95
Kalangan 95
1 Daiꞌ na kam, magkalang kitam ni si Yawe kabowa kakōgan,
Patanogtam suwalatam ni iya,
ya pinagsambatan Batu-Lakit panglappasan.
2 Sūng kitam anukbal pagsukulan ni iya,
paheyatam iya labay min kalangan maka tarasul.
3 Sababna si Yawe ya Tuhan makagaꞌos,
sultan abantug, alanga min katuhan-tuhanan kamemon.
4 Tinayak heꞌna poꞌonan dunya itu.
Dapuna asal saga kapussukan būd.
5 Sukuꞌna asal saga katahikan, sabab iya ya bay amapanjari.
Iya na isab bay angompol gintanaꞌan.
6 Daiꞌ na kam, pasujud kitam amudji iya.
Angōk-tuꞌut kitam ma alopan PANGHŪꞌ Magpapanjari,
7 kalnaꞌ in iya pagtuhanantam,
maka kitam saga aꞌana, sapantun bili-bili ma pangipatanna.
Na, ma llaw itu, bang takalebi bissala Tuhan, yukna,
8 “Daꞌa patuwasunbi kōkbi buwat bay kaꞌmboꞌ-mboꞌanbi ma Meriba,
buwat bay ma Massa isab, ma lahat paslangan.
9 Bay aku sinulayan maka tinukas heꞌ kaꞌmboꞌanbi,
sinulayan aku heꞌ sigām,
minsan du bay kalabayan heꞌ sigām kahinanganku.
10 Mpatpūꞌ tahun bay kapꞌddiꞌ atayku ma pangkatan inaꞌan-i.
Saga aꞌa itu,” yukku, “mbal makatotog ameyaꞌ ma aku.
Halam tataꞌu eꞌ sigām kaul-piꞌil ya kabayaꞌanku.
11 Bay akagit atayku ati pagsapahanku sigām,” yukku,
“Saga aꞌa itu mbal toꞌongan pasōd ni lahat pahalian bay tagamaku.”