148
Kalangan 148
1 Pudji ni si Yawe!
Pudjihunbi iya min deyom sulgaꞌ,
pudjihunbi min kalangahan langit.
2 Kaꞌam saga malaꞌikatna, pudjihunbi iya,
kaꞌam sosohoꞌanna patikawasahun, pudjihunbi.
3 Kaꞌam mata llaw maka bulan, pudjihunbi si Yawe,
kaꞌam saga bituꞌun magsasahaya, pudjihunbi iya.
4 Saga ma kalangkawan katapusan, amudji kam ma iya,
Saga boheꞌ ma diyataꞌan langit, amudji kam.
5 Patut pinabantug ōn si Yawe eꞌ ai-ai pinapanjari
sabab angallam sadja iya ati paniyaꞌ magtūy.
6 Pinatꞌnnaꞌan sigām lugal min kahandakna,
pinatꞌnnaꞌan sigām gantaꞌan ya anatas ni kasaumulan.
7 Pudjihunbi si Yawe ma kaluhaꞌan dunya,
kaꞌam saga sattuwa maka sasuku ma kategob-tegoban,
8 lꞌtteꞌ maka tigtigan aes, aluꞌ aes maka gabun,
saga badju ya angahinang kabayaꞌanna,
9 kamemon kabūd-būran maka kabīd-bīran,
saga kabbun maka saga kayu sidro,a
10 kaginisan sattuwa talun maka kamemon sapiꞌ niꞌipat,
manuk-manuk palē maka manuk-manuk pikpikan
11 saga kasultanan ma dunya maka palbangsa-bangsahan,
saga aꞌa balbangsa maka saga magbabayaꞌ,
12 saga ondeꞌ bahaꞌu subul-budjang,
kamanahutan maka katoꞌahan.
13 Papudjihun kamemon pinapanjari itu,
sohoꞌun amabantug ōn si Yawe
sabab luwal ōnna ya patut binantug.
Minsan maingga ma dunya, minsan isab ma sulgaꞌ
halam aniyaꞌ makaliyu min kamahaldikaꞌan si Yawe.
14 Aniyaꞌ aꞌa patikosogun pinaniyaꞌ eꞌna panabang saga aꞌana,
aꞌa pinagmahaltabatan eꞌ kamemon sukuꞌna,
eꞌ saga panubuꞌ si Israꞌil, ya bangsa kalasahanna.