139
Kalangan 139
Kalangan si Daꞌud
1 O Yawe, bay aku tatabnu,
kataꞌuwannu aku maka kapagaꞌaku.
2 Ataꞌu ka ma katingkōꞌku maka ma kapundukku,
kasakupannu pamikilku minsan min kalawakan.
3 Ataꞌu ka ma kalunsulku maka kalegeku,
tahimangkannu kajarihanku kamemon.
4 O Yawe, bang aku sōng amaluwas bissala,
asal kataꞌuwannu kamemonna ma halam giꞌ takꞌbbat.
5 Nilikusan aku eꞌnu min dahuwan maka min bukutan,
kapatꞌnnaꞌan aku tangannu.
6 Landuꞌ makahaylan pangitaꞌu buwattilu, mbal takannalku.
Landuꞌ alanga, mbal taꞌabutku.
7 Ya PANGHŪꞌ, piꞌingga aku boꞌ makalahi min Rū-nu?
Piꞌingga palahianku boꞌ kaillaganku haddaratnu?
8 Bang aku paꞌangkat ni langit diyataꞌ, mailu ka asal.
Bang aku pabahak ma lahat kamatay, mailu isab ka.
9 Bang aku paleyang ni pasobangan llaw
ati maglahat aku ma dambilaꞌ sꞌllang,
10 inaꞌan ka isab angamaliman aku,
komkomannu aku maka tangannu sakap kowan.
11 Bang aku angupama, yukku, “Tantu aku katambunan eꞌ kalendoman,
papinda isab llaw ni sangom ma katilibutku,”
12 halam aniyaꞌ dapat, sabab halam aniyaꞌ lendom ma kaꞌa.
Minsan sangom anahaya saliꞌ llaw,
sabab saliꞌ du lendom maka sawa bang ma kaꞌa.
13 Kaꞌa PANGHŪꞌ, bay amapanjari ginhawa-baranku,
tabatuk eꞌnu pagdayawku hinabuku lagiꞌ ma deyom kandang inaꞌku.
14 Aheya pudjiku ni kaꞌa, sabab ainu-inu aku, sinōd aku tāw,
ma sabab ginhawa-baran ya hinangannu aku.
Tataꞌuku asal, makainu-inu kahinangan kamemon.
15 Halam katapukan min kaꞌa pagdayaw baranku
waktu lagiꞌ kapagbatuk ma aku ma kutaꞌ kuddarat.
Waktu isab kapanganyam ma aku ma kalaloman gumi,
16 taꞌndaꞌnu aku ma halam giꞌ ajukup kapagaꞌaku.
Tasulat asal saga llaw ya panganggantaꞌnu ma aku,
tasulat ma deyom kitabnu,
tasulat dahū lagiꞌ min llaw kalahilku.
17 Ya Tuhan, ahalgaꞌ ma aku kahonaꞌ-honaꞌnu,
kumarukan hekana, mbal tasipat.
18 Bang aku angitung kahonaꞌ-honaꞌannu,
paheka lagiꞌ min solagan gusung ma kaluhaꞌan dunya.
19 Ya Tuhan, bang paꞌin papataynu saga aꞌa jahallis!
Kaꞌam saga bulaꞌug, alaꞌan kam min aku!
20 Tuhan, pinamūng-mūngan ka pangkal eꞌ saga aꞌa inān,
pinahinaꞌ ōnnu eꞌ palbantahannu.
21 O Yawe, aheya kabꞌnsiku ma sasuku abꞌnsihan kaꞌa.
Sasuku angatu ma kapagbayaꞌnu, asammal ma pangꞌndaꞌku.
22 Mbal kasandalan kabꞌnsiku ma saga aꞌa inān,
itungku sigām saliꞌ bantaku.
23 O Tuhan, lilingun aku boꞌ tataꞌunu deyom pangatayanku,
tatabun aku boꞌ tataꞌunu bang ai kahanggawanku.
24 Tandingun aku, ya aniyaꞌ makalaꞌat ma iman-nyawaku,
ati malimin aku ma lān ya kakkal min awal ni ahil.