3 YAHIYA
1
Sulat Katꞌlluna min si
YAHIYA
1 Sulat itu min aku, dakayuꞌ pagmattoꞌahanbi, pinasampay ni si Gayus, bagay kalasahanku sabꞌnnal-bꞌnnal. 2 Bagay, ya amuꞌku ni Tuhan bang paꞌin ahāp labayannu kamemon, bang paꞌin ahāp anggautaꞌnu, pinasaliꞌ ni kahāp ataynu tudju ni Tuhan.
3 Landuꞌ aku kinōgan pagka aniyaꞌ saga danakanta bay atꞌkka piꞌitu angahakaꞌan aku ma pasalannu. In kaꞌa konoꞌ ahogot toꞌongan pamalutnu ma panduꞌ bꞌnnal. Atꞌttog asal pameyaꞌnu ma kalꞌngnganan bꞌnnal. 4 Halam aniyaꞌ makalasig atayku liyu min habal pasal saga panganakku ameyaꞌ na paꞌin ma kalꞌngnganan bꞌnnal.
5 Bagay, atuyuꞌ asal ka ma hinangnu amatuntul saga danakanta bebeyaꞌan Al-Masi, minsan aꞌa mbal takilānu. 6 Sinuli-suli lasanu eꞌ sigām ni saga jamaꞌa Al-Masi ma palhimpunan itu. Ahāp asal hinangnu amatuntul saga inān song sigām pauntas ni palꞌngnganan sigām. Makasulut Tuhan koꞌ ilu. 7 Saga aꞌa itu bay angalanjalan lꞌngngan sigām ma sabab ōn si Isa ya panabbutan sigām, maka halam aniyaꞌ tabang tasambut sigām min aꞌa ya mbal magkahagad ma si Isa. 8 Patut kita angayuput saga aꞌa buwattēꞌ, boꞌ aniyaꞌ lamudta ma hinang sigām magnasihat panduꞌ bꞌnnal.
9 Bay na aku amabeyaꞌ sulat ni saga jamaꞌa si Isa Al-Masi mailu, sagōꞌ si Diyutripi, ya bilahi magmakōk ma palhimpunan sigām, mbal toꞌongan angasip. 10 Angkan bang aku piꞌilu bangkilku du bay hinangna maka bay pangalimutna mꞌssaꞌ biddaꞌ ma pasalan kami. Maka mbal giꞌ iya kaꞌamuhan ma hinangna buwattēꞌ, angkan paruhunna gom paꞌin. Mbal taimaꞌna saga dauranakanta ya pahapit piꞌilu magnasihat, maka nilāng eꞌna sasuku bilahi anaimaꞌ, pinaokat isab min palhimpunanbi!
11 Bagayku kalasahanku, daꞌa sengorin addat-tabiꞌat alaꞌat. Sengorin addat-tabiꞌat ahāp. Sasuku maghinang kahāpan sukuꞌ Tuhan iya, sagōꞌ sasuku maghinang kalaꞌatan halam aniyaꞌ kataꞌuna ma Tuhan. 12 Si Dimitri ilu sinaksiꞌan sangkahāpan eꞌ aꞌa kamemon, maka saksiꞌ sigām maguyun du maka kasabꞌnnalan. Kami isab saksiꞌna, maka kataꞌuwannu in saksiꞌ kami bꞌnnal sadja.
13 Aheka giꞌ pangahakaku kaꞌa sagōꞌ mbal aku bilahi amatahaꞌ sulat itu. 14 Aholat aku makasaꞌut piꞌilu magꞌndaꞌ maka kaꞌa boꞌ kita makapagtampal bissala.
15 Mura-murahan, bang paꞌin ka kaniyaꞌan kasannangan deyom atay. Amabeyaꞌ kamemon saga bagay kami maitu minsan laꞌa hal lapal sigām. Hakaꞌin saga bagay kami mailu dangan maka dangan, in sigām masi nientom. Wassalam