Abraham neke iry a mlay i khyali wasi tohtohakke
4
Lemadendye waikw o hatnimakw e,
tatos ti iry a Yahudi-nare musut Abraham.
Kolkyabei mane Hulasokwe byohe Abraham neke iry mlay a i ne de?
2 Kolnye Abraham neke iry mlay a i ti Hulasokwe,
khyali ktela eras ialanare,
desikemo bisa ma byitil tenanke.
Keskye ktela eras Abraham ialanare,
neke lema khyury ma iry mlay a i.
Mane Abraham lema bisa ma byitil tenanke daku Hulasokwe.
3 *Kali rkesy ti Kitab Lanke ma kbyohe,
“Abraham tyohak ti Hulasokwe,
dendye Hulasokwe byohe Abraham neke iry mlakye.”
4 Kola ne irkye it ma kyarya ode ral wasi katkye ti i,
desikeo wasi katy desike lema hadiake desy,
de maslyesanke desy.
5 Keskye kolnye ttanuk ti khyali ktela Hulasokwe iohut ma irkye mlay a i ti Hulasokwe ne,
desikeo ktela desike lema kola dene iry makaryake ma ral wasi katkye ti i.
Kali kolnye irkye it a myea ti ktela eras ialanare,
kali ryekan o ana Hulasokwe yohut ohe,
i desike mlay a i ti Hulasokwe khyali ktela eras iala desy,
desikemo ktela desike kola dene iry makaryake ma ranal wasi katkye ti i ne.
Keskyede lema koldyesy,
de Hulasokwe yohut ohe,
iry mahatw ity ne ana mlay a ity ti Hulasokwe ne,
neke cuma mo khyali ity wait tohtohakke bo.
Dendye Hulasokwe byohe ity neke mlay a ity,
neke kola dene hadiake ma ity ma desy.
6 Kola dene raja Daud kyesy ti kitabke dakun ti khyali iry a mamukmuka ike,
kali Hulasokwe yohut ohe iry desike mlay a i ti Hulasokwe,
neke lema khyali ktela eras ialanare.
Lemadendye Daud tyanuk ma byohe,
7 *“Eraske ti iry a Hulasokwe isos salatare ba ne,
ode iry a Hulasokwe iaditi wait lim o sal ne.
8 Ode eraske ti iry a ity Ebutke lema irekan wait lim o salare ti sir ne de.”
Hulasokwe yohut ohe Abraham mlay a i ti Hulasokwe ti kyoat lenla raatosa tenanke ne
9 Tun eras raja Daud itanuk neke lema tyanuk ti iry a raatosa tenatare† ne rmesan,
de tyanuk ti iry a lema raatosa tenatare ne dakun.
Desike ne kola ne nam dai kutanuk desikre,
neke Abraham tyohak ti Hulasokwe,
dendye Hulasokwe byohe,
“Abraham neke iry mlakye.”
10 Ode hekyab ne Hulasokwe byohe Abraham ne iry mlay a i ne de?
Ode Hulasokwe byohe mlay a i ne kyoat raatosa tenanke ne,
ta lenla raatosa tenanke ne de?
Abraham neke Hulasokwe byohe iry mlay a i,
ti kyoat lenla raatosa tenanke ne.
11 *Lemadendye Abraham neke tyohak ti Hulasokwe a kmuna,
maktei o nenmo ratosa tenanke.
Kali kyoat raatosa tenanke desy,
neke kola dene Hulasokwe lyatan metraike ti iry a raatosa desy,
ma kyeluk nyatos ma ksyusu ohe,
Hulasokwe yohut de ma Abraham neke iry a mlay i,
kali tyohak ti Hulasokwe.
Lemade Abraham neke,
iry a lema Yahudi matohak a lema ratosa tenatare mumu ne,
amat a i,
kali sir desike rtohak kola Abraham.
Lemadendye Hulasokwe yohut ohe,
sir desike dakun o iry mlay a sir.
12 Ode iry a Yahudi ma raatosa tenatare ne ana amat a Abraham dakun,
kolnye rtohak ti Hulasokwe,
kola dene ity musut Abraham itohak ti Hulasokwe ne,
ti kyoat lenla raatosa tenanke ne.
Hulasokwe ihatetak ma yal eraske ti Abraham khyali wasi tohtohakke
13 *Heitlulswo Hulasokwe ihatetak de,
ma yal nuske ktem ne mumu ti Abraham yor tesnwo natu nekre ma wait.
Hulasokwe yal eras ihatetak desy ti Abraham,
neke lema khyali itoha tnyetak Musake ne,
de ti khyali itohak ti Hulasokwe ne.
Dendye Hulasokwe byohe,
Abraham neke iry mlakye.
14 *Kali kolnye Hulasokwe yal eras ihatetakke ti irkye khyali itoha tnyetak Musake ne,
desikemo ity a matohak ti Hulasokwe ne,
ity wait tohtohakke lema kika kbuan,
ode Hulasokwe wasi inahatetak desike lema kika kbuan dakun,
de kdi hah bo.
Keskyede lema koldyesy!
15 Kali lema irkye it a bisa ma tyoha tnyetak Musake mumu.
Dendye kyoat irkye lema tyoha tnyetak Musa desy,
desikeo khyury ma Hulasokwe kyeyer ma yukun i.
Keskyede kolnye lema kika tnyetak Musake,
desikeo lema kika tnyetak ma irkye byilak dakun.
16 * Khyali desike mane,
Hulasokwe yal eras ihatetak desike ma ity,
neke kyosy rala eraske kmyesan,
kali ttohak ti I.
Mane yal ti Abraham tesnwo natu nekre mumu,
neke esei ta esei bo ma rtohak kola Abraham.
Biar ma iry a Yahudi mahe tnyetak Musake,
dete lemamo iry a lema Yahudi-nare dakun.
Kali Abraham neke iry matohakare mumu ne ity amat a i.
17 *Kola dene Hulasokwe tyanuk ti Abraham,
neke rkesy ti Kitab Lanke kralake ma kbyohe,
“Kohut de ma ana tesnwo natumw nekre ribun sir,
ma rala bangsa-nare ma ribun ti lasmyerke khaha ne,
ode iry mamin ti bangsa desikre ne,
amat a o.”
Dendye Hulasokwe byohe,
Abraham neke,
iry matohak ity mumu ne,
ity amat a i.
Kali Abraham tyohak ti Hulasokwe.
Hulasow neke I ne iala mamatire ma rmorif,
ode I ne iala nam a lenla mamin nekre ma kimin,
neke cuma mo tyanuk bo,
desyo nam desike kimin elik.
18 *Kyoat desike Abraham hye ohe,
lema bisa ma ika anan de,
keskyede i neke tyohak ti Hulasokwe manenen ti tnyetak Hulasokwe ihatetak inor i desy,
ma ana tesnwo natu nekre ribun sir,
ma rala bangsa-nare ma ribun ti lasmyerke khaha ne,
ode iry mamin ti bangsa desikre ne,
amat a i.
Kola dene tnyetak Hulasokwe ihatetak inor i ne,
ma rakesy ti Kitab Lanke kralake ma kbyohe,
“Ana kala o ma tesnwo natumw nekre ribun sir kola thunare o laitke.”
19 *Abraham wasi tohtohakke malkyakaw,
biar ma hye ohe amosw a i ma iluh de,
kali wasi ainke anakyai nenma kyait atw de.
Ode hye dakun ohe sawa Sara neke myakw,
ma lema ika anan.
20 Keskye Abraham ralake lema kakan elik,
de tyohak manenen ti Hulasokwe wasi hatetak desy bo,
ode wasi tohtohakke ktyabal a ktyabal ma malkyakaw,
ode lyeru Hulasokwe.
21 Abraham neke tyohak bain-bain ohe,
Hulasokwe wasi haretke ma yala nam ihatetak desy ma kdi ti.
22 Ode khyali Abraham wasi tohtohak desy,
mane rakesy ti Kitab Lanke ma kbyohe,
“Hulasokwe byohe,
‘Abraham neke iry a mlakye.’ ”
23 Tunke khatu rakesy desy,
neke lema rkesy ti khyali Abraham myesan bo,
24 de rkesy ti khyali ity dakun.
Kali Hulasokwe byohe,
ity neke iry mlay a ity dakun,
kali ttohak ti Hulasow a iala ity Ebut Yesuske ma imorif huruk toha matmyatkye ne.
25 *Yesus neke Hulasokwe lyura ma irire rtabahunw a I,
khyali ity wait lim o sal.
Maktei o yala I ma myorif huruk toha matmyatkye,
ma ity neke bisa ma mlay a ity ti Hulasokwe.