119
Kalangan 119
1 Aheya kahāpan ma sasuku mbal katōngan dusa,
ya atukid ameyaꞌ ma bay panaraꞌ si Yawe.
2 Aheya kahāpan ma saga aꞌa ya magkahagad ma panduꞌna,
ya magmatayan Tuhan sadja.
3 Mbal sigām angahinang kalaꞌatan,
gom paꞌin sigām anꞌppu kajarihanna.
4 O PANGHŪꞌ, bay ka amatꞌnnaꞌan kami hatulan
ya wajib bineyaꞌ toꞌongan.
5 Mura-murahan bang paꞌin aku makatuyuꞌ
ameyaꞌ ma ai-ai pangahandaknu.
6 Mbal aku tahinang pagiyaꞌan,
bang tahonaꞌ-honaꞌku panohoꞌannu kamemon.
7 Pudjiku ka magatay poteꞌ,
hinabuku angadjiꞌ panaraꞌnu ya landuꞌ abontol.
8 Ameyaꞌ du aku ma pangahandaknu,
daꞌa paꞌin aku siya-siyahun.
9 Buwattingga heꞌ subul anussi kajarihanna?
Luwal bang panunuranna palmannu.
10 Kaꞌa ya pagmatayanku, Tuhan,
daꞌa aku tugutin pasāꞌ min panohoꞌannu.
11 Tatauꞌku palmannu ma deyom pangatayanku
boꞌ supaya mbal amakay dusa ni kaꞌa.
12 O Yawe, bang paꞌin aheya barakat ma kaꞌa,
panduꞌin lagiꞌ aku pasal kahandaknu.
13 Usulku na paꞌin
saga panaraꞌ bay pangallamnu.
14 Kinōgan aku ameyaꞌ ma panduꞌnu,
buwat aꞌa magkōgan pangaltaꞌ aheya.
15 Panohoꞌannu ya pagtaliꞌanku kahabaꞌ waktu,
pamikilanku na paꞌin kajarihannu.
16 Kaꞌamuhan aku ma pangahandaknu,
mbal palehomku palmannu.
17 Pagmurahun sosohoꞌannu itu, ati allum aku,
maka amogbog pahāp ma palmannu.
18 Pasawahun lagiꞌ pikilanku
boꞌ ahāp eꞌku angꞌndaꞌ ma saraꞌnu makainu-inu.
105 O PANGHŪꞌ, palmannu itu sapantun palitaꞌan ma palꞌngngananku,
suwariyan ma labayanku.
106 Bay aku makasapa maka bay patumanku,
in aku ameyaꞌ toꞌongan ma panaraꞌnu, ya adil lullun.
129 Makainu-inu pamanduꞌnu, angkan bogboganku toꞌongan.
130 Palmannu ya pangāꞌan sawa pamarantaꞌ pikilan manusiyaꞌ,
minsan aꞌa akulang pangadjiꞌna makahati du isab.