2 Korintus i

Paulus wasi atyahy kla-ru a ikesy

ti ribun matohak mamin ti nus

Korintuske

Tun a khatu nekre klyosu kitab ne kralake

Paulus myesan a i ne imuna ma inety a Brit Eraske bai nus Korintuske ne (matos ti Kis. 18:1-17, ode matos dakun ti Tun a Khatu Mamunake ti kitab a 1 Korintuske). Keskyede kyoat Paulus byetik toha nus Korintuske ma byai nus salik, desikeo iry matohak mamin ti nus Korintuske dum a lema rou ma rtoha Paulus wasi haretke, kali rbohe i desike lema Kristuske wasi nyaso i. Dendye Paulus yaso Titus ma byai nus Korintuske, ma bya ti lyosu Paulus wasi tun malkyakaw inal ma iterik iry a Korintus a lema raou ma ratoha Paulus wasi haretke ne. Ode kyoat Titus yulak ia yosy a nus Korintuske ma inal a yor Paulus ti propinsi Makedoniake, desikeo lyosu ti Paulus ohe, iry matohak mamin ti nus Korintus a lema raou ma ratoha Paulus wasi haretke ne, neke ribun a rtunik wait lim o sal ba de, ode rmaboka Paulus. Keskye dum a usut a khatunare malkyakaw nggora, ma lema rbuma rtoha Paulus wasi haretke.

Ode kyoat Paulus itomolu brit desy, desikeo kyesy a atyahy a ana tabaca ne, neke kduduke kolnye, Paulus wasi atyahy kla-ru a ikesy ti ribun matohak mamin ti nus Korintuske.

Atyahy ne kisike kihes a Paulus wasi karya iabrita Brit Eraske ne (2:14–6:10). Ode tyanuk ti iry a Korintus-are ohe, wasi loblobakke lan a ksyalik ti sir (6:11-13; 7:2-4, 13-16). Ode imukmuka i, kali ti iry a Korintus-are ne ribun a rtunik wait lim o sal ba de (7:5-13). Maktei o, iten ma iry a Korintus-are rawahuk kuban, ma ana kolnye byai nus Korintuske, desikeo yal kuban desikre ma yety bai lasmyer Yudeake, ma yal ma syaluk iry a matohak a lema manait ei sra o hah nekre ti so (2Kor. 8–9). Maktei o, Paulus yal tun malkyakaure ma yal ma tyerik iry a Korintus a lema raou ma ratoha wasi haretke ne (2Kor. 10–13).

Kitab ne kisike kolnye

1. Hulasokwe yaluka iry matohak ity ne ode yalkyaw ity ralat a kralanare (2Kor. 1:1-11)

2. Paulus ihihi wasi rekryekkye ma tyanuk ohe nam sai ne kihury ma ihihi wasi rekryeky a iba ti iseak sir huruk ne, ode ihes ohe i neke Kristuske wasi nyaso i, ode lyosu wasi karya iabrita Brit Eraske ne, ode syurat iry a Korintus-are ma ramorif ne rtoha ktela mlaire (2Kor. 1:12–7:16)

3. Paulus iten ma rawahuk kuban ma rsaluk iry mamin ti lasmyer Yudeake ne (2Kor. 8–9)

4. Paulus yalak tenanke ohe, i neke Yesuske wasi nyaso i bain-bain, ode tyerik iry a lema raou ma ratoha wasi haretke ne (2Kor. 10:1–13:10)

5. Tun manosy lyakwe (2Kor. 13:11-13)