143
Kalangan 143
Kalangan si Daꞌud
1 O Yawe, kalehun lagiꞌ pangamuꞌ-ngamuꞌku.
Kalehun panganjunjungku, kaꞌaseꞌin aku.
Pasaꞌut ka konoꞌ anabangan aku,
sabab kapangandolan ka maka abontol.
2 Aku itu sosohoꞌannu, daꞌa aku saraꞌun,
sabab halam aniyaꞌ manusiyaꞌ abontol ma pangꞌndaꞌnu.
3 Tinurul aku heꞌ bantaku,
ginindasan aku eꞌna, pinodjak aku.
Pinatꞌddas aku heꞌna ma deyom kalendoman,
sapantun aꞌa atꞌggol na kamatayna.
4 Halam aniyaꞌ kaholatanku, alamma palnyawahanku,
angaloyot pangatayanku kabowa sukkalna.
5 Amagtak ni atay saga patahunan palabay,
angahonaꞌ-honaꞌ aku pasal kahinangannu,
amikil-mikil pasal hinang tangannu kamemon.
6 Jari anangga aku tudju ni kaꞌa,
mbal kasandalan pagmatay ma kaꞌa,
sapantun aꞌa patay boheꞌ ma lahat apanggang.
7 O PANGHŪꞌ, pasaꞌut lagiꞌ ka anambung,
sabab angalongkoy iman-nyawaku.
Bang ka pataikut min aku,
tantu aku pasaliꞌ ni saga aꞌa ya amoleꞌ lahat.
8 Bang paꞌin aniyaꞌ habal pagdaiꞌ-llaw
angalapalan aku pasal lasanu kakkal,
sabab angandol du aku ma kaꞌa.
Panduꞌin aku lān ya wajib palꞌngngananku,
sabab kaꞌa ya pangaholatan palnyawahanku.
9 O Yawe, liyusun aku konoꞌ min saga bantaku,
sabab kaꞌa ya patapukanku.
10 Panduꞌin aku boꞌ tabeyaꞌku ai-ai pangahandaknu aku,
sabab kaꞌa ya Tuhanku.
Bang paꞌin aku minaliman heꞌ Rū-nu ahāp,
supaya aku makalꞌngngan ma lān aratag.
11 Ya PANGHŪꞌ, pakallumun aku ma sabab kabantug ōnnu.
Puwasin aku min kasukkalan ma sabab kabontol palangaynu.
12 Laglagun lagiꞌ palbantahanku ma sabab lasanu kakkal.
Pahalamun saga aꞌa kamemon ya anguntarahan aku, sabab atanu du aku.