27
Kalangan 27
Kalangan si Daꞌud
1 Si Yawe ya amuwanan aku kasawahan maka kalappasan,
angkan halam aniyaꞌ katāwanku.
PANGHŪꞌ-Yawe ya sapantun kutaꞌ pangahampan kallumku,
angkan halam aniyaꞌ kagawahanku.
2 Bang aku sinekot eꞌ aꞌa jahallis,
ya bilahi angamula baranku,
bang aku nirugpak eꞌ baꞌanan bantaku,
tantu sigām makarugtul, makahantak.
3 Minsan aku nilikusan heꞌ tumpukan baꞌanan sundalu,
mbal kinꞌbba-kꞌbba atayku.
Minsan aku tꞌkkahan pagbonoꞌ,
ahantap na paꞌin pangatayanku.
4 Luwal itu ya pangamuꞌku ni PANGHŪꞌ-Yawe,
luwal itu ya pagmatayanku,
bang paꞌin aku paokom ma lumaꞌ Tuhan
satꞌggolku allum ma babaw dunya itu.
Landuꞌ aku bilahi angꞌndaꞌ ma kahāp palantarana,
maka angaruhan iya ma lumaꞌna pangarapan.
5 Angkan buwattēꞌ, sabab tinampanan aku heꞌna
ma waktu katumbuk kasusahan.
Pinakutaꞌan aku eꞌna ma pussuk batu-lakit,
tinapukan aku sakuli-kuli ma lumaꞌ pagtataꞌatan ni iya.
6 Minnēꞌ aku angandaꞌug min palbantahanku,
pinalanga aku min saga banta ma katilibutku.
Tukbalanku pagkulban ni PANGHŪꞌ-Yawe
ma langgal ya pangarapan iya,
hinabuku angolang kabowa kakōganku.
Angalang isab aku, pagpudjiku PANGHŪꞌ.
7 O PANGHŪꞌ, kalehun lagiꞌ panganjunjungku,
kaꞌaseꞌin aku, sambungin aku.
8 Ahꞌllingan aku di-ku, “Panuyuꞌin si Yawe.”
Jari patuyuꞌ aku ma kaꞌa, O PANGHŪꞌ.
9 Daꞌa konoꞌ ka pataikut min aku sabab sosohoꞌannu aku.
Daꞌa paꞌin akagit ataynu, daꞌa aku taikutin,
sabab kaꞌa ya pananabang ma aku.
Daꞌa aku palehomun, daꞌa aku bbahin,
sabab kaꞌa ya Tuhanku Manglalappas.
10 Abila aku siniya-siya heꞌ inaꞌ-mmaꞌku,
tantu aku tinaimaꞌ eꞌ PANGHŪꞌ.
11 Ya, PANGHŪꞌ, panduꞌin aku lānnu, ya amowa ni kahāpan.
Malimin aku ma lān abontol,
sabab aheka aꞌa angangut angalaꞌat aku.
12 Daꞌa aku pasagarin pinagbayaꞌan eꞌ saga kuntaraku,
sabab aniyaꞌ aꞌa anunaꞌan aku kaputingan.
Ya kabꞌngngis sigām mbal kaliyuhan.
13 Saguwāꞌ minsan buwattēꞌ, aniyaꞌ kaholatanku tuman.
Tantu aku makabāk kahāpan min si Yawe,
hinabuku lagiꞌ ma dunya dakayuꞌ itu.
14 Angkan yukku, “Pangasahin si Yawe.
Pahogotunbi imanbi, pataptapunbi pangatayanbi,
pangaholatinbi PANGHŪꞌ-Yawe.”