Yudas
wasi atyahy ikeskye
Yudas wasi tun mamuna ti atyahy ikeskye
1 Waikw o hatnimakw e, kkwesy atyahy ne ti e, neke ti iry a Hulasokwe iilik a e de, ma wasi iry a e ne. Ity Amat Hulasokwe lyobak e, ode ijaga mamak a e nini Yesus Kristuske ana yulak I mai nuske ktem ne huruk.
Yau neke Yudas,† ma kuka at ti Yesus Kristuske. Ode yau ne dakun o Yakobus wai amury elik yaw. 2 Lemade kuten ma lemamo Hulasokwe syusu rala eraske ti e, ode yal wasi inaka eraske ti e, ode syusu wasi loblobakke ti e, ma kyaki-kyaki ne nam desikre mumu ne mausw ti e a ksyalik.
Snuratke ma tajaga mamak ity ti tuanggurw maajar nam a lema mlaire
3 *Waikw o hatnimakw kulobak e, khyehyei neke ralakkwe krala ne kbyuma kkwesy atyahkye it ti e, ma klwosu ti e ohe, kolkyabei ti Hulasokwe iaorif a taktemtem mumu ne. Keskyede krwekan huruk ti ralakkwe kralake ohe, musti mo kkwesy atyahy a ida ne a kmuna ti e, ma kswurat a e, ma mires ma mimdiry ma mbyelat eta Hulasokwe tunanare. Kali Hulasokwe yal tuna desikre klatsasam bo, ma kyal nini nam ti kiba knaru ne, ti wasi iry a ity ne de. 4 Ktwanuk koldyesy kali irire dum a rsukar kakakan ei wen miwahuk e tike, ode rala tenat nekre kola tuanggurw mlay nekre, keskye rajar nam a lema mlaire ti e. Iry desikre sir ne lema rabuma ratoha nam a Hulasokwe iajarare ne. Ode rulak de rtalik e ti nam a mlay a Hulasokwe iajarare. Neke rakakmet ma rajar ohe, khyali Hulasokwe syusu rala eraske ma ity de, dendye ity neke bisa ma tala ktela atyat sai ta sai bo, ma ktyoha ity wait dakdyakinare. Keskyede heitlulswo Kitab Lanke klyosu deny ohe, ana Hulasokwe yukun tuanggurw desikre, kali iry desikre sir ne rabu a ratuli ity Ebut Yesus Kristus Amam Lan Lahuk sasasam ne.
5 *Lemade waikw o hatnimakw e, kbwuma minenenas ohe, heitlulswo ity Ebutke yaorif iry a Israel-are mumu ma rbetik toha Mesir de, keskyede kalyauke bonyo, ti sir mumu ne ity Ebutke ihnutuk iry a lema matohak ti Iare ma rmaty mumu. Biar ma khwe ohe, ei neke mhye nam nekre mumu de, keskye ktwanuk ti e ma minenenas huruk. 6 Kola ne Hulasokwe yukun wasi nyaso manosy laitare dum dakun. Ma heitlulswo Hulasokwe yal haretke ti sir ma rhareta ti wenatare, keskye lema rbuma rhareta ti wen desikre kyor wait haret a Hulasokwe inal ti sir ne, kali rbetik toha wen sra eraske de, neke wenat a Hulasokwe iaso sir ma rahareta ti ne. Dendye Hulasokwe yaso ma rdalun nyaso desikre a kyor rante hnutanke, ma lema bisa ma kdyohut toha sir elik, ti kiba knaru ne ti wen a kelerakokke a ksyalik ne, nini rakita sew a nuske ktem ne ana kilodur ne, ti kyoat Hulasokwe yukun nuske ktem ne mumu ne. 7 *Ode kbwuma ei neke mnyenas a ktela heitlulswo madi ti nus Sodomke kyor a nus Gomorake, ktyabal nus o hnu maney a nus deru desy dakun. Neke iry mamin ti nus o hnu desikre rola ne Hulasokwe wasi nyaso manosy lait mabetik toha wen sra eraske ne, kali iry desikre lema rbuma rtoha Hulasokwe wasi haretke dakun. De rdakin ma wamfwetare ror wamwanire it de hyury a it koi-kay ma rala ktela atyat nekre, ode lema rbuma rtoha ktela kyalamo irkye ialanare dakun, de rbuma wamwankye syay a wamwankye. Ktela raala desikre khyury ma Hulasokwe yal akye, ode belerangke, ma yal ma ihnutuk wait nus o hnu desikre ma ktei bakbakbakar. Hulasokwe yala koldyesy ma kyeluk nyatos ti irire mumu ti nuske ktem ne, ma rhe ohe ana yukun sir, neke yotuk sir ei ay a malehur manal nini namke kralake.
8 Ode koldyesy dakun ti tuanggurw lema mlay desikre, neke rma ma rait a e ti wen miwahuk e tike, ma rajar nam a lema mlaire ode rala ktela atyatare. Iry nekre sir ne rakakmet a e ma rbohe, rmey ohe Hulasokwe mya ma lyosu ti sir ma byohe, you wait ktela atyat raala ma kiaraik tenatare ne, dendye bisa ma rala ktela atyat sai ta sai bo, ma ktyoha wait dakdyakinare. Iry nekre sir ne lema rou ma rtomolu Hulasokwe wasi haretare, ode sir ne dakun o rahmwai Hulasokwe wasi nyaso madelaf manosy lait nekre. 9 *Keskye Mikhael a nyaso manosy laitare wait uskwe khatuke lema yala koldyesy. Kali biar ma Mikhael ne ika usu khatu, keskye lema ires ma yal wasi haretke ma tyanuk soru tun inahmwainare, ma yal ma ihmwai ngkeskwaure wait uskwe khatuke, ti kyoat deruke rataur nunu khyali Musa tbunanke o, ana esei ne inal ne. De Mikhael neke cuma mo tyanuk ti ngkeskwaure wait uskwe khatu desy ma byohe, “Desikemo ana Hulasokwe myesan a tyerik a o bo.” 10 Keskye tuanggurw makakmet desikre rahmwai nam sai ta sai a lema rahe kbuanare ne. Ode rala wait ktela koi-kay nekre ma ktyoha rabuare bo, ma rola ne asw o hahy nekre ma lema rhe nam raalanare. Koldyesike mane nam raala desikre ne ana kihnutuk a sir ne.
11 *Dendye atyatke kidurak iry desikre! Kali rala ktela atyatare ma kola heitlulswo Kain wasi ktela atyat ialanare.† Ode sir desike ralurw ma rtoha sal atyatke kola Bileam, kali rulak de rtalik irire, ma robak ma adoko ratot kuban. Dendye sir neke ana Hulasokwe ihnutuk sir kola ihnutuk Korah ne, kali rsorw a Hulasokwe kola ne heitlulswo Korah isorw a Hulasokwe dakun ne.
12 Ode kolnye miwahuk e ma miknam o myenw ma myal ma mnyenas Hulasokwe wasi loblobakke ti e, desikeo iry desikre rma dakun ma raknam a ror e, keskye wait ktela atyat raalanare ana kyaraik wasimy inaknam desy. Sir desike lema rmay rhe, de raknam lan, ode lema rrekan iry salik, de rrekan tenatare kmyesan bo. Iry desikre lema raka kbuan ti e, de rola ne oan metmetke ma lema kyoras, de eskwe kisiri ba bony ne. Ode rola ne aw a lema maka kisi ti kyoat lemanke ne, kali kola ne kihmua i ma kimaty elik ne. 13 Iry desikre dakun o rola dene oyoitare ti tasike, ti kioit ray ribunke ei namwatake khahake ne, ma ksyusu totnyo yabit atyat a manety inaka mamway nekre. Ode sir desike ra-la toha sal a mlakye de, kola ne ftun a maaditi sir toha wenatare ne. Dendye ana Hulasokwe tyutuk wen kelerakok a ksyalik ne ti sir, ti kiba knaru ne.
14 *Ode mnyenas nam a Henokh itanukke. Henokh neke, kolnye raki rosy Adam, desyo Adam tesnwo natu itkwe i ne, ma heitlulswo Henokh neke i ne ilosu nyano manosy a Hulasokwe ti khyali iry desikre ne. Ma Henokh tyanuk ma byohe, “Mtyomolu mamak nam kutanuk ne, ity Ebutke ana mya elik ma yor wasi nyaso nelnyely ribun lan ne toha laitke, 15 ma yukun tun ti iry mamin ti nuske ktem ne mumu. Ode ana yukun iry a lema rabuma ratoha nam a Hulasokwe iajarare mumu ne, ti khyali totnyo yabit atyat raalanare, ode khyali tun inahmwai a iry maaka wait lim o sal desikre ratanuk ma ranal ma rahmwai ity Ebutke ne.” 16 Iry desikre kyalamo rarwen a ksyalik ti wait mormyorifare, ode rdakin ma robak sal ti iry salik. Ode ramorif neke rlakut ma rtoha wait dakdyakin atyatare bo, ode rbitil tenatare ma atat ma ratun bakbak, ode rleru irire kyor tun a mtelasare ma robak untungke.
Snuratke ma talkyaw ity wait tohtohakke bain-bain ti ity Ebut Yesus Kristuske
17 Keskye waikw o hatnimakw a kulobak e, musti mo mnyenas ti tun a ain maba sokre ity Ebut Yesus Kristuske wasi nyasoare ratanuk desikre ti ana kidi ti ne. 18 *Neke rtanuk ti e ma rbohe, “Ana kyala ma kyait sekwe ma nuske ktem ne klyodur, desikeo ana irire dum a rma ma rtanuk tun inahmwai iare ma ral ma rahmwai ity Ebutke yor wasi irire. Iry nekre ramorif neke rbuma rlakut ma rtoha wait dakdyakin atyatare kmyesan bo, de lema rbuma rtomolu Hulasokwe.” 19 Tun a nyasoare ratanuk desikre ksyusu ti tuanggurw makakmet desikre, ma sir ne rabohe wait nam raajarare mlay ne, ma khyury ma iry matohak ti Hulasokwe ne misali e ma mihe e ti luike enai ne. Keskye Hulasokwe Memeanke lema kimin ti iry desikre, dendye ramorif ne rtoha iry mamin ti nuske ktem ne wait dakdyakin rabuare bo.
20 Keskye waikw o hatnimakw kulobak e, musti mo myalkyaw wasimy tohtohakke ti Yesus Kristuske, kali Hulasokwe tuna mlay mitohak desikre nelnyely ksyalik. Ode kolnye msyambayan mo, miten Hulasokwe Memeanke ma kkyarya ti ralamy kralanare, ma myal ma msyambayan. 21 Kali kolnye kyaki-kyaki ne myala ktela deru desy, desikeo kyaki-kyaki ne mimin ti Hulasokwe wasi loblobakke ma desy, ma mikita ity Ebut Yesus Kristuske rala eras isusu ti e desy, ti kyoat inal mormyorif manal nini namke ti e ti kiba knaru ne.
22 Ode kolnye iry matohakare dum a ralatare kakan a nggora ti wait tohtohakare, desikemo ei ne musti mo mlyobak sir, ode msyaluk sir. 23 Ode iry a rabuma ratoha tuanggurw maajar nam a lema mlay desikre, musti mo msyaluk sir ma myaorif a sir toha nam lema mlay desikre, kola ne myaditi sir toha akye ma desy. Ode ti iry matohak a e ne kolnye dum a rdi e lim o sal, desikeo musti mo mlyobak sir ode msyaluk sir ma kete rala lim o sal de. Keskye mijaga mamak a e dakun ma kete mtyoha wait lim o sal raala desikre, de musti mo msyusu ralamy erasare ti sir, klala soso e toha wait lim o sal raala desikre, ma kete kyal nini kdyaul a e dakun ma kyaraik tenamire.
Yudas kyus wasi atyahkye
24 Waikw o hatnimakw e, mmya ma tleru Hulasokwe Anike! I neke myesan a wasi haretke ma ijaga e ma kete mdyi ei lim o sal. Ode I ne isos wasimy lim o sal ba ne, ma lema mika wasimy lim o sal tebibikan elik ma nelnyely a e ti Hulasokwe, ti kyoat yeuk e ma ti mimdiry ma msyara I ti wasi madelafke, desikeo ralamire kimukmuka kimarmara i a ksyalik. 25 Lemadendye mmya ma tleru o tbitil Hulasokwe Anike, kali Hulasow neke sasasam I bo, ma I ne iaorif a ity ne, neke khyali ity Ebut Yesus Kristus a tatohak ti I ne. Mmya ma tleru o tbitil Hulasokwe Anike, kali kyala kyosy nuske ktem ne lenla kimin, ma kmya ma kyait senwe, ma ti kiba knaru ne, wasi madelafke lan a ksyalik, ode Lan Lahuk a I, ode malkyakaw a I, ode wasi haretke lan ma hyareta. Amin!
Teike desy de.