19
Kalangan 19
Kalangan si Daꞌud
1 Atanyag sanglit-sahaya Tuhan
ma sabab paltandaꞌan ya taꞌndaꞌta ma bꞌttong langit.
Abantug kapandayan Tuhan
ma sabab saga pandoga ma tongaꞌan ayan.
2 Kahabaꞌ-kahabaꞌ llaw binuwanan kitam lapal,
kahabaꞌ-kahabaꞌ sangom binuwanan kitam panghati.
3 In bituꞌun maka llaw itu taꞌndaꞌ asal ma sabarang lahat,
paꞌabut lapal sigām ni kalibutan dunya.
4-5 Pasaplag panduꞌ sigām ni kamemon bangsa,
Pasampay bissala sigām ni mpat pidju alam.
In mata llaw saliꞌ sapantun lꞌlla pangantin
bay nihinangan lumaꞌ eꞌ Tuhan ma langit, tampal ni sobangan.
Ati paluwas iya minnēꞌ buwat aꞌa bastigan
ya kinōgan magdagan ma paglombaꞌan.
6 Pasobang mata llaw min bihing langit dakayuꞌ
boꞌ pasꞌddop ni bihingna dakayuꞌ,
maka halam aniyaꞌ minsan ai mbal taluwaꞌ pasuꞌna.
7 Ajukup asal saraꞌ bay pinatꞌnnaꞌ eꞌ si Yawe,
ya na saraꞌ makahayang palnyawahan manusiyaꞌ.
Kapangandolan ai-ai pangahatul eꞌ si Yawe,
ya na hatulan pangāꞌan pangitaꞌu eꞌ aꞌa bilahi pinanduꞌan.
8 Abontol saga pamanduꞌ si Yawe,
ya na panduꞌ makalasig deyom pikilan.
Asawa panohoꞌan si Yawe,
ya na panohoꞌan makarantaꞌ panghati manusiyaꞌ.
9 Asussi pagmatāw ma si Yawe,
sabab taptap anatas ni kasaumulan.
Atuman kamemon pangahandak si Yawe,
aꞌadil lullun, halam aniyaꞌ sallaꞌna minsan ai.
10 Labi ahalgaꞌ pangahandakna min bulawan,
minsan bulawan porol landuꞌ aheka.
Labi amamis min gulaꞌ buwani
minsan gulaꞌ masi amꞌttak min sāng buwani.
11 Binandaꞌan sosohoꞌannu eꞌ ai-ai pangahandaknu,
maka aheya tungbas ma sasuku angisbat.
12 Sai bahāꞌ makakilā kasāꞌan baranna?
Bang manjari ampunin aku ya dusa halam tasayuku.
13 Hawirin aku boꞌ mbal magtuꞌud angandusa.
Daꞌa aku pasagarin pinagbayaꞌan eꞌ dusa pagtuꞌud-tuꞌuran.
Jari mbal aku katōngan dusa,
ati abontol itikadku pagka halam bay makahinang dusa aheya.
14 Ya PANGHŪꞌ, bang paꞌin ka kasulutan ma bissalaku maka ma honaꞌ-honaꞌku,
sabab kaꞌa ya batu-lakit pamalutanku,
kaꞌa ya Manglalappas ma aku.