103
Kalangan 103
Kalangan si Daꞌud
1 Pudjiku si Yawe min deyom pangatayanku.
Pudjiku ōnna sussi min palnyawahanku
maka min kuwat-anggautaꞌku.
2 Ahoꞌ, pudjiku PANGHŪꞌ min deyom pangatayanku,
mbal takalipat kamemon kahāpan ya bay pamuwanna.
3 Sabab iya ya angampun kamemon paldusahanbi.
Iya ya amauliꞌ kamemon sakibi.
4 Iya isāb angalꞌkkat kallumbi min lahat kamatayan.
Iya isab amalipatan kaꞌam lasa maka aseꞌ.
5 Iya ya amuwanan kaꞌam ginisan kahāpan ya makahāp palasahanbi,
angkan tabawiꞌ bay kosog kabataꞌbi.
Sapantun kam belleꞌ ya mbal ataꞌu binaleꞌ.
6 Abontol PANGHŪꞌ-Yawe ma kahinanganna kamemon,
pinabontol eꞌna hukuman ma sasuku pininjalaꞌ eꞌ saraꞌ.
7 Bay pataꞌuna si Musa pasal kaniyatanna.
Bay paꞌndaꞌna hinangna ni bangsa Israꞌil.
8 Patiaseꞌun maka patilasahun asal PANGHŪꞌ-Yawe,
mbal akagit atayna magdaiꞌ-daiꞌ,
gom paꞌin palabi lasana tuman.
9 Mbal iya paddas amabukag,
mbal anatas kaꞌastolna sampay ni kasaumulan.
10 Mbal kita pinatꞌnnaꞌan kabinasahan ya makatōpan dusata.
Mbal kita tinungbasan eꞌna ma buwat hinangta alaꞌat.
11 Sabab-kalnaꞌ, landuꞌ aheya lasana ma sasuku magmatāwan iya.
Mbal tabista kaheya lasana itu, buwat diyataꞌ langit
mbal tabista langkawna min babaw dunya.
12 Pinalawak eꞌna paldusahantam,
buwat lawak sobangan maka sꞌddopan.
13 Aheya aseꞌ ma sasuku magmatāw ma iya,
buwat kaꞌaseꞌ mattoꞌa ma panganakna.
14 Sabab kinataꞌuwan asal eꞌna ya bay pangompolan kitam manusiyaꞌ.
Taentomna in kitam bay nihinang min bagunbun tanaꞌ.
15 Ya niōnan manusiyaꞌ itu mbal anatas,
sapantun parang-parang daiꞌ-daiꞌ patubuꞌ.
Sapantun sumping huma daiꞌ-daiꞌ manisna.
16 Pagtumbuk paꞌin baliyu, magtūy halam na.
Mbal taentom bay kamahēꞌna.
17 Malaingkan ya kasi-lasa PANGHŪꞌ ni sasuku magmatāw ma iya
anatas min awal tagnaꞌ sampay ni kasaumulan.
Pasampay kahandakna abontol ni anak-mpu saga aꞌa kamemon,
18 sasuku amogbogan kapagsulutan sigām maka Tuhan,
maka atukid ameyaꞌ ma panduꞌna.
19 Pinatuman eꞌ si Yawe pagparintana ma sulgaꞌ
ati magtuhan iya ma papanjarihanna kamemon.
20 Pudjihunbi PANGHŪꞌ-Yawe,
kaꞌam saga malaꞌikatna patikawasahun
ya angahinang kahandak Tuhan,
ya ameyaꞌ ma panohoꞌanna.
21 Pudjihunbi PANGHŪꞌ, kaꞌam kalaksaꞌ-laksaꞌan
ya sosohoꞌanna ma deyom sulgaꞌ,
maka kaꞌam ya maghinang kabayaꞌanna.
22 Pudjihunbi PANGHŪꞌ, kaꞌam papanjarihanna,
pudjihunbi iya maingga-maingga ma pagparintahanna.
Pudjiku isab PANGHŪꞌ sampay min buliꞌ-atayku.