Yakuba ná u yyahafooŋi Ezawu à piye ɲùŋɔ bɛ̂
33
Ɲyɛ tèni i *Yakuba à pa ɲùŋke yîrigʼa wíi mà Ezawu ɲya u u u bêni ná nàmbaa ŋkwuu sicyɛɛre ke, ka u u u pyìibii táa Leya ná Arasɛli, ná báarapyicyeebii shuunniŋi shwɔhɔlʼe. 2 Maa báarapyicyeebii yaha yyaha yyére ná pi pyìibilʼe, maa Leya ná u pyìibii taha pire na. Maa nta a Arasɛli ná Yusufu yaha pi puni kàntugo. 3 Ka u yabiliŋi si ntòro pi yyaha na, maa niŋkure sín sín fo tooyi baashuunni, mà jwo u ɲaarʼa nɔ u yyahafooŋi Ezawu na ke. 4 Ka Ezawu si fê a u ɲùŋɔ bɛ̂, maa u purʼa cû, maa u shɛ́ɛre. Ka pi mú shuunni si wá na myahii súu funntange na.5 Tèni i Ezawu à ɲùŋke yîrigʼa cyeebii ná pyìibii ɲya ke, ka u u jwo: «Nte sùpyire ti nte mu fye e ke, mpirefee pi yɛ?» Ka Yakuba si jwo: «Mii, u ɲyɛ mu bilinaŋi ke, Kile à ɲwɔ mii na, maa pyìibii mpiimu kan mii á ke, pire pi.» 6 Ka báarapyicyeebii ná pi pyìibii si file maa niŋkure sín. 7 Ka Leya ná u pyìibii mú si file, maa niŋkure sín. Kàntugo, ka Yusufu ná u nuŋi Arasɛli si file maa niŋkure sín.
8 Pi à kwɔ̀ ke, ka Ezawu si Yakuba yíbe: «Ná yatokuruŋke e mu à pa ke, ɲaha wogo ki yɛ?» Ka Yakuba si u ɲwɔ shwɔ: «Mii la ɲyɛ si ti kan na ɲùŋufooŋʼá bà mii kyaa si mpyi si ntáan u á mɛ.» 9 Ka Ezawu si jwo: «Mii cɔɔnŋi, yatɔɔrɔ niɲyahara na ɲyɛ mii á mà kwɔ̀, tɛ̀ɛn ná ma woore e.» 10 Ka Yakuba si jwo: «Mii na mu ɲáare, kampyi yogʼà kwɔ̀ mii ná mu shwɔhɔlʼe, maa ŋge bùɲyɛŋi shwɔ. Mu mii bɛŋkannʼà ɲwɔ mu à jwo Kile u à mii ɲùŋɔ bɛ̂. 11 Mii na mu ɲáare maa ŋge bùɲyɛŋi shwɔ, ɲaha na yɛ Kile à jwó le mii á sèlʼe, yaaga kuu ɲyɛ mii na mɛ.» Yakuba á pu jwo a waha amuni ke, ka Ezawu si nta a ɲɛɛ uru bùɲyɛŋi na.
12 Puru ɲwɔhɔ na, ka Ezawu si jwo: «Ɲyɛ wuu kuni lwɔ́, wuu a sì siɲcyan.» 13 Ka Yakuba si jwo: «Mii ɲùŋufooŋi, nàŋkopyire karigilʼà waha, mpàpyire mú na ɲyɛ mii á, nùnaare tà na ŋwɔre. Wuu aha ɲani pêe yi fànhe na, canŋa niŋkin kanna, yatɔɔre sí n-kwû. 14 Lire e, mii ɲùŋufooŋi, yaha ma bilinaŋi yyaha na. Mii sí raa ŋkɛ̀ɛge lùtaan na, yatɔɔre kàntugo ná nàŋkopyire e, fo zà nɔ na ɲùŋufooŋi yyére Seyiri kùluni i.» 15 Ka Ezawu si jwo: «Lire tèni i, mii sí na sùpyire tà le ná mu i kuni i.» Ka Yakuba si jwo: «Mii ɲùŋufooŋi, ɲùŋɔ ɲyɛ lire na mɛ, mii kyaa ká jà a táan mu á mà kwɔ̀, lire kanni sí mii tìn.»
16 Ɲyɛ kuru canŋke yabiliŋi, Ezawu à núrʼa kàre Seyiri kùluni i. 17 Ŋka Yakuba ɲyɛ a ɲɛnʼa kàre Ezawu fye e mɛ, maa ŋkàre cyage kabɛrʼe, maa baga faanra wani, maa kàcwɔgɔ yaa u yatɔɔrʼá. Lire kurugo, pi à kuru cyage mɛge le Kacwɔgɔ.
18 Yakuba à fworo Mɛsopotami kìni i, ka u niɲcɛnŋɛ wuu si nɔ fo Sikɛmu kànhe e *Kana kìni i. Ka u u u vàanŋke bayi kwòro kànhe yyaha yyére. 19 Cyage e u mpyi a u vàanŋke bayi kwòro ke, u à pa kuru cyage shwɔ Kyamɔri shiinbilʼá ná wyɛ́rɛfyinŋi tɔɔnɲwɔ darashii ŋkulʼe. Kyamɔri u mpyi Sikɛmu tuŋi. 20 Ka Yakuba si sáraga tawwûgo faanra wani, maa ku mɛge le Eli Ɛlohe *Izirayɛlia.