Nyuutɩna Wɩɩsɛ tápʋl wɩ́ɛ́
14
1 Ná Nyuutɩna Wɩɩsɛ tápʋl nɩ́ɩ́ koe, Zerizalɛmɛ nɩɛ,rɩ́ duowa náŋá kánɩ́wa kuóɓɩɛ a ɓá náŋá, ɩ́ sɩ́ɛ́ mɛ́.
2 Ŋ sɩ́ hé duó wuu nɩɛ náŋá mɛ́
rɩ́wɔ́ yo Zerizalɛmɛ.
Ɓa sɩ́ la tɔ́ɔ́ ná, a zɔkɛ jɩɩsɛ,
ká ciki háála.
Ɓa sɩ́ kɛsɛ tɔ́ɔ́ ná nɩɛ fá, a kaa col,
amá nɩkáánɛ ná wɩ tɔ́ɔ́ ná mɩ́ɩ́ lɛ́.
3 Ɛ́ nɛ́ sɩɛ́, rɩ́ Nyuutɩna Wɩɩsɛ cɛ́ ɛ́ duowa mɛ́,
a yówó ɛ́ kal, anɛ ɛ́ ʋ há válɛ́ aá yo lal.
4 Ɛ́ kal, ʋ sɩ́ cɛ́ Olíívi paalɔ daha,
Zerizalɛmɛ laka, wɩɩsɛ dɩpomí.
Olíívi tuuni paalɔ ná sɩ́ pɔ́ʋ́ sɩ́sɩ́ɛ́nnʋ́wa mɛ́,
ká yɛ́l bɛllɛ,
a pɔ́ wɩɩsɛ dɩpomí ká mʋ́ yakɛ wɩɩsɛ dɩzʋ́ɩ́,
sɩ́ bɩrmɛ polzeno.
Paalɔ ná cɔɔ nɔ́ŋɔ sɩ́ nʋkɛ
a mʋ́ wɩɩsɛ dɩpomí nɛ́gʋɔ rɩ́,
ká rɩ́ cɔɔ nɔ́ŋɔ má mʋ́ wɩɩsɛ dɩpomí néduu rí.
5 Polo ná há mɩ́nɩ́ŋ pallɛ ná pɛ́kɛ mɛ́ nɛ́ rɩ́ɩ́wa sɩɛ́ tɩ́ŋ a fa,
beé wɩ́ɛ́, polo ná há mɩ́ŋ pallɛ ná pɛ́kɛ sɩ́ pɛ́ a mʋ́ lɛ́ Asalɛ.
Ɩ́ sɩ́ fa anɩ́ɩ́wa naabalwa há fa ɛ́,
tɛ́ŋ ná mɛ́ tíé há zíklé,
Oziyasɛ há ká Ziida kuóro tɛ́ŋ mɛ́.
Ɛ́ mɛ́ nɛ́ sɩɛ́ rɩ Nyuutɩna, ŋ Wɩɩsɛ ko,
rɩ́ Wɩɩsɛ nɩtɩ́llɛ́ ná má wuu tɩ́ŋʋ́ mɛ́ a ko.
6 Ɛ́ kal, pʋmmɔ waá mɩŋ,
waarʋ má waá mɩŋ,
waarʋ ná há kɛ́ nɛ́sɛ,
a a nyii ɓɩ́ɓaŋ, má waá mɩŋ.
7 Ɛ́ kal sɩ́ ɔ́ʋ́ dʋŋɔ, Nyuutɩna Wɩɩsɛ ɛ̃ ɛ́ mɛ́,
wɔhɔ rɩ́ tɩ́taŋ báá waá mɩŋ,
amá pʋmmɔ sɩ́ mɩŋ, tɛ́ŋ ná mɛ́ bíno há mɔhɛ̃́ rʋ́ʋ́ mɩŋ.
8 Ɛ́ kal, nyibulsɩ́ɩ́ sɩ́ poŋ Zerizalɛmɛ mɛ́,
ʋ nyii ná ɓarma nɔ́ŋɔ sɩ́ pal a mʋ́ Mʋsʋwɩ rɩ́,
ká rɩ́ fá ná nɔ́ŋɔ má pal a mʋ́ Mediterane mʋʋ rɩ́.
Ʋ sɩ́ nɛ ɛ́ nɛ́ tɔ́lɩɩla arɩ́ yɩbɩ́ŋ wuu.
9 Nyuutɩna Wɩɩsɛ sɩ́ dí kuorí tíé wuu nyúú.
Ɛ́ kal, Nyuutɩna dʋŋɔ nɛ́ sɩ́ a Wɩɩsɛ,
ká rʋʋ yɩr má ɔ́ʋ́ dʋŋɔ.
10 Tɔ́ɔ́ ná tíé wuu sɩ́ a típáŋtaŋɩ́,
a pɔ́ Geba há mɩŋ Zerizalɛmɛ wɩɩsɛ dɩpomí nɛ́gʋɔ,
ká mʋ́ yakɛ Rɩmɔŋ há mɩŋ Zerizalɛmɛ wɩɩsɛ dɩpomí néduu.
Zerizalɛmɛ sɩ́ isí cúllú dɩmɩnɩ́, tɔ́nɛ ná wuu há kílú
a pɔ́ Bɛŋzamɛ dánnʋɔ mɛ́
ká mʋ́ yakɛ dánnʋbɩnɛ́ dɩhɩ̃́,
a daarɛ mʋ́ a peri naŋgbáŋjɛ́ dánnʋɔ mɛ́,
ká baa pɔ́ Hananɩyɛl zegbó mí,
ká mʋ́ yakɛ kuóro dɩvɛ́ŋ dɩhaasɩ́.
11 Nɩɛ sɩ́ ké tɔ́ɔ́ ná mɛ́,
ɓa báá wʋ́ʋ́ zɔkɛ,
Zerizalɛmɛ sɩ́ ká tɛŋfɩ́ɛ́l.
12 Ná wɩɩla ná
Nyuutɩna há sɩ́ pii hé duowa ná wuu há yó Zerizalɛmɛ:
ɓa tɛŋnamɩŋsa sɩ́ sʋɔrɛ
ká rɩ́wɔ́ há wommi,
ɓa sɩ́ɛ́ sɩ́ sʋɔrɛ, ɓa sɩ́bʋɔnnɛ mɛ́,
ká rɩ́wɔ́ neŋdúlli sʋɔrɛ, ɓa nʋʋsɛ mɛ́.
13 Ɛ́ kal, Nyuutɩna sɩ́ hé héwíŋ ɓɩzeno ɓa sɩɛrʋ;
nɛrɔ wuu sɩ́ bɩrɛ cɩ́nʋ́ nɔ́ŋɔ mɛ́,
rɩ́wɔ́ hé nɛ́ŋsa náŋá mɛ́.
14 Ziida nɩɛ má sɩ́ yo lal Zerizalɛmɛ mɛ́,
ɓa sɩ́ la duowa ná wuu há kílwó kuóɓɩɛ
a hé náŋá mɛ́:
salmɛ, wárɛ, gɛnnɛ ɓɩkana.
15 Wɩɩla né duo nɛ́ sɩ́ peri záksɛ,
kokúme ka zákawa,
nyʋkmawa, kokúsi,
arɩ́ pʋsɛ ná wuu há mɩ́ŋ dɩŋdɔma púl sɩɛrʋ,
ɛ́ wɩɩla tɩɩ nɛ́ sɩ́ péríwó.
16 Ɛ́ tɛ́ŋ mɛ́, duowa ná há yo Zerizalɛmɛ,
ɓa nɩkáánɛ ná wuu,
sɩ́ mʋ́ ɛ́ tɔ́ɔ́ bɩná wuu,
a ɓírmi kuóro ná sɩ́ɛ́,
ʋ nɛ́ há ká Nyuutɩna Wɩɩsɛ ná há ká dóé wuu tɩ́na,
ká dí lɔkɔ cana*.
17 Amá tíé nyúú,
tɔ́nɛ ná wuu nɩɛ há wɩ Zerizalɛmɛ mʋ́ɛ́,
rɩ́wɔ́ ɓírmi kuóro ná há ká Nyuutɩna Wɩɩsɛ ná
há ká Doe wuu tɩna sɩ́ɛ́, rɩ́ cʋ́ɔ́lʋ́,
duóŋ wʋ́ɔ́ tɔ́ɔ́ ko.
18 Rɩ Ezipiti tɔ́ɔ́ nɩɛ má nɛ́ vɛ́ɛ́, rɩ́wɔ́ mʋ́,
Nyuutɩna Wɩɩsɛ sɩ́ a rɩ wɩɩla ná
há pérí duowa ná há wɩ mʋ́ɛ́ dí lɔkɔ cana,
péríwó má.
19 Wɩɩla ná há sɩ́ peri Ezipiti tɔ́ɔ́
arɩ́ tɔ́nɛ ná wuu nɩɛ há wɩ mʋ́ɛ́ dí lɔka cana ná nɛ́ ɛ́.
20 Ɛ́ tɛ́ŋ mɛ́, ná pʋ́ŋsɛ ná há sɩ́ mɩŋ záksɛ bɩ́ŋbɩ́llɛ mɛ́:
«Nyuutɩna Wɩɩsɛ dʋŋɔ nɛ́ tʋ́ʋ̃́».
Nyuutɩna Wɩɩsɛ jaa viini ná sɩ́ ɔ́ʋ́ tɩ́llɛ,
anɛ cɛ́l loŋni ná há mɩŋ koro ná sɩ́ɛ́.
21 Viini ná wuu há mɩŋ Zerizalɛmɛ arɩ́ Ziida mɛ́,
sɩ́ a Nyuutɩna Wɩɩsɛ ná há ká doe wuu tɩna dʋŋɔ tɩ́llɛ́.
Nɩɛ ná wuu há kúé aá ɔsɛ vʋ́ka
sɩ́ pɔ́wɔ́, aá cɔ́wɔ́ namɩŋsa.
Ɛ́ tɛ́ŋ mɛ́, Nyuutɩna Wɩɩsɛ ná há ká doe wuu tɩna
jizeno báá wɩ báyɛlɔ́ ka.