51
Kalangan 51
Kalangan si Daꞌud Pangamuꞌ Kaꞌampunan
1 O Tuhan, kaꞌaseꞌin aku ma sabab lasanu kakkal.
Patiaseꞌun ka,
angkan amuꞌku pinapasan paldusahanku.
2 Koseꞌin aku min kasāꞌanku,
sussihun aku min dusaku.
3 Sabab kataꞌuwanku na kalaꞌatanku,
mbal takalipatku, pamikilanku na paꞌin sakahabaꞌ waktu.
4 Ya dusaku itu dusa ni kaꞌa sadja, nggaꞌi ka dusa ni manusiyaꞌ.
Bꞌnnal, bay aku amakay dusa ni kaꞌa,
angkan taluwaꞌ bang aku katōngannu dusa. Abontol ka.
Taluwaꞌ isab bang aku patꞌnnaꞌannu hukuman.
5 Tantu aku dusahan waktu lagiꞌ kapaganak ma aku,
dusahan aku min waktu kapangiraman inaꞌku ma aku.
6 Tantu isab, ya kabayaꞌannu subay aniyaꞌ kabꞌnnalan sampay min deyom atay.
Ya pamanduꞌnu pasal pangitaꞌu itiyaꞌ pasobsob ni itikadku.
7 Sussihun aku maka sayul hissup, ati alanuꞌ aku.
Pandihun aku, ati apoteꞌ aku min poteꞌ gapas.
8 Pakalehun aku lling pagkoyagan, paglasigan.
Pakōrun kuwat-anggautaꞌku, ya bay pinananaman kakagit ataynu.
9 O Tuhan, bang paꞌin ka pakeleng min paldusahanku,
maka papasin kasāꞌanku kamemon.
10 Paniyaꞌin aku atay sussi,
pabahaꞌuhun itikadku boꞌ mbal magpinda-pinda.
11 Daꞌa konoꞌ aku paluwasun min haddaratnu.
Daꞌa laꞌanin min aku Rū-nu Sussi.
12 Pabīngun ni aku kalasigan ya bay ma aku tagnaꞌ kapangalappasnu ma aku.
Buwanin aku kajarihan ahutu boꞌ tahinangku kabayaꞌannu.
13 Jari panduꞌanku saga aꞌa ya angalanggal saraꞌnu,
panduꞌanku sigām pasal kaul-piꞌil ya makasulut ataynu.
Ati aniyaꞌ saga aꞌa dusahan pabalik ni kaꞌa.
14 O Tuhan, kaꞌa Tuhan Manglalappas, puwasin aku min dusa amapatay aꞌa
ati angalang aku pasal kabontol pangahandaknu.
15 O Tuhan, PANGHŪꞌ, pakalangun aku,
boꞌ ka sanglitanku labay min suwalaku,
16 Bang pagkulban ya kabayaꞌannu, bay du ka bowahanku.
Mbal ka kasulutan ma susumbaliꞌan pinagtunuꞌ.
17 Ya huhulmatan pagmatayan Tuhan, ya na atay ataꞌu magsusun.
O Tuhan, mbal sowaynu atay pagsususun maka atay areyoꞌ-deyoꞌ.
18 Bangunun daꞌira Siyun ma sabab lasanu hilas.
Pahāpun tambak batu ya bay pangād ma daꞌira Awrusalam.
19 Minnēꞌ aniyaꞌ tutukbalan abontol pangahulmat kaꞌa.
Aniyaꞌ susumbaliꞌan pinagtunuꞌ ma katibuꞌukanna,
maka aniyaꞌ sapiꞌ lꞌlla pinagkulban ma panukbalan ya ma lumaꞌnu.