Yakuba à Leya ná Arasɛli lèŋɛ mà pyi u cyee
29
Lire kàntugo, ka *Yakuba si kuni lwɔ́ a kàre canŋafyinmpe kìrigii kànmpanŋke na. 2 Mà u niŋkàriŋi yaha, u à sà nɔ bɛ̀ɛnŋke kà na sige funŋke e. Mpàkuruyo taanre ná sikyaa mpyi a sínni sínni ku ɲwɔge na. Yatɔɔre tabyage ku mpyi ku ki, kuru bɛ̀ɛnŋke ɲwɔge mpyi maha ntùni ná kafaabwɔhʼe. 3 Yatɔɔre puni nʼa mpyi a pa bínni, pi mpyi maha kuru kafaage kùuŋkulʼa láha bɛ̀ɛnŋke ɲwɔge na maa ti kan tʼa bya, maa ŋkwɔ̀ maa kuru fáage tɛ̀gʼa ku ɲwɔ tò. 4 Ka Yakuba si pire yatonahabii yíbe: «Mii cìnmpyiibii, taa yii à yîri ke?» Ka pi i u pyi: «Wuu à yîri Kyaran kànhe e.» 5 Ka u u jwo: «Ta yii à Nakwɔri ɲambilini, Laban cè bɛ?» ka pi i jwo: «Ɔɔn.» 6 Ka u u jwo: «U à cùuŋɔ la?» Ka pi i jwo: «Ɔɔn, u à cùuŋɔ, u pworoŋi Arasɛli nimpaŋi u ŋge ná mpàabilʼe.»7 Ɲyɛ ka Yakuba si jwo yatonahabilʼá: «Yatɔɔre tèebínini sàha nɔ mà dɛ! Yii ɲyɛ a cè na canŋke saha a ɲyaha mà? Yii yatɔɔre yaha ti i bya, lire kàntugo yii sà a ti nâha.» 8 Ka yatonahabii si jwo: «Ná yatɔɔre puni ɲyɛ a bínʼa kwɔ̀ mɛ, wuu ɲyɛ na lire pyi mɛ. Tʼaha bínʼa kwɔ̀, wuu maha nta a kafaage láha bɛ̀ɛnŋke ɲwɔge na, maa ti kan tʼa bya.»
9 Mà Yakuba yaha u u yu ná pi e, ka Arasɛli si nɔ wani ná u tuŋi yatɔɔre e. Uru u mpyi na ti nâha. 10 Tèni i Yakuba à u yalwoŋi Laban pworoŋi Arasɛli ɲya ná yatɔɔre e ke, ka u u ŋkàrʼa sà kafaage láha bɛ̀ɛnŋke ɲwɔge na, maa ti kan tʼà bya. 11 Maa Arasɛli pûrʼa cû maa u yalʼa shɛ́ɛre sèlʼe, ka u ɲyaŋi funntange si ɲyilwɔhe pyi ku u ntîri u ɲyiigilʼe. 12 Maa jwo Arasɛli á na u tuŋi cìnmpworo u ɲyɛ ure, na uru na ɲyɛ Erebeka jya. Ka Arasɛli si fê a kàre pyɛngɛ maa sà yi jwo u tuŋʼá. 13 Tèni i Laban à u cɔɔnŋi jyaŋi Yakuba kyaa lógo ke, ka u u fê a kàre u fye e, maa sà u pûrʼa cû, maa u shɛ́ɛre, maa ŋkàre ná u e pyɛngɛ. Kyaa maha kyaa lʼà pyi ke, ka Yakuba si cyire puni jwo u á. 14 Laban à yire lógo ke, ka u u jwo: «Mà sèeŋi jwo, mii ná mu na ɲyɛ cìnmpyii. Ka Yakuba si ŋkwôro na báaraŋi pyi Laban yyére mà nɔ yiŋɛ niŋkin na.
15 Ɲyɛ ka Laban si jwo u á canŋka: «Mii sùpya u ɲyɛ mu, ŋka lire ná li wuuni mu i, mu ɲyɛ a yaa mu u a báare mii á mana mɛ. Ma sàraŋi jwo na á, sʼa uru kaan ma á.»
16 Ɲyɛ lirʼà ta pworii shuunni na ɲyɛ Laban á. Niɲjyeŋi mɛge mpyi Leya, nimbileni woge sí ɲyɛ Arasɛli. 17 Leya lemɛ mpyi a ɲwɔ mà Arasɛli kwɔ̀ mɛ. 18 Ka Arasɛli kyaa si ntáan Yakuba á. Ka u u jwo Laban á: «Mii sí báaraŋi pyi yyee baashuunni i mu pworoŋi nimbileŋi, Arasɛli kurugo.» 19 Ka Laban si jwo: «Mii u u kan mu á, lirʼà pwɔ́rɔ mii u u kan wabɛrʼá. Tɛ̀ɛn naha ná mii i.» 20 amuni Yakuba à kwôro Laban yyére, maa báaraŋi pyi yyee baashuunni Arasɛli kurugo. Bà Arasɛli kyalʼà táan Yakuba á sèlʼe mɛ, ɲcyii yyeegii baashuunniŋʼà pyi u á canmpyaa fiige.
21 Cyire yyeegilʼà tòro ke, ka Yakuba si jwo Laban á: «Na cwoŋi kan na á, tènʼà fûnŋɔ. Mii la ɲyɛ si u lèŋɛ numɛ.» 22 Ka Laban si kuru cyage sùpyire puni bínni, maa katáan nimbwoo pyi.
23 Ɲyɛ kuru canŋke numpilage e, ka Laban si u pworoŋi Leya lwɔ́ a kàre Yakuba yyére. Ka Yakuba si shwɔ̀n ná u e kuru numpilage e. 24 Laban mpyi a u báarapyipucwoŋi wà kan Leya á, uru mɛge mpyi Zilipa.
25 Ɲyɛ̀gʼà pa múgo ke, ka Yakuba si li ta na Arasɛli bà mɛ, ŋka Leya wi. Maa jwo Laban á: «Ɲaha mu à pyi ná mii i amɛ yɛ?» Lire tèni i ke, Arasɛli kurugo bà mii à báaraŋi pyi mu á mà? Ɲaha na mu à mii naɲwɔhɔrɔ yɛ?» 26 Ka Laban si jwo u á: «Mà tàanna ná wuu tɛɛnni i, cɔɔnfooŋi ɲyɛ na jà a kan nàmbage e muɲcwofooŋi yyaha na mɛ. 27 Cikwɔɔnre cibilaage sanŋke pyi ná Leya e. Kʼaha ŋkwɔ̀, wuu sí cɔɔnfooŋi kan mu á mú, maa núrʼa yyee baashuunniŋi wabɛrɛ báara pyi mii á.» 28 Ka Yakuba si kuru cibilaage sanŋke pyi ná Leya e, ka Laban si u pworoŋi Arasɛli kan u á. 29 Laban mpyi a u báarapyipucwoŋi wà kan Arasɛli á, uru mɛge mpyi Bila.
30 Ɲyɛ ka Yakuba si shwɔ̀n ná Arasɛli e mú. Ka u kyaa si ntáan u á mà tòro Leya na. Ka Yakuba si núrʼa báaraŋi pyi Laban á sahaŋki fo yyee baashuunni.
Yakuba pyìibii kani
31 Ka Kafooŋi Kile si li ɲya na Leya kyaa ɲyɛ a táan *Yakuba á mɛ, ka u u sege táan u na. Maa sege pɛn Arasɛli na. 32 Ka Leya si yyére maa si pùnambile, maa li mɛge le Urubɛn: «Kafooŋi Kile à mii nàvunŋke ɲya, numɛ mii kyaa sí n-táan na pooŋʼáa.»
33 Ka u u núrʼa yyére, maa si pùnambile, maa jwo: «Kafooŋi Kile à lógo na mii kyaa ɲyɛ a táan na pooŋʼá mɛ, lire kurugo u à nde pùnambilini kan mii á mú.» Maa li mɛge le Simiyɔnb.
34 Ka Leya si núrʼa yyére maa si pùnambile, maa jwo: «Numɛ kɔni, mii pooŋi sí mii mâra, ɲaha na yɛ mii à pùnampyire taanre si u á.» Maa li mɛge le Levic.
35 Ka u u núrʼa yyére, maa pùnambile sicyɛrewu si, maa jwo: «Numɛ, mii sí Kafooŋi kêe.» Lire kurugo, u à lire mɛge le *Zhudad. Lire kàntugo, ka u sege si yyére mà tère pyi.