37
Kalangan 37
Kalangan si Daꞌud
1 Daꞌa kahanggawinbi saga aꞌa jahulakaꞌ,
daꞌa isab pangihirinbi saga aꞌa maghinang kalaꞌatan!
2 Sapantun sigām parang-parang alꞌkkas alanos,
sapantun dahun akꞌllos magdaiꞌ-daiꞌ.
3 Angandol sadja kam ma PANGHŪꞌ-Yawe,
hinangunbi kahāpan.
Patꞌnnaꞌ kam ma lahatbi porol,
patꞌnnaꞌ kam ma deyom kasannangan.
4 Paglasiginbi PANGHŪꞌ
ati kabuwanan kam ai-ai ya makasulut pangatayanbi.
5 Pamaꞌandolunbi kahālanbi ni PANGHŪꞌ,
pasangdolinbi iya, ati tahinang eꞌna ya amuꞌbi.
6 Pinabukis heꞌna kaꞌadilanbi,
sapantun sawa ya pabukis daiꞌ-llaw,
pinasaplag kabontol palkalaꞌbi,
sapantun sinag llaw bang augtu.
7 Patꞌmmun kam ma alopan si Yawe, lagarinbi iya.
Daꞌa kam asusa bang auntung saga aꞌa kaseheꞌan,
bang tahinang kagaraꞌan sigām ajahallis.
8 Daꞌa kam angastol! Daꞌa kam angamahit!
Daꞌa papasuꞌun ataybi, tantu alaꞌat katꞌkkahanna.
9 Sabab pinahalam saga aꞌa alaꞌat kajarihanna,
saguwāꞌ sasuku angasa ma PANGHŪꞌ pinusakaꞌan lahat itu.
10 Mbal atꞌggol, pahalam saga aꞌa alaꞌat itu.
Minsan painay eꞌbi amiha, mbal tabāk.
11 Sagōꞌ saga aꞌa areyoꞌ pangatayanna pinasukuꞌan lahat itu,
ati halam aniyaꞌ makasasaw kasannangan sigām.
12 Binantuhan aꞌa ahāp atayna heꞌ aꞌa jahulakaꞌ.
Angꞌttop leꞌe saga aꞌa inān, tandaꞌ sin kabꞌnsi sigām ma aꞌa ahāp.
13 Malaingkan pinagtittowahan heꞌ PANGHŪꞌ saga aꞌa jahulakaꞌ,
sabab kataꞌuwanna aniyaꞌ llaw panganggantaꞌ ma sigām.
14 Angahublut kalis saga aꞌa jahulakaꞌ,
anakap baꞌugan panaꞌ sigām,
boꞌ tapanaꞌ eꞌ sigām saga aꞌa kamiskinan maka kasigpitan.
Ya maksud sigām amapatay saga aꞌa abontol atayna.
15 Saguwāꞌ papelleng kalis inān angandugsuꞌ jantung sigām,
pinagpōng-pōng isab saga baꞌugan panaꞌ sigām.
16 Minsan akulang ai-ai ya palsukuꞌan ma saga aꞌa abontol,
labi ahalgaꞌ koꞌ inān min altaꞌ manglabi-labihan
ya palsukuꞌan saga aꞌa alaꞌat.
17 Sabab pahalam ya gaꞌosan saga aꞌa jahulakaꞌ,
sagōꞌ angandapit PANGHŪꞌ-Yawe ma saga aꞌa abontol palangayna.
18 Niayuput eꞌ si Yawe kallum sasuku mbal katōngan dusa
ati anatas pusakaꞌ sigām sampay ni kasaumulan.
19 Mbal sigām aiyaꞌ bang tꞌkkahan kasigpitan.
Minsan ma waktu gotom, makaꞌssohan kinakan sigām.
20 Malaingkan saga aꞌa jahulakaꞌ magkaꞌat lullun.
Palanyap saga palbantahan PANGHŪꞌ, ibarat humbu.
Ibarat sigām kalingkat sumping ya patomoꞌ ma deya,
daiꞌ-daiꞌ du palanos boꞌ halam na.
21 Angutang saga aꞌa alaꞌat sagōꞌ mbal amayad.
Saguwāꞌ saga aꞌa ahāp magmura sadja,
22 sabab sai-sai kabuwanan pahalaꞌ heꞌ PANGHŪꞌ
pinusakaꞌan lahat itu.
Saguwāꞌ sai-sai sinapdahan eꞌ PANGHŪꞌ, tantu magmula.
23 Bang kasulutan PANGHŪꞌ ma kaul-piꞌil aꞌa,
pinatotog eꞌna tekangna.
24 Minsan iya makarugtul, mbal tabowa pahantak,
sabab PANGHŪꞌ-Yawe ya amalutan tanganna.
25 Min kaondeꞌ-ondeꞌku sampay ni katoꞌaku itu,
halam aniyaꞌ aꞌa abontol bay taꞌndaꞌku pinasagaran heꞌ Tuhan.
Halam isab taꞌndaꞌku anak aꞌa inān tabowa angamuꞌ kinakan.
26 Magmura sadja sigām amuwan maka amautang,
angkan pinaniyaꞌan pahalaꞌ saga anak sigām eꞌ.
27 Angkan yukku, pataikut kam min kalaꞌatan boꞌ patukid ma kahāpan,
ati taptap kam patꞌnnaꞌ ma lahatbi porol.
28 Angkan buwattēꞌ, sabab kasulutan PANGHŪꞌ ma aꞌa angahinang kabontolan.
Mbal palehomna saga aꞌa ya atukid angisbat iya.
Nihampanan eꞌna saga aꞌa sukuꞌna sampay ni kasaumulan,
saguwāꞌ binꞌkkat eꞌna napas saga aꞌa maghinang kalaꞌatan.
29 Pamusakaꞌ ma aꞌa ahāp ya lahat sigām porol,
ati maglahat sigām mainaꞌan salama-lama tahun.
30 Bang aꞌa asussi pangatayanna, amissala iya pangitaꞌu,
abontol maka asaltun himumūnganna.
31 Inaꞌan ma deyom atayna saraꞌ-manaraꞌ min Tuhanna,
angkan mbal parasdas tapeꞌna.
32 Tinipu saga aꞌa ahāp palangayna heꞌ aꞌa alaꞌat,
sabab angamohot amapatay,
33 saguwāꞌ mbal pinasagaran heꞌ si Yawe saga aꞌana ginaꞌos heꞌ aꞌa jahulakaꞌ.
Bang sigām pinaharap ni huwis, mbal tugutanna sigām taluwaꞌ hukuman.
34 Pangaholatinbi PANGHŪꞌ, bogboginbi panohoꞌanna
ati pinalanga kam boꞌ pinusakaꞌan lahatbi porol.
Song isab taꞌndaꞌbi saga aꞌa jahulakaꞌ pinahalam.
35 Aniyaꞌ bay taꞌndaꞌku aꞌa landuꞌ ajahat maka abigsiꞌ,
ahāp sadja kahālanna, sapantun kayu alabung dahunna,
ya patomoꞌ ma tanaꞌ bay asal patomoꞌanna.
36 Sagōꞌ daꞌa ka pilangꞌllaw paglabayku minnēꞌ, na halam na.
Minsan painay heꞌku amiha iya, halam toꞌongan tabākku.
37 Kira-kirahunbi aꞌa halam dusahan, pangliꞌunbi aꞌa abontol palangayna,
sabab ahāp kasōngan ma saga aꞌa mbal bilahi maglugat.
38 Saguwāꞌ tantu pinakaꞌat kamemon saga baldusa,
halam aniyaꞌ kasōngan aꞌa maghinang kalaꞌatan.
39 Lappasan sasuku asussi pangatayanna, sabab min PANGHŪꞌ,
ya sapantun kutaꞌ pasindungan aꞌana bang tꞌkkahan balaꞌ.
40 Tinabang sigām eꞌ si Yawe, pinuwas eꞌna min kasigpitan.
Niliyus sigām eꞌna min gaꞌosan saga aꞌa jahallis,
nilappas isab sigām sabab Tuhan iya pangandolan.