46
Kalangan 46
Kalangan saga Anak si Kora
1 Tuhan ya patapukanta maka pangāꞌanta kosog,
asakap iya anabang bang aniyaꞌ kasukkalan.
2 Angkan kita mbal tināw minsan ajogjog dunya,
minsan alꞌbbos kabūd-būran tudju ni timbang.
3 Ahoꞌ, minsan magabal tahik, minsan amukal,
minsan isab ahenggol saga būd heꞌ kosog haus.
4 Sagōꞌ aniyaꞌ sapaꞌ anasahan amowa kakōgan ni daꞌira Tuhan,
ni lugal sussi ya haddarat Tuhan Mahatinggi.
5 Inaꞌan Tuhan ma deyom daꞌirana, angkan mbal pajudjal.
Pagkꞌllat llaw, tinabang heꞌ Tuhan.
6 Maglengogan kabangsa-bangsahan. Pahꞌbbaꞌ kapagsultanan.
Angabtang sadja Tuhan, magtūy atunaw dunya.
7 Pataptap PANGHŪꞌ Sangat Kawasa ma kita,
kutaꞌ pasindunganta ya Tuhan pangkatta si Yakub.
8 Daiꞌ kam, ndaꞌunbi kahinangan si Yawe,
ya hinang makakꞌbbal atay bay tahinangna ma dunya.
9 Pinahondong heꞌna baꞌanan pagbonoꞌ ma kaluhaꞌan dunya.
Pinagpōng heꞌna baꞌugan panaꞌ, pinagpꞌppot saga budjak,
Pinagtunuꞌ tampan sundalu ma deyom api.
10 “Pahali kam, pahati kam in aku Tuhan.
Patut aku pinalanga heꞌ kabangsa-bangsahan.
Patut aku pinalanga toꞌongan ma dunya.”
11 Pataptap PANGHŪꞌ Sangat Kawasa ma kita,
Kutaꞌ pasindunganta ya Tuhan pangkatta si Yakub.