84
Kalangan 84
Kalangan saga Anak si Kora
1 Ya PANGHŪꞌ, Tuhan Sangat Kawasa!
Kalingkat du paꞌin patꞌnnaꞌannu ilu!
2 Saliꞌ aku apunung eꞌ bayaꞌku piꞌilu ni halaman lumaꞌ PANGHŪꞌ.
Magkalang aku ni Tuhan kakkal ma sabab kakōranku,
luwas min palnyawahanku maka min ginhawa-baranku.
3 Minsan saga manuk-manuk paupit
makabāk patꞌppakan ma atag paghinangan kulban ni kaꞌa.
Sampay saga manuk-manuk baliyu
makahinang pugaranna mailu pangintꞌllohanna.
Ya PANGHŪꞌ, Tuhan Sangat Kawasa!
Kaꞌa ya Sultanku, kaꞌa ya Tuhanku.
4 Aheya kahāpan sasuku patꞌnnaꞌ ma deyom lumaꞌnu,
sabab makasanglit sigām ma kaꞌa ma halam aniyaꞌ hoggaꞌanna.
5 Aheya kahāpan ma sasuku makasambut kosog min kaꞌa,
ya angangut patukad ni Awrusalam boꞌ anambahayang.
6 Pasaltaꞌ sigām palabay min lꞌbbak Bakaa,
tahinang lugal pagboheꞌan.
Taꞌabut paꞌin waktu pangulan, apꞌnnoꞌ lꞌbbak inān
eꞌ kalowang-lowangan taga-boheꞌ.
7 Paganap na paꞌin kosog sigām, boꞌ paganap,
sampay sigām paharap pakaniya-kaniya ni Tuhan ma daꞌira Siyun.
8 Ya PANGHŪꞌ, Tuhan Sangat Kawasa, Tuhan si Yakub,
bang paꞌin sambutnu pangamuꞌ-ngamuꞌku itu.
9 O Tuhan, ndaꞌun giꞌ sultan ya makatampanan kami.
Ndaꞌun pamaihuꞌanna, in iya aꞌa tapeneꞌnu.
10 Aku itu, pād-pād dangibu llaw maingga-maingga lahat,
gom lagiꞌ dangꞌllaw ma deyom halaman lumaꞌnu.
Pād-pād aku patꞌnnaꞌ ma kalumaꞌan saga aꞌa jahulakaꞌ,
gom lagiꞌ ma lumaꞌnu, minsan hal anꞌngge ma atag bowaꞌ lawang.
11 Sabab Tuhan Yawe saliꞌ ād maka tampan ma saga aꞌana.
Amuwan iya hulmat maka mahaltabat.
Sasuku ahongpot tebongna
mbal kinaiskutan heꞌ Tuhan ai-ai ahāp.
12 O Tuhan Sangat Kawasa
aheya kahāpan ma sasuku angandol ma kaꞌa.