ Eburɔn mú.
28-29 Ɲyɛ Ishaka à pa ŋkwû mà u shìŋi yaha yyee ŋkuu ná beecyɛɛre, ka u jyaabii Ezawu ná Yakuba si u tò. Ka u u sà bâra u tulyeyi na. U mpyi a lyɛ fo mà lyɛge la kwɔ̀.