Atyahy ne kyosy Paulus ti iry a matohakare ti
Filipi
Paulus wasi tun mamuna ti atyahy ikeskye
1
*Waikw o hatnimakw a mamin ti nus Filipi e!
Atyahy neke kkwesy ti e mumu,
neke ti Hulasokwe wasi iry manety ral sasamke myor Yesus Kristuske† de,
ma ti kyal wasimy penatuanare ode diakenare dakun.
Yaw ne Paulus,
kor Timotius,
aramy miru neke Yesus Kristuske wasi at aramy.
2 Aramy miten ma eras manosy ity Amat Hulasokwe,
yor Anan a ity Ebut Yesus Kristuske kimin a e,
ktyabal inaka eras manosy Hulasokwe kyor a e dakun.
Paulus syalak eraske ba ti Hulasokwe ode syambayan ti iry matohakare ti nus Filipike
3 Waikw o hatnimakw e!
Sew kyaki nekre kolnye knwenas e,
desikeo lema kumluak ma kswalak eraske ba ti Hulasokwe khyali e.
Hulasow ne I ne kusakitil ode kuou ti I ne.
4 Ode sew kyaki nekre kumukmuka kumarmara yaw ti kusambayan ti e mumu ne,
5 kali ei neke msyaluk yaw ma kabrita Brit Eraske,
kyala kyosy sew mitohak ti Yesus Kristuske desy,
ma ti kyait senwe mane.
6 Ode kyala kyosy sew mitohak ti Kristuske desy,
desikeo Hulasokwe hyatuk† wasi karya erasare ti wasimy mormyorifare de.
Ode ktwohak dakun ohe,
ana Hulasokwe yala wasi karya eras desikre koldyesy nini ktei,
ti sew a Yesus Kristuske ana ima huruk ne.
7 Waikw o hatnimakw e,
kumukmuka kumarmara yaw khyali miktemtem mumu.
Ode mlay ma kumukmuka kumarmara yaw,
kali kal ralakkwe kralake ti e de.
Ode ei ne myor yaw ma tkarya ti karya ne.
Karya neke Hulasokwe yal ma yaw,
neke kyosy rala eraske.
Ode ei neke msyaluk yaw ti karya ne,
ti kyoat kumin ti sey metmetke kralake ne.
Ode kyoat a irire rsorw a Brit Eraske,
desikeo ei ne dakun o msyaluk yaw ma kumdiry eta Brit Eras desy,
ma klwosu o Brit desike mlay.
8 Ode Hulasokwe hye ohe,
yaw ne kmwaboka e a ksyalik ma kbwuma tanal huruk,
kali yaw ne klwobak e a ksyalik,
kola dene Yesus Kristuske ilobak e ne.
9 Ode kswambayan ti e ma lemamo wasimy loblobakke ktyabal a ktyabal toha.
Ode wasimy heheke ode hehei lulw o lyaw manosy Hulasokwe ne ktyabal a ktyabal dakun,
ma bisa ma mryekan a mhye ohe,
kabei sal ode kabei mlay ti sai ta sai bo.
10 Koldyesikemo ana bisa ma myilik a mhye eraske,
ode mtyoha,
ma mimorif neke nelnyely a e,
ode lema mika salamy ti sew a Yesus Kristuske ana ima huruk ne.
11 Ode kswambayan ma kuten Yesus Kristuske wasi haretke ma kkyarya ti ralamire,
ma mimorif ne ktela erasare kbyenw a e.
Dendye kyoat irire ratos wasimy mormyorifare,
desikeo ralan Hulasokwe ode rleru Anike.
Paulus imin ti sey metmetke kralake, keskyede Brit Eraske ktyabal ma kimelir toha
12 Waikw o hatnimakw e!
Yaw ne kbwuma mhye ohe,
masunw a madan yaw neke,
khyury ma irire rtabal ma ribun a rtomolu ode rtohak Brit Eraske,
13 *neke suldat majaga sey lan Kaisarke imin tike,†
ode iry mamin ti nus lan Roma ne dakun.
Ode sir neke rhe ohe,
kumin ti sey metmetke krala ne,
khyali kabrita Kristuske.
14 Ode malmata kumin ti sey metmetke kralake ne,
desikeo iry matohakare ratos ti kolkyabei ma ity Ebutke isaluk yaw ti sey metmetke kralake ne.
Ktela desike ne khyury ma iry ribunke wait tohtohakke ktyabal ma malkyakaw,
ma lema ramtaut,
de ktyabal ma rares toha,
ma rabrita Hulasokwe tunanare.
Paulus kyesy wasi atyahy ne ti kyoat imin ti sey metmetke kralake (1:12-14)
15 Ode mlay bain o irire dum a rabrita Kristuske,
keskye lema rbuma eras ma yaw,
ode lema rbuma rtomolu yaw,
de rbuma irire rtomolu sir bo.
Klala irire dum a rsaluk yaw ma ti rabrita Kristuske,
ma wasi Brit Eras desike kimelir bai lulkwe.
16 Iry masaluk yaw desikre rabrita Kristuske kali rlobak yaw,
ode kali rhe ohe,
Hulasokwe syusu yaw ma kumin ti sey metmetke krala ne,
ma kolnye irire rsorw a Brit Eraske,
desikeo yaw ne kumdiry eta Brit Eras desy,
ma kabrita ohe Brit Eras desike mlay.
17 Klala iry a lema rabu ma eras ma yaw desikre,
rabrita Kristuske dakun,
keskye rabrita kyor ralat maraire,
kali robak ma irire ribun ralan a sir,
ode rtomolu sir bo.
Ode rrekan o ktela raala desikre,
ana khyury ma yaw ne kswoi ralakw a sir,
ma khyury ma masunkwe ktyabal ma kdyan yaw,
ti sey metmetke krala ne.
18 Keskyede lema nam.
Biar ma irire dum a rbuma rsaluk yaw ma ti rabrita Kristuske,
ta dum a rbuma rsaluk a sir a rmesan,
ti kyoat rba ti rabrita Kristuske ne,
desikeo lema nam dakun.
Asal ma Brit Eras malosu Kristus desy,
irire rabrita.
Ode kali koldyesike mane kumukmuka kumarmara yaw.
Ode ana kumukmuka kumarmara yaw bai lulkwe,
19 kali khwe ohe ana Hulasokwe yaditi yaw toha masunw madan yaw ti ne,
kali ei ne msyambayan ma yaw,
ode kali Hulasokwe Memean a Yesus Kristuske inal ma yaw ne,
ksyaluk yaw dakun.
20 Lemade kal wasikw mormyorifke ti Hulasokwe,
kali kbwuma kete kala ktela sai ta sai,
ma kyala yaw ma kmway ma kswara Hulasokwe,
de kibai lulkwe ne kures ma kabrita Kristuske bo.
Ma biar ma kmwaty ta kmworif,
desikeo ktela kuala nekre mumu ne,
kala ma khyury ma irire rleru Kristuske Anike.
21 Kali yaw ne krwekan ohe,
kolnye kmworif,
desikeo kmworif ma klweru Kristuske.
Ode kolnye kmwaty,
desike ne eras ma kbyilak ti kumorif ti nus ne,
kali ana kmworif kor Kristuske ti wen sra eraske.
22 Keskyede kolnye kmworif ti nuske ktem ne a nggora,
desikemo bisa ma kkwarya karya Kristuske inal ma yaw ne.
Ode karya desike kbuanke lan dakun.
Dendye lema khwe dakun ohe,
kabei ne ana kuilik ne.
23 Neke kola ne kumdiry ti sal masanke,
keskyede ralakkwe kilakdu a i,
ti sal kabei ne ana kuilik ne.
Kali kdwakin a ksyalik ma kmwaty ma bisa ma kor Kristuske ti wen sra eraske,
desike ne,
eras a ksyalik ma yaw.
24 Keskyede kolnye kilik sal idake,
neke kmworif ti nuske ktem ne,
desikeo kbuanke lan ti e,
kali bisa ma kswaluk e a nggora.
25 Ode kali ktwohak koldyesy,
dendye khwe ohe kibai lulkwe ne ana kmworif ma kor miktemtem mumu ti nuske ktem ne,
mamode ana bisa ma kswaluk e ma wasimy tohtohakke ktyabal a ktyabal ma malkyakaw.
Ode ana mimorif ne mimukmuka mimarmara e,
kali mtyohak manenen ti Kristuske.
26 Dendye kolnye Kristuske lyura yaw ma kbwetik toha sey metmet ne ma kulak yaw ma ti kait e,
desikeo ana mimukmuka mimarmara e a ksyalik,
ode mlyeru Yesus Kristuske Anike,
khyali nam iala desy.
Paulus syurat iry Filipi-nare ma ramdiry eta Brit Eras malosu Yesus Kristuske ne
27 Waikw o hatnimakw e!
Biar ma nam sai ta sai kdi ti ma yaw ti ne,
keskye musti mo mimorif neke ksyusu ohe mtyoha Brit Eras malosu Yesus Kristuske ne.
Kali kolnye kmwa ma kait a e,
ta kolnye lema kmwa dakun,
desikeo bisa ma khwe ohe,
ei neke myety ral sasamke de,
ma mtyohak manenen ti Kristuske ma mimbwakar.
Ode kolnye iry masorw Brit Eraske,
desikeo miktemtem a myalkyaw e,
ma mimdiry eta Brit Eras desy.
28 Ode kete mimtaut tebibikan dakun ti iry a masorw e nekre.
Kali kolnye lema mimtaut sir,
desikeo ktela desike ana ksyusu ti sir ohe,
Hulasokwe ana yukun sir,
ode yotuk sir bai mamaty rala,
klala ana Hulasokwe lema yukun e,
de yaorif e.
Neke Hulasokwe myesan a yala ktela desikre ma kdi ti.
29 Ode ktela desikre kdi ti,
kali Hulasokwe ralake eras,
neke yilik a e de,
ma lema mtyohak ti Kristuske bo,
de yilik e dakun ma irire rala atyat e,
ma masunkwe kdyan a e,
ti mitohak ti Kristuske ne.
30 *Lemade senwe,
masunw desy kdyan e,
kola dene heit a myatos yaw ti masunkwe kidan yaw ti nus Filipike desy,
kali irire ramnisik Brit Eras a tabrita ne ti kimelir ne.
Ode kola dene ti senwe,
mtyomolu ohe masunkwe kdyan yaw ti sey metmetke krala ne dakun.