40
Kalangan 40
Kalangan si Daꞌud
1 Angagad na paꞌin aku ma si Yawe minsan mbal anambung saruꞌun-duꞌun,
jari palingiꞌ iya ni aku boꞌ akale ma panabbutku.
2 Bay aku binuhat eꞌna min kalꞌbbohan,
pinaluwas aku min lowang kapisakan.
Pinatꞌngge aku ma batu, pinahogot patꞌnggehanku.
3 Aniyaꞌ kalangan bahaꞌu pamakalangna ma aku,
kalangan pamudji Tuhantam.
Aheka aꞌa magmatāw pagꞌndaꞌna ma pakaradjaꞌan itu,
ati angandol sigām ma si Yawe.
4 Aheya kahāpan ma sasuku apagon pangandolna ma PANGHŪꞌ,
ya mbal ameyaꞌ ma saga aꞌa magabbu-abbu,
atawa ma aꞌa ya magtaꞌat ma tuhan-tuhan puting!
5 O Yawe, Tuhanku, aheka hinangnu makainu-inu.
Mbal taitung saga kahāpan ya mohotnu ma kami.
Bang aku bay pasulay anuli-nuli kamemon,
mbal takoleꞌ sinuli-suli pagga kumarukan hekana.
6 Nggaꞌi ka tutukbalan maka tapung ya pagmatayannu,
nggaꞌi ka susumbaliꞌan tinunuꞌ,
nggaꞌi ka tataubatan dusa ya kagunahannu.
Saguwāꞌ tinꞌbbok eꞌnu taingaku, hatina pinakale aku.
7 Magtūy aku ahꞌlling, yukku, “Itiyaꞌ aku, sakap aku,
buwat tasulat ma Kitab ma pasalanku.
8 O Tuhanku, ahutu aku angahinang kabayaꞌannu.
Itiyaꞌ ma aku saraꞌnu, ma deyom pangatayanku.”
9 Bay pasaplagku kabontol pangahandak si Yawe ma palhimpunan aheya.
Kataꞌuwannu asal, PANGHŪꞌ, halam bay tambolku bowaꞌku.
10 Mbal tahananku ma atay kabontolnu,
ahꞌlling na paꞌin aku pasal kapangandolannu maka kalappasnu.
Halam bay limbunganku kasi-lasanu maka kabꞌnnalnu,
gom paꞌin pagnasihatku ma palhimpunan aheya.
11 Ya PANGHŪꞌ, daꞌa paꞌin kaꞌllogin aseꞌnu ma aku.
Hampanin aku sakahabaꞌ waktu maka lasanu kakkal, maka kabꞌnnalannu.
12 Sabab itiyaꞌ aku tꞌkkahan susa-manusa ya mbal taitung
itiyaꞌ aku kapilahan eꞌ baꞌanan dusaku.
Palabi hekana min heka lamba buꞌunku,
angkan aku mbal na makaꞌndaꞌ pahāp,
angahimāt pangatayanku pagka halam aniyaꞌ pangasa.
13 O PANGHŪꞌ, bang paꞌin aku lappasnu,
O Yawe, bang paꞌin ka pasaꞌut anulung!
14 Bang paꞌin pinahinaꞌ maka pinaligotoꞌ eꞌnu
saga aꞌa kamemon ya anganiyat amapatay aku.
Bang paꞌin hawirannu saga aꞌa bilahi angamula aku,
bang paꞌin sigām tahinang pagtunggīngan.
15 Saga aꞌa isab ya bay anittowahan aku,
bang paꞌin sigām kapamꞌngngangan ma sabab iyaꞌ sigām.
16 Saguwāꞌ saga aꞌa ya angaholat ma kaꞌa, Tuhan,
bang paꞌin sigām kinōgan maka kaꞌamuhan ma kaꞌa.
Sasuku kasulutan ma kakosog panglappasnu,
subay anabbut sararan-daran:
“Akawasa si Yawe! Akawasa si Yawe!”
17 Maka aku itu, minsan kamiskinan maka kasigpitan,
kinannal isab aku heꞌ PANGHŪꞌ.
O Tuhan, kaꞌa ya Mananabang maka Manglalappas ma aku,
Pasaꞌut ka konoꞌ.