91
Kalangan 91
1 Sasuku patꞌnnaꞌ ma sindungan Tuhan Mahatinggi
pahali-hali ma limbuhan Sangat Kawasa.
2 Buwattitu pahꞌllingku, “Si Yawe ya pahogotanku.
Sapantun iya kutaꞌ patapukanku, pangandolanku iya.”
3 Tantu iya amuwasan kaꞌa min jallat ya pinatꞌnnaꞌan kaꞌa,
maka min saki makapatay.
4 Tinambunan ka eꞌna ma sabakanna, ibarat manuk.
Pasindung ka ma deyoꞌ pikpikna.
Tuhan ya sapantun ād makahampanan kaꞌa
sabab mbal toꞌongan apinda kajarihanna.
5 Mbal kagawahannu bangsa maglꞌlꞌngngan ma kalendoman,
atawa budjak ya nihiyak waktu llaw.
6 Mbal isāb katāwannu saki maglunsulan ma sangom,
atawa bonglay ya makalaglag bang ugtu llaw.
7 Abugtang paꞌin dangibu aꞌa ma atagnu kowan,
sangpūꞌ ngibu paꞌin ma atagnu gibang, mbal ka talapay.
8 Taꞌndaꞌ hal heꞌ matanu bang ai panungbas Tuhan ma saga aꞌa jahulakaꞌ.
9 Bang Tuhan Mahatinggi ya pataptapannu,
hatina si Yawe ya patapukanku isab,
10 mbal ka tꞌkkahan balaꞌ,
mbal sinekot lumaꞌnu heꞌ saki bonglay,
11 sabab aniyaꞌ saga malaꞌikat sinōꞌ heꞌ Tuhan
angahampanan kaꞌa piꞌingga-piꞌingga palꞌngnganannu.
12 Tinayak ka eꞌ sigām boꞌ mbal makasantuk tapeꞌnu ni batu.
13 Giꞌikannu halimaw maka sowa dꞌppong,
kagindasan eꞌnu halimaw maka buwaya.
14 Angallam si Yawe, yukna, “Alasa aꞌa itu ma aku,
angkan liyusku iya min kajahatan,
Angaku iya ma ōnku, angkan iya hampananku.
15 Pagsabbutna ma aku, sambunganku magtūy.
Pataptap aku ma iya hinabuna ma deyom sukkal.
Tabangku iya ma deyom kasigpitan,
maka buwananku iya ōn abantug.
16 Kaꞌamuhan iya pagga patahaꞌku umulna.
Pataꞌuku iya bang buwattingga pangalappasku.”