Nàŋi ná u cwoŋʼà Kile ɲwɔmɛɛni yaha
3
Ɲyɛ Kafooŋi Kile mpyi a sige yaare ntemu yaa ke, wwòŋi u mpyi a cyîige tire puni na. Canŋka, ka wwòŋi si jwo ceeŋʼá: «Sèe wi na Kile à jwo, yii àha ŋkwɔ̀ cikɔɔge cire yasɛɛre tà lyî mà?» 2 Ka ceeŋi si jwo: «Wuu sí n-jà cikɔɔge cire yasɛɛre lyî yoo!» 3 Ŋka cige ku ɲyɛ cikɔɔge niŋke e ke, Kile à jwo wuu àha kuru woore lyî mɛ, na wuu bá ká n-sìi n-bwɔ̀n ti na mɛ, na lire ká mpyi, wuu sí n-kwû!» 4 Ka wwòŋi si jwo ceeŋʼá: «Sèe bà mɛ, yii sì n-sìi n-kwû mɛ! 5 Kile à yire jwo, ɲaha na yɛ u à cè yii aha kure cige yasɛɛre tà lyî canŋke ŋkemu i ke, yii sí n-pyi uru Kile yabiliŋi fiige, yii ɲyiigii sí múgo, yii sí kacɛnni cè n-wwû kapiini i.»6 Ɲyɛ ka ceeŋi si li ɲya na ŋke cige yasɛɛre sí n-táan sèlʼe, ti lemʼà ɲwɔ, ti mú sí n-jà sùpya yákili múgo, si mu pyi kacèŋɛ. Ka u u tà kwɔ̀n a lyî, maa tà kan u pooŋʼá, u à lyî, uru na mpyi wani ná u e. 7 Pi à tire lyî ke, ka pi i piye pyiŋkanni ɲya, maa ɲcè na pire cípyire wuu pi ɲyɛ. Ka pi i ntashan cige weɲyi yà kwɔ̀n a tutu mà le piye na.
Kile à laŋaŋke ŋkemu cyán nàŋi ná u cwoŋi ná wwòŋi na ke
8 Ɲyɛ yàkoŋke, nàŋi ná ceeŋʼà Kafooŋi Kile tùnmpe lógo, u u uye ɲaare cikɔɔge e ke, ka pi i fê a ŋwɔhɔ u yyaha na cire shwɔhɔlʼe. 9 Ka Kafooŋi Kile si nàŋi yyere: «Taa mu de?» 10 Ka u u Kile pyi: «Mii à mu tùnmpe lógo cikɔɔge funŋke e ke, ka mii i fyá, ɲaha na yɛ mii cípyire wu u ɲyɛ, lire lʼà mii pyi mii à ŋwɔhɔ.» 11 Ka Kile si jwo: «Jofoo u à mu pyi na mu cípyire wuŋi u ɲyɛ yɛ? Mii à mu sige cige ŋkemu yasɛɛre na ke, tire tà bà mu à lyî mà?» 12 Ka nàŋi si jwo: «Ceeŋi mu à kan mii á ke, uru u à tà kan mii à lyî dɛ!»
13 Ka Kafooŋi Kile si ceeŋi yíbe: «Ɲaha shi mu à pyi amɛ yɛ?» Ka ceeŋi si jwo: «Wwòŋʼà mii ɲwɔfaanŋa, ka mii i tà lyî.»
14 Ka Kafooŋi Kile si jwo wwòŋʼá:
«Ná mu sʼà ɲɛnʼa lire pyi,
mii à mu láŋa
yatɔɔre ná sige yaare sannte puni shwɔhɔlʼe,
mu sí raa filili ma yaceni na
sʼa nticyɛnŋi mûre
ma shìŋi canmpyaagii puni i.
15 Mii sí pege le mu ná ceeŋi shwɔhɔlʼe,
si kuru pege ninuge le mu yasege ná ceeŋi woge shwɔhɔlʼe.
U aha mu ta, u sí mu ɲùŋke bwɔ̀n n-jya,
mu mú ká u ta, maa u nɔ nintaani na.»
16 Maa jwo ceeŋʼá
«Mii sí là bâre mu laani ɲjyàŋi na.
Mu lahigii ziŋi sí n-waha sèlʼe.
Mu la si mpyi si ma pooŋi jà,
ŋka uru u sí n-pyi mu ɲùŋɔ na.»
17 Maa jwo nàŋʼá
«Mu à ɲɛnʼa taha ma cwoŋi ɲwɔmɛɛni fye e,
mii à yi jwo mu á ma hà cige ŋkemu yasɛɛre lyî mɛ,
tire mu à lyî.
Ɲyɛ ɲìŋkʼà kɛ̀ɛge mu kurugo,
mu sí raa ŋkànre sèlʼe sʼa ma ɲwɔlyiŋi taa ɲìŋke e
ma shìŋi canmpyaagii puni funŋke e.
18 Ŋgure ná ɲyɛpege sí n-fyîn ɲìŋke na,
mu ɲjyìŋi sí raa fworo mu yafaaɲyi i.
19 Mu sí raa lyî ma byɛɛni fùnmpe e,
fo zà mu núruŋɔ ɲìŋke e,
ɲaha na yɛ pworo ti ɲyɛ mu,
mu sí núru n-pa n-pyi tire pwoore ninure.»
Kile à Adama ná Awa kɔ̀rʼa yige cikɔɔge e
20 Ɲyɛ cyire karigii puni kàntugo, Adama à u cwoŋi mɛge le Awa, ɲaha na yɛ uru u à pyi sùpyire puni nuŋi. (Awa mɛge ɲwɔhe ku ɲyɛ shìŋi.)
21 Ka Kafooŋi Kile si yatɔɔre tà seeyi pyi vàanya mà le Adama ná u cwoŋi na. 22 Maa jwo «Numɛ, sùpyaŋi ɲyɛ wuu fiige, u à kacɛnni ná kapiini cè a wwû yiye e. Wuu u sige u àha ŋkwɔ̀ shìŋi cige yasɛɛre tà kwɔ̀n ɲjyî si ŋkwôro shì na fo tèekwombaa mɛ.» 23 Amuni lʼà pyi, ka Kafooŋi Kile si u kɔ̀rʼa yige Edɛni kìni cikɔɔge e, maa u pyi u sà a ɲìŋke fàa, Kile à u yaa ná ɲìŋke ŋkemu pwoore e ke.
24 Ɲyɛ amuni Kile à Adama ná Awa kɔ̀rɔ. Maa sherubɛnbiia pìi yaha cikɔɔge canŋa fworompe e pi a ku kàanmucaa. Maa ŋwɔtɔɔngɔ nawogo yaha ku u fyínge, maa sùpyire tɛgɛlɛ kwɔ̀n shìŋi cige na.