66
Kalangan 66
1 Kaꞌam kamemon ma dunya,
olanginbi Tuhan ma sabab kakoyagbi!
2 Magkalang kam pamaheyabi ōnna kawasahan!
Pudjihunbi iya boꞌ pasōng kabantuganna!
3 Amissala kam ni Tuhan, yukbi, “Ya Tuhan,
akawasa du paꞌin kahinangannu, mbal tasipat!
Magpatiata saga palbantahannu ni kaꞌa
sabab kawasanu mbal tasaggaꞌ.
4 Pasujud ni kaꞌa sabarang bangsa ma deyom dunya.
Angalang sigām pananglit kaꞌa,
pinudji ōnnu ma kalangan sigām.”
5 Piꞌitu kam angꞌndaꞌ ma bay tahinang heꞌ Tuhan.
Makatāw-tāw saga kahinangan ya tahinang eꞌna
pangahāp kitam panubuꞌ si Mboꞌ Adam.
6 Ya tahik bay tahinang heꞌna katohoꞌan,
boꞌ magtinapeꞌ saga aꞌa parambilaꞌ.
Angkan kitam subay magkōg-koyagan Tuhan,
7 ya magparinta sampay saumul-umul ma sabab kawasana.
Pineyanan heꞌna palbangsa-bangsahan,
supaya halam aniyaꞌ min sigām angatu ma iya.
8 Kaꞌam saga bangsa, pudjihunbi Tuhantam,
patanogunbi suwalabi pananglit ma iya.
9 Niliyusan kitam min kamatay,
pineyanan kitam boꞌ mbal parasdas tapeꞌtam.
10 Bay kami sulayannu, Tuhan, bay kami tatabnu,
sapantun pilak tinatab ma panarulan.
11 Bay kami kalabusunu, sapantun daing ma pokot,
bay kami patanggungnu tanggungan abuhat.
12 Makahantak paꞌin kami,
bay tugutannu saga aꞌa anguraꞌ palabay min kōk kami.
Bay kami palabay isab min deyom api maka min boheꞌ,
arak amatay, mandaꞌ kami paluwasnu
boꞌ pinasampay ni lahat magdayas-dayas ma kinakan.
13 Piꞌilu aku ni lumaꞌnu angungsuran pagkulban tinunuꞌ,
maka hinangku bay pagnajalku ni kaꞌa.
14 Hinangku in janjiꞌ bay kakꞌbbatan bowaꞌku, hinabuku bay kasigpitan.
15 Tukbalanku ni kaꞌa bili-bili alꞌmmok maka kambing lꞌlla tinunuꞌ ma katibuꞌukanna.
Ungsuranku ni kaꞌa susumbaliꞌan sapiꞌ maka kambing.
16 Sasuku kam magmatāw ma Tuhan, piꞌitu kam akale
ati pangahakaku ma kaꞌam bay kahinanganna ma aku.
17 Bay aku parahing ni iya,
bay iya sanglitanku maka pangallam bowaꞌku.
18 Abila aku bay anganapsuhan laꞌat ma deyom atayku,
mbal aku kinale heꞌ Panghūꞌku.
19 Saguwāꞌ tantu aku kinale heꞌ Tuhan,
taꞌasip eꞌna pangamuꞌ-ngamuꞌku.
20 Pudjitam Tuhan,
ya halam bay amabiyal pagduwaꞌaku,
ya halam bay pahali alasahan aku.