Nus lan Babelke klyily ma kiskyui-kiskyay
18
Kyoat desike katos nyasoke it ma yorw yosy wen sra eraske.
Nyaso desike wasi haretke lan,
ode wasi madelahke kdyelah lasmyerke khaha ne mumu.
2 *Ode yatela ti nuske ktem ne ma byohe,
“Babel nus lan desike klyily ma kiskyui-kiskyay de!
Babel nus lan desike klyily ma kiskyui-kiskyay de!
Ma senweke ngkeskwaw salno salik nekre ramin ti de.
Ode manu salno salik maray a kyalamo irire ramnyeku nekre ramin ti dakun de.
3 *Kali nus lan Babel ne,
neke wamfwet atyatke i desy.
Ma bangsa nekre mumu ne rala ktela atyatare kola ktela wamfwet atyat desy ialanare,
ma kola ne raenw wamfwet atyat desy hina tasy maiskye kwen makitkye de.
Ode wamfwet atyat desike hyury a raja mamin ti lasmyerke khaha ne mumu ma rtoha i,
ma rala ktela atyatare kola i dakun de.
Ode wamfwet atyat desike kyoman o lenla knyal i ti nam mamin ti iare,
dendye kyaki-kyaki ne lyiw a nam ribunke toha iry a maketa nam ti lasmyerke khaha nekre.
Ma khyury ma iry a maketa nam nekre wait malolire ktyabal ma lan a ksyalik.”
4 *Maktei o ktwomolu teltelke it huruk,
ma kyosy wen sra eraske ma kbyohe,
“Iry matohak ma Yaw e,
mbyetik toha nus lan Babel desy!
Ma kete kyal nini msyeak toha iry mamin ti nus lan Babel desikre,
ma myala ktela atyat maola raala desikre.
Kali kolnye myala koldyesy,
desikeo ana Hulasokwe yukun e a myor sir.
5 *Kali iry mamin ti nus lan Babel desike,
wait lim o sal nekre kiutun-kiutun i,
nini kyait laitke de.
Ode Hulasokwe lema imluak wait ktela atyat raala desikre mumu.
6 *Lemamo kaso wasikw nyaso manosy lait e ne,
ma mbya ti myala sir ma atyatke kdyan sir,
kola ne raala irire ma atyatke kidan sir dakun ne.
Ode myoil wait ktela atyat raala desikre ti sir,
neke kdi a kla-ru o kbyilak dakun,
ma ktyoha ktela atyat raala desikre.
Ode mihora nam mew o mlara nekre ti takwe ma renw.
Ma nam mew o mlara mihora desikre,
mihora mo kdedake kdi a kla-ru o kbyilak,
ti nam mew o mlara rahora ma ranal ti irire ma raenw ne.
7 *Maktei o myala masunkwe ma kdyan sir,
ma kdeda wait a ktela rabitil tenatare ma atat ne,
ode kdeda ramorif mo ratoha nuske ktem ne wasi kersanke ne.
Kali nus lan Babel rabohe wamfwet atyat desike,
byitil tenanke ma atat,
ma tyanuk ti ralake kralake ma byohe,
‘Yaw neke khwareta,
kali ratu yaw.
Ode yaw ne lema kola enen somare.
Ode ralakkwe lema kitol ti namit-namit dakun.’
8 Kali nus lan Babelke rtanuk koldyesy,
lemadendye ana ti sew sasamke bo,
desikeo masunkwe kdyan sir o ksunw ksyalik.
Neke ana kbainare kena sir,
ode ana lu o lar ti sir,
ode ana ral matolke kena sir,
ode nus lan Babel desike ana akye knya ma ktei dakun.
Kali Ebukw Hulasow a maukun sir neke,
wasi haretke lan.”
9 *Ode raja mamin ti lasmyerke khaha ne,
neke raja maala ktela atyatare ror iry mamin nus lan Babel desy,
ode sir ne ramorif ti nus lan desy wasi maloly lan desy,
neke ana rmatakit ay masorw a nus lan Babel desy kduduhanke ma ksyai ei srake,
desikeo ralatare kitol a nus desy,
ode rser ma ralatare kisalsal ti raseak nus desike ne.
10 Ode raja desikre ana ramdiry ma sososo a sir bo,
kali ramtaut ma ratos a masunw mdedan maoly ne ti kidan nus lan ne.
Lemade rtanuk ma rbohe,
“Edo!
Atyatke kdyan sir de!
Atyatke kdyan nus lan Babel kiba tantyany desy de.
Kali Hulasokwe yukun sir de,
ma nus lan desike kyala mait bonyo,
lema kimin de.”
11 *Ode maketa nam mamin ti lasmyerke khaha neke ralatare kitol,
ode rsera nus lan Babel desy dakun,
kali ana lema kika iry ma rma ma rliw a wait nam raketanare de.
12 *Kali iry mamin nus lan Babel desike,
sir ne kyalamo raliw a iry maketa nam desikre lan o hnutat a manosy blyawan kunkuny o bokbok nekre,
ode hatw permatanare,
ktyabal hily nisitare,
ode tais khesi lanare,
neke tais lenan maliliure,
ode tais sutra-nare,
ode tais a kmata molmol ebusare,
ode tais a kmata mermerare.
Ktyabal nam raala toha aw mahon a mtelas nekre,
ode nam raala toha aw a khesi lan nekre,
ode nam raala toha lelire ne,†
ode nam raala toha solire ne,†
ode nam raala toha hnutanare ne,
ode nam raala toha hatw khesi lanke dakun,
neke marmerke.
13 Ode kyalamo rliw a aw kiblun a mtelas nekre,
ode aw khuna o kisi mahon a mtelas nekre,
ode murke,
ode nat a ratunw mo kduduhanke kihon a mtelaske,
ode tasy maiskye kwenke,
ode nul zaitunke,
ode teriguke,
ode gandumke,
ode saby o,
domba o,
kuda o kereta nekre,
ktyabal makaryaare dakun,
neke atare.
14 Lemade maketa nam desikre rtanuk ti nus lan Babel desy ma rbohe,
“Nam mubuma wasimw mumu desikre
lema kimin de.
Ode wasimw nam eras ribun lan desy,
lema kimin dakun de,
ma ana lema mutot de.”
15 *Ode iry a kyalake raketa nam ti nus lan desy,
ma malolitare lan ne,
neke ana ramdiry ma sososo a sir,
kali lema rbuma ratos nus lan desy elik ti kiskyui-kiskyay ne,
kali ramtaut ma kiseseman sir.
Ode rser kali ralatare kitol.
16 Lemade rtanuk ma rbohe,
“Edo!
Atyatke kdyan nus lan desy bain de!
Kyalamo rhonak tais lenan maliliure,
ode tais a kmata molmol ebusare,
ode tais a kmata mermerare.
Ode kyalamo rsamur sir a ror blyawan kunkunire,
ode hatw permatanare,
ktyabal hily nisitare.
*Keskyede kyala mait bonyo,
lanat ribun lan desikre lema kimin mumu de!”
17 Ode iry maka wait kabal ma raobak malolkye ne,
ror wait keb-are,
ode wait abeka-are,
rtabal iry mahnabul kabal desikre,
ramdiry ti kabal a khaha desikre ma sososo a sir dakun.
18 *Ode kyoat raatos ay masorw nus lan desy ma kduduhanke ksyai ei srake bonyo,
reik ma rbohe,
“Edo!
Lema kika nus salik ma kersanke kola nus lan desy de.”
19 Lemade rabur ahkwe ti usut a khatunare ma kyeluk nyatos ohe,
ralatare kitol.
Ode rser ma reik de reik ma rbohe,
“Edo!
Atyatke kdyan nus lan ne bain de!
Kali nus lan ne,
ne kiala ma ribun lan maka wait kabal nekre mumu ne,
raka wait maloly ne.
Keskyede maloly ribun lan mamin ti nus lan desike kyala mait bonyo,
lema kimin mumu de.”
20 Lemade teltelke it a kbyetik toha wen sra eraske ma ktyanuk de kbyohe,
*“Hei,
wen sra eras o,
mumukmuka mumarmara o!
Kali nus lan desike kiskyui-kiskyay de!
Ode iry matohak ti Yesus e,
ode Yesuske wasi nyaso e,
ode iry manety Hulasokwe wasi nyano e,
mimukmuka mimarmara e dakun!
Kali Hulasokwe yukun iry mamin nus lan desy,
ma hyalas sir ti wait ktela atyat raala ti e desy de.”
21 *Maktei bonyo nyaso manosy lait mambrebatke it a syumuk hatw lan ne it,
ma kola hatw lan ragiling gandum tike,
ma yotuk ei a tasike kralake,
ode tyanuk de byohe,
“Ktela maoly neke ana kdi ti nus Babel maba tantyany desy.
Kali Hulasokwe ana yotuk malkyakaw nus maba tantyany desy ba,
ma ana lema rmatakit de.
22 **Ode iry mabrenak jukare,
ode iry maohw hluitare,
ode iry maohw strompetare,
ana lema rtomolu sir ti nus lan desy de.
Ode iry a sim a mlay makarya nekre,
ana lema ramin ti nus lan desy dakun de.
Ode hatw ragiling gandum tike,
ana lema rtomolu kduduke dakun de.
23 Ode ana irire lema ratos damarare ma kyela ti nus lan desy de.
Ode ana irire lema rasa,
ma lema rala kalkal ma ramleklek ti nus lan desy dakun de.
Nam nekre mumu ne ana kdi ti,
kali nus lan desy wasi iry maketa nam a raba tantyany ti lasmyerke khaha ne,
neke ral wait ilmu-nare,
ma ral ma rakakmet a iry mamin ti nus o hnu mamin ti nuske ktem ne mumu,
ma khyury ma rdi ei lim o sal.
24 *Ode Hulasokwe ana yukun nus lan Babel desy,
kali rtabahunw a iry nelnyelire ti nus Babel desy kralake,
ma laratare kibo ti sal a kralanare.†
Ode tatot iry manety Hulasokwe wasi nyanoare ne laratare dakun.
Ode nus Babelke musti mo rhar a iry a ratabahunw sir mumu ti lasmyerke khahake ne laratare dakun.”