Atyahy ne kyosy Paulus ti iry a matohakare ti
Filipi
Tun a khatu nekre klyosu kitab ne kralake
Kitab a Filipi neke, Paulus wasi atyahy ikeskye, ma kyesy ti iry matohak mamin ti nus Filipike. Atyahy ne Paulus kyesy ti Filipi-nare, ti kyoat imin ti sey metmetke kralake o nus lan Romake. Nus Filipi neke kimin ti propinsi Makedoniake kseri timurke. Ode kyoat Paulus bya ti yabrita Brit Eras a malosu Yesus Kristuske ti lasmyer Eropake, desikeo byai nus Filipi mamin ti propinsi Makedoniake kmuna. Ode kyoat byai nus desy, desikeo yor lianke enatelw, neke: Silas, Timotius, ode Lukas.
Paulus kyesy a atyahy ne ti iry ribun matohak mamin ti nus Filipike ohe, ralake kimukmuka i, kali iry desikre rsaluk i ti wasi karyake, ti iabrita Hulasokwe tuna malosu Brit Eraske, khyali Yesus Kristuske ne, ti irire. Ode iry desikre rasaluk i ne, neke ti kyoat nenmo ratohak ti Yesus Kristuske ne (Flp. 1:3-11). Ode Paulus dakun o syurat sir, ma musti mo rtohak ti Yesus Kristuske, ode kete samlurw o rkeyer, de rakita bo, biar ma masunkwe kdyan sir (Flp. 1:27-30; 4:1). Ode Paulus iten toha sir dakun, ma ramorif ne rety ral sasamke, it de lyobak it, ode rnauk tenatare ma babaf kola Yesus Kristuske dakun (Flp. 2:1-5). Paulus tyanuk huruk ma byohe, ktela maka kbuan ma kbyilak ktela ribun nekre, neke: the Yesus Kristuske bain-bain (Flp. 3:1-11). Ti Paulus wasi atyahy ne dakun o, iten eraske ti iry ribun matohak mamin ti nus Filipike, kali rsaluk i ma ral kuban ti i, neke raso Epafroditus ma yety ba ti i (Flp. 4:15-20).
Kitab ne kisike kolnye
1. Paulus wasi tun mamuna ti atyahy ikeskye (Flp. 1:1-2).
2. Paulus syalak eraske ba ti Hulasokwe ode syambayan ti iry matohakare ti nus Filipike (Flp. 1:3-11).
3. Paulus imin ti sey metmetke kralake, keskyede Brit Eraske ktyabal ma kimelir (Flp. 1:12-26).
4. Paulus syurat iry Filipi-nare ma ramdiry eta Brit Eras malosu Yesus Kristuske ne (Flp. 1:27-30).
5. Snuratke ma tety ral sasamke ode tnauk ity tenatare ma babaf kola Kristuske (Flp. 2:1-11).
6. Snuratke ma tmorif ti nus ne kola thunare ti radelaf ti metdyetke ne (Flp. 2:12-18).
7. Ana Timotius ode Epafroditus rbai nus Filipike (Flp. 2:19-30).
8. Yesus Kristus neke eras I ma kbyilak sai ta sai bo (Flp. 3:1-11).
10. Paulus wasi snurat manosy lyaw ti iry matohak mamin ti Filipi-nare (Flp. 4:2-9).
11. Paulus syalak eraske ba ti Hulasokwe ti khyali Filipi-nare rasaluk i ne (Flp. 4:10-20).
12. Paulus kyus wasi atyahkye (Flp. 4:21-23).