Zɩmɛ́tɩ́náwa ná há to Zuwifiwa kúó ná Zeezi
2
1 Ɓa lʋ́l Zeezi Beteleyɛmɛ mɛ́ nɛ́, Ziide dɩtɩ́llɛ.
Ɛ́ tɛ́ŋ mɛ́, rɩ Erodi* ní fa ká Ziide dɩtɩ́llɛ kuóro.
Zeezi lʋlɛ́ ná har rɩ́ mɛ́, zɩmɛ́tɩ́náwa lɛ́ tɔ́ɔ́ mʋ́bʋɔ rɩ́ a ko Zerizalɛmɛ,*
2 a bɔsɛ bʋlɛ́:
«Zuwifiwa* kuóro ná ɓa sɩɛ́ nɛ́ há lʋ́lɛ́ mɩŋ nɛɛ́?
Á nóú caŋwʋl tɔ́ɔ́ mʋ́bʋɔ, ɛ́ nɛ́ á ko ráá cʋ́ɔ́lʋ́.»
3 Kuóro Erodi há nɛ́ ɛ́, ʋ beŋtúú fúkló, Zerizalɛmɛ nɩɛ wuu má beŋtunni fúkli.
4 Ɛ́ nɛ́ kuóro Erodi yɩ́rʋ́ tɔ́ɔ́ Wɩɩsɛ vʋk'ɔɔsa* nɩhɩɛ̃́sɛ wuu arɩ́ Wɩɩsɛ kɛŋzɩnna* ciki, a bɔ́sɩ́wɔ́ bʋlɛ́:
«Nɛɛ́ rɛ́ mɔhɛ̃́ rɩ́wɔ́ lʋl Wɩɩsɛ Nɩlɩsɛ* ná?»
5 Ɛ́ nɛ́ ɓa bʋl pɔ́ʋ́ bʋlɛ́:
«Ɓa mɔhɔ̃́ rɩ́wɔ́ lʋ́lʋ́ Beteleyɛmɛ mɛ́ nɛ́, Ziide dɩtɩ́llɛ, bee wɩ́ɛ́ ná Wɩɩsɛ wɩ́laabʋllɔ* há pʋ́ŋsɛ ɛ́, ʋ sɛ́ rɩ́ Wɩɩsɛ sɛ́:
6 ‹Ɩ é Beteleyɛmɛ, Ziide dɩtɩ́llɛ tɔ́wie,
zɩŋ rɩ́ tɔ́zeŋsi ná há mɩŋ Ziide dɩtɩ́llɛ má píŋ wɩ́ɩ́ kɛ,
bee wɩ́ɛ́ kuóro á rʋ́ʋ́ lɩ́ɩ́ nɛ́ a bélíŋ nɩɛ,
Ɩzɩrayɛl duo* mí.› »
7 Ɛ́ nɛ́ Erodi lʋɔrɛ yɩ́rɛ zɩmɛ́tɩ́náwa ná, a a ɓa máŋsɛ tɛ́ŋ ná tɩɩ mɛ́, caŋwʋl ná há lɩ́ɛ́.
8 Ká sɩɛ́ tʋ́ŋwɔ́ Beteleyɛmɛ mɛ́ a bʋlɛ́:
«Ɩ́ mʋ́ a tɩŋ bio ná naasɛ wérí; rɩɩ́wa nóú, ɩ́ a rɩ́ŋ zɩŋ ɛ́ mɛ́, a makɛ rɩ́ŋ má mʋ́ cʋ́ɔ́lʋ́.»
9 Zɩmɛ́tɩ́náwa ná há zésí kuóro wɩ́ɛ́ ná ko tenni, ɓa ísó zʋ ŋmɛ́nɔ.
Ɓa ɔ́ɔ́ rɩ́wɔ́ bel, rɩ caŋwʋl ná ɓa fa há néé tɔ́ɔ́ mʋ́bʋɔ, rʋʋ nɛ́ dé lɔ́wɔ́ sɩ́ɛ́ aá va.
Amá caŋwʋl ná há mʋ́ɛ́ peri bio ná dɩmɩnɩ́, ʋ cɩ́nɔ́.
10 Zɩmɛ́tɩ́náwa ná báá há ná caŋwʋl ná ɛ́, ɓa sɩɛnnɛ tɔ́rɔ́ kɩ́ŋkáŋ maahʋ̃́.
11 Ɓa sɩɛ́ mʋ́ peri, a zʋ jaa sɩɛrʋ, a ná bio ná rɩ́rʋ́ maá Maari.
* Ɛ́ nɛ́ ɓa ɓírmi tíé a cʋɔlɛ bio ná; ká púrwó cɩksɛ, a lɩ́sɛ salmɛ rɩ́ tulaaléwa bamma ɓaá yɩ́rɛ áŋsáŋsɛ,* rɩ́ mííri,* a dí zilé pɔ́ʋ́.
12 Ká tɩ́taŋ, Wɩɩsɛ tɩŋ duose mí a bʋl pɔ́wɔ́, rɩ́wɔ́ báá sɩ́ bɩ́rtɩŋ Erodi dɩhɩ̃́.
Ɛ́ nɛ́ ɓa tɩŋ ŋmɛ́ŋhúó a bɩrmʋ́wɔ́ tɔ́ɔ́.
Zɔzɛfɛ rɩ́ Maari fɔ́ɔ́ mʋ́ Ezipiti tíé
13 Zɩmɛ́tɩ́náwa ná colé har rɩ́ mɛ́, Nyuutɩna malɩ́ka* nɔ́ŋɔ kó Zɔzɛfɛ rɩ́ duose mí, a bʋ́lʋ́ rɩ́ bʋlɛ́:
«Isi pi bio ná rɩ́rʋ́ maá a kaa fá mʋ́ Ezipiti* tíé, a ké ráŋ a kaá ja kal ná ŋ há sɩ́ pɛ́ɩ́ liŋó rɩ́ɩ́ bɩrko, bee wɩ́ɛ́ Erodi sɩ́ ja bio ná mɩɩsɛ lɩ́sɛ.»
14 Ɛ́ nɛ́ Zɔzɛfɛ isi tɩ́taŋ ná, a pi bio ná rɩ́rʋ́ maá kaa mʋ́ Ezipiti tíé.
15 Ʋ ké ráŋ nɛ́ wuu, a kaá ja Erodi sʋʋ.
Nyɛ há tʋ́mɛ́, Wɩɩsɛ wɩ́laabʋllɔ fa há pʋ́ŋsɛ wɩ́ɩ́ ná nʋɔ nɛ́ súé.
Ʋ sɛ́ rɩ́ Nyuutɩna sɛ́:
«Ŋ yɩ́rɩ́ŋ bio ʋ lɛ Ezipiti tíé mí.»
Erodi ɔ́ɔ́ ɓa ɓʋ́ʋ́sɛ Beteleyɛmɛ heŋbólli wuu
16 Erodi há kɩ́ɛ́lɛ́ rɩ zɩmɛ́tɩ́náwa ná nyɩ́sʋ́, ʋ cɔ́ɛ́ wɩ́ɔ́ kɩ́ŋkáŋ.
Ɛ́ nɛ́ ʋ a ɓa mʋ́ Beteleyɛmɛ arɩ́ kílo ná wuu, a ɓʋ́ʋ́sɛ heŋbólli ná wuu há kéŋ bɩŋsɛ bɛllɛ, arɩ́wɔ́ ná há wɩ bɩŋsɛ bɛllɛ péré.
17 Wɩɩsɛ wɩ́laabʋllɔ Zeremi* há bʋ́lʋ́ ná nʋɔ nɛ́ súé.
Ʋ fa sɛ́:
18 «Ɓa nɛ́ búŋse rɩ́ wííle arɩ́ hiĩne kɩ́ŋkáŋ Rama*f2* mɛ́.
Rasɛl* nɩ́ɩ́ wúú bɛlɛ wɩ́ɛ́; ʋ wɩ có rɩ́wɔ́ bʋ́ɔ́lʋ́ má tɩɩ,
bee wɩ́ɛ́ ʋ bɛlɛ sʋ́sɔ́.»
Zɔzɛfɛ rɩ́ Maari lɛ́ Ezipiti mí a mʋ́ Nazarɛtɛ
19 Erodi sʋʋ har rɩ́ mɛ́, Nyuutɩna malɩ́ka nɔ́ŋɔ báá kó Zɔzɛfɛ rɩ́ duose mí, Ezipiti tíé mí,
20 a bʋ́lʋ́ rɩ́ bʋlɛ́:
«Isi pi bio ná rɩ́rʋ́ maá, a kaa mʋ́ Ɩzɩrayɛl tíé, bee wɩ́ɛ́ nɩɛ ná fa háá ja bio ná mɩɩsɛ lɩ́sɛ, ɓa sʋ́sɔ́.»
21 Ɛ́ nɛ́ Zɔzɛfɛ isi, a pi bio ná rɩ́rʋ́ maá, a bɩrmʋ́ Ɩzɩrayɛl tíé.
22 Amá Zɔzɛfɛ nɩ́ɔ́ rɩ Erodi bio, Arkelayisi, lɔ́ʋ́ áná kuorí aá bel Ziide dɩtɩ́llɛ.
Ɛ́ nɛ́ ráŋ mʋ́ɩ́ héwíŋ kánʋ́.
Wɩɩsɛ tɩŋ duose mí a bʋlʋ́ mʋ́ Galiile* dɩtɩ́llɛ.
23 Ráŋ nɛ́ sɩɛ́ ʋ mʋ́ ké tɔ́ɔ́ oro mí ɓaá yɩ́rɛ Nazarɛtɛ; ɛ́ ɔ́ɔ́ Wɩɩsɛ wɩ́laabʋlla wɩ́bʋlɩ́ ná nʋɔ sú.
Ɓa fa bʋ́lɔ́ bʋlɛ́:
«Ɓa sɩ́ yɩ́rʋ́ Nazarɛtɩwiilo.»