Hulasokwe yukun irkye ne lema iseak mat
3
Lemadendye the ohe,
ktela raatosa tenatare† ne lema bisa ma kyala irkye ma Hulasokwe wasi iry a i.
Koldyesikemo Hulasokwe yal eras sai ti iry manosy klolan Yahudike ma kbyilak iry salik de?
Ode raatosa tenatare ne kyety eras sai ti sir dakun de?
2 Keskyede mlay bain o iry a Yahudi-nare ratot eras ribun sai ta sai toha Hulasokwe.
Kali heitlulswo Hulasokwe yal tunanare ti iry a Yahudi-nare a kmuna,
ma rkesy tuna desikre ti Kitab Lanke,
ode rajaga mamamak.
3 Keskye iry a Yahudi-nare dum a lema ratotomolu tel.
Koldyesike mane,
ktela desike khyury ma Hulasokwe lema tyoha nam itanukare e?
4 *Lema elik!
Kali nam sai desy Hulasokwe tyanuk,
nam desikre mumu ne mlay,
biar ma irire mumu ne rakakmet dakun.
Kola ne rakesy ti Kitab Lanke ma klyosu Hulasokwe ma kbyohe,
“Hulasow O,
nam sai mtwanuk,
desikeo mlay.
Ode kyait ma mukun tun,
desikeo irire lema bisa ma rbohe,
muukun tun ne sal.
Kali irire mumu ne bisa ma ratos ohe,
Oi neke mlay a O ti muukun tun ne.”
5 Keskye anakyai irkye byohe,
“Ity wait lim o sal kika kbuan,
kali bisa ma ksyusu ohe,
Hulasokwe mlay a I ksyalik ma kbyilak ity.”
Desikeo ana ttanuk kolkya?
Bisa ma ttanuk ohe,
“Hulasokwe lema mlay a I,
kali kyeyer mane yukun ity,
khyali ity wait lim o sal desikre e?”
Lema koldyesy!
Kali cuma mo irkye myesan ryekan koldyesy bo!
6 Ode nam irkye irekan desikre lema mlay!
Kali kolnye Hulasokwe lema mlay a I ti iukun tun ne,
desikemo kolkyabei ma bisa ma yukun nuske ktem ne mumu de?
7 Keskye anakyai irkye tyanuk ma byohe,
“Kolnye ity neke takakmet a irire,
desikeo ktela takakmet desike ana ksyusu ohe,
Hulasokwe mlay a I ksyalik ma kbyilak ity.
Kali kolnye tlau ity neke tor Hulasokwe,
ana irire mumu ne bisa ma ratos ohe Hulasokwe lema yola ity,
de mlay a I a ksyalik.
Dendye khyury ma irire rleru I,
kali mlay a I.
Koldyesikemo kyanmwane Hulasokwe iukun ity khyali ity wait lim o sal desy ne de?”
8 Keskye ktela irkye itanuk desike mais kola dene kolnye tyanuk ma byohe,
“Lemamo ity neke tala ktela atyatare,
mamode irire bisa ma ratos ohe,
Hulasokwe lema yola ity,
de eras I a ksyalik,
mane ana rleru Hulasokwe Anike.”
Keskye ktela irkye itanuk desike lema mlay.
Keskyede irire dum a rahes kakmetatare ma rahmway aramy ma rbohe,
aramy neke myajar ktela maoly desy.
Dendye mlay bain ma ana Hulasokwe yukun iry matanuk tun maoly desikre,
ma kdeda totnyo yabit raalanare.
Irire mumu ne rala lim o sal
9 Lemadendye mryekan o iry a Yahudi ity ne eras ity ma tbilak iry a lema Yahudi-nare e?
Lema koldyesy!
Kali yaw neke klwosu ti e de,
ohe lim o sal ne khyareta irire mumu,
neke iry a Yahudi-nare ode iry a lema Yahudi-nare dakun.
10 *Kola dene rakesy ti Kitab Lanke ma kbyohe,
“Lema irkye it a mlay a i elik ti Hulasokwe.
11 Ode lema irkye it a hye ei lulw o lyaw ma bisa ma yilik eraske toha atyatke.
Ode lema irkye it a yobak ma hye Hulasokwe dakun.
12 Ode irire mumu neke rsanyetat Hulasokwe de,
ma lema rber o rtahal.
Ode lema irkye it dakun ma yala ktela mlakye!
13 *Ode irire hahatare ktyanuk tun atyatare,
ma kyoat ratanuk bonyo,
wait tun desikre atyat ma khyon busu,
kola dene ralakat mamatkye wasi asake mo kihon busu ne.
Ode matare ktyanuk tun kakmet a kiulak de kitalik irire ne.
Ode hihitare ktyanuk tun mew o mlara ma kyala irire ralatare ma ksunw,
kola ne manunkwe ikuty a ity ne.
14 *Ode nunutare ksyusno ksyoba irire,
ode kbyenw ti tun inahmway irkye.
15 *Ode rdakin ma robak a ksala ma rtabahunw iry.
16 Ode kolnye rbai wen kabei ta kabei bo,
desikeo rahnutuk sai ta sai bo,
ode rahdawan irire ma masunkwe kdyan sir.
17 Ode lema rala rhe ma raka eras ror irire.
18 *Ode lema ramtaut Hulasokwe dakun.”
19 Ode ity neke the ohe,
tun rakesy ti Hulasokwe wasi tnyetak desy,
neke rkesy ti iry a Yahudi mahe tnyetak Musake.
Lemadendye ti iry a lema Yahudi-nare,
ode iry a Yahudi e ne dakun,
ma ti lui deru ne lema irkye it a mlay a i ti Hulasokwe elik.
Kali irire mumu ti nuske ktem ne,
neke raka wait lim o sal.
Koldyesikemo lema irkye it a bisa ma yalak tenanke toha Hulasokwe wasi ukunke.
20 Dendye ktela tatoha Hulasokwe wasi tnyetakke ne,
lema bisa ma kyala irkye it dakun ma mlay a i ti Hulasokwe.
Keskyede Hulasokwe yal wasi tnyetakke ma ity,
mamode bisa ma the ohe,
ity neke taka ity wait lim o sal.
Irkye mlay i ti Hulasokwe kali tyohak ti Yesus Kristuske
21 Keskye selsel neke Hulasokwe syusu ksalake it,
ma irkye bisa ma mlay a i ti Hulasokwe,
neke lema khyali itoha tnyetak Musake ne.
De ksala Hulasokwe isusuke kola ne rakesy ti tnyetak Musake,
ode rakesy ti iry manety Hulasokwe wasi nyanoare wait kitabare dakun.
22 *Neke ksyusu ohe:
ti ksala irkye mlay a i ti Hulasokwe ne,
neke cuma mo irkye tyohak ti Yesus Kristuske bo.
Ode esei ta esei bo ma tyohak ti Kristuske,
desikemo Hulasokwe yohut ohe,
iry desike mlay a i.
Kali ti Hulasokwe ne,
irire mumu neke mais-mais sir bo,
23 kali irire mumu ne rala lim o sal,
dendye soso sir toha Hulasokwe wasi madelafke de.
24 Keskyede selsel ne kyosy a Hulasokwe rala eraske,
dendye yohut ohe,
mlay a ity ti I ne,
neke lema khyali nam taalanare,
kali nam taalanare lema bisa ma ktyuny kyal Hulasokwe rala eras inal ma ity ne.
De Hulasokwe yohut ohe,
mlay a ity ti I ne,
neke khyali inal Anan Yesus Kristuske ma imaty ma ilitan eta ity ne.
25-26 Neke Hulasokwe yaso Anan Yesus Kristuske ma myaty ti tul masanwalw ike,
ma larake kibo ei hahke,
ma kolnye ttohak ti Yesuske,
desikeo Hulasokwe syos ity wait lim o sal nekre ba.
Heitlulswo lenla Yesuske imai nuske ktem ne,
desikeo Hulasokwe ineti ralake ma ikita ma yukun irkye ti khyali wait lim o sal,
kali lema samlurw o kyeyer.
Keskye selsel ne syusu keyerake ti irkye ti iala lim o sal ne,
ma ksyusu ohe wasi ukunke mlay,
kali lema imluak irkye wasi lim o sal.
Dendye Hulasokwe yal irkye wasi lim o sal desikre,
ma yal ti Yesuske ma myaty ma lyitan eta irkye ti wasi lim o sal desy.
Hulasokwe yal Yesuske ma yeluk ity,
ma Hulasokwe lema yukun ity,
de yukun Yesuske khyali ity wait lim o sal.
Ode ktela Anan Yesus Kristuske imaty desy,
ksyusu ohe Hulasokwe mlay a I.
Ode the ohe Hulasokwe wasi haretke ma yala iry maala lim o salare ma mlay a sir ti I,
kolnye rtohak ti Yesuske.
27 Lemadendye lema bisa ma tbitil ity tenatare ma atat,
khyali ktela eras taalanare.
Kali Hulasokwe byohe mlay a ity,
neke khyali tatohak ti Yesuske ne,
de lema khyali ktela eras taalanare,
ta lema khyali tatoha tnyetak Musake ne.
28 Dendye lema bisa ma tbitil ity tenatare ma atat,
kali the ohe,
mlay a ity ti Hulasokwe,
neke khyali ttohak ti Yesus Kristuske bo,
de lema khyali talkyaw ity ma tatoha tnyetak Musake kibuare ne.
29 Dendye kete mryekan o Hulasow neke Hulasow a I ti iry a Yahudi-nare bo.
Keskyede musti mo mhye bain-bain ohe,
Hulasow neke Hulasow a I ti irire mumu ti nuske ktem ne,
neke ti iry a Yahudi-nare dete lemamo ti iry a lema Yahudi-nare dakun.
30 * Kali Hulasow neke sasasam I bo.
I ne ibohe iry a Yahudi-nare,
ode iry a lema Yahudi-nare dakun o,
raktemtem ne mlay a sir,
kolnye rtohak ti Yesus Kristuske.
31 Koldyesikemo,
anakyai mryekan o ity neke bisa ma totuk tnyetak Musake ba e?
Lema koldyesy!
De kyosy ity wait tohtohakke,
nenmo bisa ma ttoha ma tala tnyetak Musake mumu ne wasi kbabaake.