2
Lemadendye kyalake kohut ti ralakkwe kralake de, ma lenla kbwa ti ksweak e ti desy, kali lema kbwuma kala e ma ralamire ksyal huruk. 2 Kali kolnye kala e ma ralamire ksyal, desikeo ana esei yala ralakkwe ma kimukmuka i de? Lema kika iry! Kali ei neke mmyesan a bisa ma myala ralakkwe ma kimukmuka i bo, keskyede yaw ne kuala ralamire ma kisal ne. 3 Lemadendye lema kbwai desy, de kyalake kkwesy atyahkye it ti e de, ma kolnye ana kbwa ti ksweak a e, desikeo lema myala ralakkwe ma ksyal de. Kali mlay bain o ei neke iry a musti mo myala ralakkwe ma kimukmuka kimarmara i. Kali khwe bain-bain ohe, kolnye kumukmuka kumarmara yaw, desikeo ei ne mumu neke ana mimukmuka mimarmara e dakun. 4 Keskye kyoat a kkwesy atyahy desy ti e, desikeo ralakkwe ksyal ma kdyohut, ma kswer ma kisalsal, khyali wasimy lim o sal desikre. Ode lema kkwesy atyahy desy koldyesy ma kala ralamire ma ksyal, de kkwesy atyahy desy koldyesy mamode ei ne bisa ma mhye ohe, klwobak e a ksyalik, kali kbwuma mtyunik wasimy lim o sal desikre ba.†Paulus iten iry Korintus matohakare ma rsos iry maka wasi lim o salke ba
5 Waikw o hatnimakw e! Ti ribun matohak e neke, kolnye iry maka salake it, desikemo sal iala desy lema khyury ma ralakkwe kmyesan a ksyal bo, de anakyai khyury ma ei ne miktemtem ne ralamire ksyal dakun. Keskye lema kbwuma ktwanuk de kbwohe ralamy masal desikre lan ma kbyilak nam a mlay bain o kidi ti e desy mumu, de lemamo kbwohe, iry desike yala irire dum toha e ma ralatare ksyal ma desy. 6 Lemade ei neke ribun a myukun iry desy de, khyali wasi sal iala desy, ma ukun minal ti i desike kyoat de. 7 Lemadendye senweke musti mo msyos wasi sal iala desy ba, ode myaluka i ode myalkyaw ralake kralake, ma kete ralake ksyal lanidik, ma kyal nini rala masal desike kyala kyal i ma khyury ma wasi tohtohakke kitayar. 8 Lemade kal ralakkwe kralake ma kuten toha e bain-bain, ma msyusu wasimy loblobakke ti iry desy.
9 Ode kyalake kkwesy atyahy desike ti e ma kobak ma khwe ohe, ei neke mtyomolu ode mtyoha nam kusurat ti e nekre mumu ta lema. 10 Dendye kolnye msyos iry maka sala ti e desike ba de, desikeo kswos sala desy ba dakun de. Ode kolnye mlay bain o ika sala ma yaw, desikemo Kristuske hye ohe kswos iry desike sala desy ba de, mamode kyety eraske ti e. 11 Ktwanuk koldyesy ma musti mo tsos iry maka sala desike ba, mamode kete ngkeskwaure wait uskwe khatuke yal klelan desike ma yulak de tyalik ity ti nam tarekanare, kali ity neke the ohe, ngkeskwaure wait uskwe khatuke wasi rekryekire atyat.
Paulus ralake lema ktyeka i o nus a Troaske
12 *Lemade kyoat kosa wasikw atyahy desy ti e bonyo, kbwetik toha nus Efesuske ma kbwai nus Troaske. Ode kyoat a kait nus Troaske, ma kabrita Brit Eraske khyali Kristuske bonyo, ity Ebutke yal klelanare ribun ma yaw, ma kkwarya wasi karya inal ma yaw ne ti nus Troaske. 13 Keskyede ralakw neke lema ktyeka i, kali lema kunal a kor a ity wait Titus o so. Lemadendye ktwuly a iry matohak mamin ti nus Troas desikre, ma kmwai propinsi Makedoniake mane.
Hulasokwe yaso Paulus ma yabrita Hulasokwe tunanare
14 Ode biar ma koldyesy, keskyede kswalak eraske ba ti Hulasokwe, kali I neke yala yal iry a masorw aramy ne de, khyali aramy minety ral sasamke minor Kristuske ne, ma kyaki-kyaki ne Hulasokwe yety lulkwe ma aramy ti ribunke khahake. Neke kbuanke o Hulasokwe yal aramy ma aramy myabrita Brit Eras malosu Kristuske ne ti kabei ta kabei bo, ma irire rhe I. Ode kyoat ratomolu Brit Eras aramy miabrita desy, desike ne kola dene ralosa natke kduduhan mahon a mtelaske ti kabei ta kabei bony ne. 15-16 Kali kyoat aramy myabrita Brit Eras malosu Kristuske ne, neke aramy myola ne natke kduduhan mahon a mtelaske, ti ratunw ma kduduhan mahon a mtelas desy ksyai bai srake ma raabar ti Hulasokwe ne, ma irire mumu ne rlos.
Wen a ratunw nat mahon a mtelaske tike (2:15-16)
Keskyede ti iry mabasara mamaty rala nekre, neke rbohe, Brit aramy mitanuk desikre kola ne nam a mahon busu ma kinety matmyatkye ti sir ne. Klala ti iry a Hulasokwe iaorif sir nekre, neke rbohe, Brit aramy mitanuk desikre kola ne nam mahon a mtelas a manety mormyorif manal nini namke ti sir ne. Keskyede ese bisa ma kyarya a yal karya ne kyor amalkyau mesmesanke de? Lema irkye it elik! 17 Kali aramy neke lema myola dene tuanggurw a maabrita Hulasokwe tunanare, ma robak mesmesat ma irire raselw a sir ne. De aramy mtyanuk Hulasokwe tunanare kyor ara ralamy nelnyelire daku I, kali Hulasow ne I ne iaso aramy ma, aramy miabrita tunanare khyali aramy minety ral sasamke minor Kristuske ne.