8
Kalangan 8
Kalangan si Daꞌud
1 O Yawe, kaꞌa pagpanghūꞌan kami,
kaheya du paꞌin mahaltabatnu ma kaluhaꞌan dunya!
Alanga sahayanu min kapituꞌ lapis langit.
2 Min kahandaknu saga kamanahutan amudji ōnnu,
saga anak duruꞌan lagiꞌ ananglitan kaꞌa.
Angkan mbal makaꞌatu saga palbantahan,
mbal makatukas saga magbabalos.
3 Ya PANGHŪꞌ, bang aku pahangad ni langit
boꞌ angira-ngira kahinangan tangannu,
bang ndaꞌku bulan maka saga bituꞌun
ya bay patꞌnnaꞌnu ma bꞌttong langit,
4 tabowa aku atilaw pasal kami manusiyaꞌ.
Ai kapūsan kami angkan kami pagkaꞌinagonannu?
Angay kannalnu bangsa manusiyaꞌ ya mbal anatas itu?
5 Patꞌnnaꞌnu kami areyoꞌ dangkuriꞌ min saga bangsa malaꞌikat ya porol ma sulgaꞌ.
Buwanannu kami kasanglitan maka kabantugan.
6 Buwanannu kami kapatut magbayaꞌ
ma kamemon ai-ai bay paniyaꞌnu,
boꞌ kami makapagnakuraꞌ ma kamemon papanjarihan,
7 saga sapiꞌ maka saga bili-bili, hayop niꞌipat,
maka saga sattuwa talun.
8 Makapagagi kami ma saga manuk-manuk,
maka ma kaginisan daing tahik maka sattuwa dilaut.
9 O Yawe, ya pagpanghūꞌan kami,
kaheya du paꞌin mahaltabatnu ma kaluhaꞌan dunya!