61
Kalangan 61
Kalangan si Daꞌud
1 Ya Tuhan, kalehun panangisku,
taimaꞌun pangamuꞌ-ngamuꞌku.
2 Angalingan aku ni kaꞌa min lahat ya katapusan alawak
pagka halam aniyaꞌ holatanku.
Malimin aku ni batu alanga ya mbal taꞌabutku.
3 Sabab kaꞌa ya bay patapukanku,
ibarat kutaꞌ mbal tasōd eꞌ saga bantaku.
4 Landuꞌ aku bilahi patꞌnnaꞌ ma Lumaꞌ Pangarapan ni kaꞌa
boꞌ maglumaꞌ mailu satꞌggolku allum,
ati pasindung aku ma deyoꞌ kepetnu sapantun anak manuk.
5 Ya Tuhanku, tasambutnu bay janjiꞌku ma kaꞌa,
ati kabuwanan aku kahāpan ya pamusakaꞌnu
ma sasuku magmatāw ma ōnnu.
6 Bang paꞌin patahaꞌnu umul sultan,
bang paꞌin pahogotnu pagsultanna sampay ma panubuꞌna.
7 Mura-murahan, bang paꞌin iya magsultan ma matahannu salama-lama tahun.
Hampanin iya pahāp ma sabab lasanu maka janjiꞌnu ya mbal magkapinda.
8 Jari aku itu angalang na paꞌin pamudjiku ōnnu,
ati suhulku ai-ai bay panganajalku ma kaꞌa,
tukbalanku ni kaꞌa kahabaꞌ llaw.