2 YAHIYA
1
Sulat Karuwana min si
YAHIYA
1 Sulat itu min aku, dakayuꞌ pagmattoꞌahan, pinabeyaꞌ ni dakayuꞌ dꞌnda tapeneꞌ eꞌ Tuhan sampay ni saga panganakna. Alasahan aku kaꞌam sabꞌnnal-bꞌnnal. Lāgi nggaꞌi ka hal aku, sampay aꞌa kamemon ya ataꞌuwan kasabꞌnnalan, alasa du isab ma kaꞌam. 2 Alasa kami ma sabab kasabꞌnnalan ma deyom pangatayantam, ya pataptap ma kitam sampay ni kasaumulan.
3 Mura-murahan, bang paꞌin kitam pinaniyaꞌan tatabangan maka aseꞌ maka kasannangan atay, deyoꞌ min Mmaꞌtam Tuhan maka min si Isa Al-Masi Anakna. Bang paꞌin pinama-kitam luwas min kasabꞌnnalanna maka min lasana.
Kasabꞌnnalan maka Lasa
4 Landuꞌ aku kinōgan pagka aku kahakaꞌan aniyaꞌ panganaknu kaseheꞌan ameyaꞌ ma kasabꞌnnalan, buwat bay panohoꞌan kitam eꞌ Mmaꞌtam Tuhan. 5 Jari aniyaꞌ amuꞌku ni kaꞌa, arung: beyaꞌun panohoꞌan ya sulatku itu. Nggaꞌi ka panohoꞌan bahaꞌu, sagōꞌ panohoꞌan bay ma kitam sangay min katagnaꞌ giꞌ, ya yuk-i: maglasa-liyasahi kam. 6 Ya lasa pahꞌllingku itu, iya na palantaratam ameyaꞌ na paꞌin ma panohoꞌan Tuhan. Buwat bay takalebi sangay min katagnaꞌ, in kitam sinōꞌ taptap maglasa-liyasahi.
7 Aheka aꞌa pangakkal ma dunya, aꞌa mbal angaku in si Isa Al-Masi bay piꞌitu ni dunya magbaran manusiyaꞌ. Pandogahinbi aꞌa buwattēꞌ sabab Pangangakkal maka Banta koꞌ inān, ya kuntara Al-Masi. 8 Halliꞌinbi sigām boꞌ mbal kaliman bay pagsangsāꞌantam ati boꞌ tasambutbi kamemon ya panungbas kaꞌam. 9 Sai-sai mbal pataptap ma panduꞌ bay min Al-Masi, boꞌ paliyu gom paꞌin minnēꞌ, halam ma iya Tuhan. Ya balikna, sai-sai pataptap na paꞌin, inaꞌan ma iya Tuhan Mmaꞌ maka Anakna. 10 Bang aniyaꞌ gantaꞌ piꞌilu ni kaꞌam, boꞌ mbal maguyun panduꞌna maka panduꞌ Al-Masi, daꞌa pareyomunbi ni lumaꞌbi. Daꞌa minsan saginahunbi, 11 sabab sai-sai anagina aꞌa buwattēꞌ taga-lamud na ma kahinanganna alaꞌat.
Bissala Panangbusan
12 Aheka giꞌ pangahakaku ni kaꞌam sagōꞌ mbal aku bilahi amatahaꞌ sulat itu. Aholat aku kalu makatibaw piꞌilu magsuli-suli pabaihuꞌ maka kaꞌam, ati boꞌ ajukup kakoyagantam.
13 Saga anak danakanbi dꞌnda ya tapeneꞌ eꞌ Tuhan, amabeyaꞌ ni kaꞌam minsan laꞌa hal lapal sigām. Wassalam