Bɔ́mmʋ́ɔ́ nyúú mí wɩ́muulináálɛ
9
1 Ŋ baa ná Nyuutɩna Wɩɩsɛ rʋʋ cɛ́ vʋk'ɔ́ɔ́sɩ́koro nyúú, ká bʋlɛ́: «Ŋmɔwɛ nafarsɛ nyútɔ́llɛ mɛ́, arɩ́wɔ́ múkunne gínni,a ɓallɛ céŋŋi nyúútɩ́náwa wuu nyunni.
Rɩ ɓa ha káánɔ́, rɩ́ŋ a rɩ́wɔ́ ɓʋ́ʋ́sɩ́wɔ́ rɩ́ tókowí.
Nɛ́ŋ wuu waá wóllí fá,
Nɛ́ŋ wuu waá lúú lɛ.
2 Rɩ ɓa nɛ́ wóllé mʋ́ zʋ lɛlɛ tɔ́ɔ́,
Ŋ sɩ́ mʋ́ ráŋ, a kɛ́sɩ́wɔ́.
Rɩ ɓa nɛ́ zɩ́nɛ́ yúóli bána má,
ŋ sɩ́ zɛ́ kɛ́sɩ́wɔ́ tuwi.
3 Rɩ ɓa mʋ́ɔ́ féŋsi Karmɛl paalɔ nyúú,
ŋ sɩ́ nówó, a kɛ́sɩ́wɔ́.
Rɩ ɓa bɩ́ɩ́nɔ́, rɩ ɓa nɛ́ zʋ́ mʋʋ nyii mʋ́l,
ɓa sɩ́ féŋsíŋ sɩ́ɛ́ mɛ́,
ŋ sɩ́ a rɩ́ dʋŋ ɓíésíwó.
4 Rɩ ɓa nɛ́ mʋ́wɔ́ dɩŋdɔma dɩhɩ̃́ a bɩrmɛ lal yósi má,
ŋ sɩ́ a rɩ́wɔ́ ɓʋ́ʋ́sɩ́wɔ́ ráŋ.
Ŋ sɩ́ɩ́ sɩ́ cɔ́wɔ́ mɛ́,
ŋ taŋa waá ja rɩ́ŋ a wérí ní pɔ́wɔ́,
ŋŋ́ já rɩ́ŋ pi bɔ́ŋbɔ́ŋ nɛ́ ɔ́wɔ́ mɛ́.»
Nyuutɩna Wɩɩsɛ nɩ́ ká tíé sarɩ́yadííro
5 Nyuutɩna há ká Nyuutɩna Wɩɩsɛ, dóé wuu tɩ́na,
ʋ púú néní tɩkɛ tíé mí, ʋ zíkíli,
ʋ nɩɛ wuu mɩŋ wííle mí.
Tíé wuú isi ɓɔ́, ká bɩrɛ tuwi ɓal,
anɛ Ezipiti fuo Nil nyii.
6 Ʋ sɔ́ʋ́ dɩzʋʋlɩ́ bána nyúú,
ʋ tɔ́ tíé mí, anɛ luso.
Ʋ nɩ́ɩ́ a mʋʋ nyii cu lɩ́ɩ́ zɛ́ nyúú rí,
ká bɩrɛ tuwi, aá gaarɛ tíé.
Ʋ yɩr nɛ́ ká Nyuutɩna Wɩɩsɛ.
Ɩzɩrayɛl nɩɛ nyúwér yʋ́ksɔ́
7 «Ɩzɩrayɛl nɩɛ, ɩ́ wɩ́ɛ́ nɛ́ háákɛ́ ŋ rɩ́, a kɩ́llɛ Etiopi nɩɛ?
Ŋ ɔ́ɔ́, ɩ́ lɛ Ezipiti mí,
ŋ ɔ́ɔ́, Filisiti nɩɛ má lɛ Kafɩtɔɔrɛ mɛ́,
a a Sɩɩrɩɛŋwa má lɛ Kiiri mí.
Ɩ́ wɩ ɛ́ mɛ́ ɛ̃?» Nyuutɩna Wɩɩsɛ nɛ́ bʋl ɛ́.
8 Ŋ é Nyuutɩna há ká Nyuutɩna Wɩɩsɛ,
ŋ sɩ́ɛ́ cɔ́ Ɩzɩrayɛl kuójaa kuóre ná há ɛ́ɛ́ zɔkɛ mɛ́.
Ŋ sɩ́ a rɩ́wɔ́ nyɩ́ɩ́kɛ tíé nyúú.
Amá ŋ waá a rɩ́ Zakɔbɛ duo nɩɛ wuu nyɩ́ɩ́kɛ tíé nyúú.
Nyuutɩna Wɩɩsɛ nɛ́ bʋl ɛ́.
9 Nyuutɩna Wɩɩsɛ sɛ́:
«Ŋ sɩ́ pá ŋmɛ́nɔ,
ŋ sɩ́ a rɩ́wɔ́ cési, Ɩzɩrayɛl duo nɩɛ,
duowa ná náŋa sɩɛrʋ,
anɩ́wɔ́ háá cési míŋ ɛ́, césé sɩɛrʋ,
ká dɔ́wɩ́ balá má wɩ, tíé ɓal.
10 Tókówí ní sɩ́ ɓʋ́ŋ nɩɛ ná wuu há ɛ́ɛ́ zɔ́kɩ́ŋ mɛ́,
ɓa nɩɛ ná wuu há sɛ́:
“Ɩ wáá ló rɩ́ zɔ́krʋ́ ko,
ɩ wáá ló rʋ́ʋ́ pérírá!” »
Nyuutɩna Wɩɩsɛ sabɩɩna bɩ́rsɔ́
11 Ɛ́ kal, ŋ sɩ́ bɩr cúóli Davidi tɔ́ɔ́ ná há zɔ́kɛ́, aá mʋ́ dɩtenni,
ŋ sɩ́ cúólú zeŋkunaasɛ ná há ɓállɛ́,
ŋ sɩ́ bɩrmʋ́ dɩkɔ́ŋsa,
ŋ sɩ́ bɩrsɔ́ʋ́, rʋ́ʋ́ nʋ́ʋ́ fa há nɩhɛ̃́ ɛ́.
12 A makɛ rɩ Ɩzɩrayɛl nɩɛ bɩrla Edoŋ nɩkáánɛ ná tɔ́ɔ́
arɩ́ duowa ná náŋa wuu,
fa há káŋ nɩɛ,
Nyuutɩna Wɩɩsɛ nɛ́ bʋ́l ɛ́,
ʋ nɛ́ sɩ́ tʋŋ ɛ́.»
13 Nyuutɩna Wɩɩsɛ sɛ́:
«Tapʋlɛ́ rɩ́ɩ́ kúé,
ɓɩ́ɛ́ há sɩ́ ɔsɛ, rɩ́wɔ́ kʋsɛ wuu, a kaá mʋ́ peri pár tɛ́ŋ,
ká rɩ́wɔ́ ɓɔ́rɛ viínyi nɔnɔ wuu, a kaá mʋ́ peri ɓɩ́ɛ́ dúí tɛ́ŋ mɛ́,
viínyi nɔnɔ nyii sɩ́ pál lɛ pallɛ aá tuwi,
a tuwi tɔ́ dúŋduóme wuu mí.
14 Ŋ sɩ́ a rɩ́ Ɩzɩrayɛl nɩɛ, há káŋ nɩɛ
bɩrɛ nɩ́wɔ́ nɩ́ɩ́sɔ;
ɓa sɩ́ bɩ́rsɔ́wɔ́ tɔ́nɛ ná há zɔ́kɛ́
a bɩr mɩŋwɔ́ tɔ́nɛ sɩɛnnʋ,
ɓa sɩ́ cɔ́ŋsɛ víínyíwa
a nyɔ́wɔ́ dɩvɛ́ŋ,
ɓa sɩ́ parɛ záádɛwa,
a díwó sɩɛrʋ oŋparɛ́.
15 Ŋ sɩ́ bílwó ɓa tíé mí,
ká nɛ́ŋ tó aá íllíwó ɓa tíé mí,
tíé ná ŋ há píé a pɔ́wɔ́.
Nyuutɩna Wɩɩsɛ, ɩ́ Wɩɩsɛ nɛ́ bʋ́l ɛ́.