16
Kalangan 16
Kalangan si Daꞌud
1 Ya Tuhan, hampanin aku,
sabab kaꞌa ya patapukanku.
2 Yukku ni si Yawe, “Kaꞌa ya Panghūꞌku,
Halam aniyaꞌ palsukuꞌanku ahāp saddī min kaꞌa.”
3 Babantugun saga aꞌa ma lahat itu,
ya atotog ameyaꞌ ma kabayaꞌan Tuhan.
Landuꞌ aku kasulutan ma sigām.
4 Malaingkan bang aꞌa ameyaꞌ ma tuhan-tuhan saddī,
pakꞌnnop na paꞌin kasusahan sigām.
Mbal aku palamud ma aꞌa inān anukbal lahaꞌ,
mbal minsan sibahatku ōn saga pagtuhanan sigām.
5 Kaꞌa PANGHŪꞌ, sapantun pusakaꞌku,
Kaꞌa ya palsukuꞌanku,
ahāp kasōngan ya panganggantaꞌnu ma aku.
6 Kabuwanan aku tanaꞌ ma lahat kasalamatan,
landuꞌ ahāp ya pamusakaꞌnu aku.
7 Sanglitanku si Yawe ya angahūgan aku garaꞌ.
Minsan ma waktu sangom, kapanduꞌan aku
luwas min panduꞌ ya ma deyom pangatayanku.
8 Si Yawe ya pataptap ma pangatayanku.
Itiyaꞌ iya ma bihingku,
angkan aku mbal tabowa pajudjal.
9 Magkōg-koyag aku sampay min deyom atay,
asalamat pamarananku,
10 sabab mbal aku siya-siyanu ma deyom ahirat.
Mbal aku pasagarannu angahaluꞌ ma deyom paliyangan.
11 Tantu aku tuliꞌannu lān ya amowa ni kallum.
Sinōd aku kōg-koyag ma sabab kamaitunu ma aku,
kahōpan aku eꞌ kalasigan ya anatas ni kasaumulan
bang taꞌabutku na haddaratnu.