Baná nyúú mí wɩ́muulináálɛ: fʋ́yaakɔ́ rɩ́ tunɔŋbɩlɛ
8
1 Ná Nyuutɩna Wɩɩsɛ báá há ɛ́ɛ́ ŋ muuli ná wɩ́ɩ́ ná: fʋ́yaakɔ́ rɩ́ tunɔŋbɩlɛ. 2 Ʋ sɩ́ɛ́ bɔ́sɩ́ŋ bʋlɛ́: «Amɔsɛ, beé rí ɩ ná?» Ɛ́ nɛ́ ŋ sɛ́: «Fʋ́yaakɔ́ rɩ́ tunɔŋbɩlɛ́ nɛ́.» Ɛ́ nɛ́ Nyuutɩna Wɩɩsɛ sɛ́: «Ɩzɩrayɛl nɩɛ há káŋ jamáŋ, ɓa zɔkɛ́ tɛ́ŋ péró,
anɛ tunɔna há bɩ́ɛ́.
Ŋ báá waá píí cɛ́wɔ́.
3 Ŋ é Nyuutɩna há ká Nyuutɩna Wɩɩsɛ nɩ́ bʋlɛ́:
Ɛ́ kal sɩ́ɛ́,
kuóro jaa gɔkɩ́ sɩ́ bɩrmɛ nááwé.
Sʋsɛ sɩ́ a ɓɩkáná, a ɓɛ́sɛ dɩhɛ̃́ wuu.
Ká rɩ́ siklé sikli.»
Báyɛlɛ́ wɩ taŋá ja, ɓa sɩ́ ná wɩ́hála ɓɩzeno
4 Ɩ́ zesi wérí,
ɩ́ é nɩɛ ná háá nʋɔsɛ nɩyaara,
káá gɛrɛ tɔ́ɔ́ nɛ́múúritɩɩna.
5 Ɩ́ sɛ́:
«Kal beé rí, rɩ́ caŋfɛlɔ cana díí tenni,
ká ráá wóllíra mɩsɛ yɛ́llɛ?
Kal beé rí, rɩ́ fɩɛlɛ́ tápʋl tenni,
ká ráá wúrírá vʋ́ʋ́ra?»
Ɩ́ɩ́ ŋmasɛ táásɩ́máŋsɛ mʋ́ʋ́la fʋʋnɛ,
aá bɩrmɛ nɩvɩrɛ kíílówa ɩ́ tɩɩ mɛ́,
a tɩ́ŋɩ́wa oŋkaakérse mí, aá vɩrɛ nɩɛ.
6 Ɩ́ɩ́ la nɩyaara yɔwɛ, ɓa kɩmunne wɩ́ɛ́,
aá yɔwɛ nɩpʋɔllɛ, natɔwɔ yɛlɩ́ mɛ́.
Ɩ́ɩ́ yɛ́llɩ́wa biléwa mɩ́kɔlɔ má tɩɩ.
7 Nyuutɩna Wɩɩsɛ sɩ́ɛ́ ŋmɩ́ɛ́sɔ́ bʋlɛ́:
«A tɩŋ Ɩzɩrayɛl nɩɛ makwɔ́ tɩɩ ɓa tɔ́ɔ́ ná wɩ́ɛ́,
ŋ wɩ́ɩ́wa wɩ́'állɛ nyáŋ mɛ́ wuó sʋllɛ ábádá.»
8 Ɛ́ nɛ́ tɛ tɔ́ɔ́ ná sɩ́ zíklí,
ká rʋ́ʋ́ nɩɛ wuu mɩŋ hiĩne mí.
Tɔ́ɔ́ ná wuu sɩ́ isi ɓɔ́, ká bɩrɛ tuwi ɓal,
anɛ Ezipiti fuo Nil háá sú a wáálɛ́ ɛ́,
ká tuwi ké.
Nyuutɩna Wɩɩsɛ tápʋl ká hiĩné rɩ́ siklé arɩ́ sʋʋ nɛ́
9 Nyuutɩna Wɩɩsɛ nɛ́ bʋlɛ́:
«Ɛ́ tápʋ́l,
wɔhɔcɩ́ɩ́ka nɛ́, rɩ́ŋ a rɩ́ wɩɩsɛ zʋ,
ká wɔhɔ, rɩ́ŋ a rɩ́ tɔ́ɔ́ bíri.
10 Ŋ sɩ́ a rɩ́ɩ́wa caŋsɛ díí bɩrmɛ yúó,
ká rɩ́ɩ́wa yɩɩla bɩrmɛ zeŋbíé.
Ŋ sɩ́ a rɩ́ɩ́wa wuu laalɛ jɔrʋ,
ká a rɩ́ɩ́wa píéríwa nyúnni wuu.
Ŋ sɩ́ a rɩ́ tɔ́ɔ́ nɩɛ wi,
anɛ bibalá léŋ há sʋ́wɛ́,
ká rɩ́ ɛ́ wɩ́ɛ́ dɩtenní nɩ́ɛ́sɛ sazɔkɔ́ tápʋl.
11 Nyuutɩna Wɩɩsɛ sɛ́:
Ná, tápʋ́lɛ́ rɩ́ɩ́ kúé ,
rɩ́ŋ yiki losú hé tɔ́ɔ́ ná sɩɛrʋ.
Losu sɩ́ kɛ́sɛ nɩɛ, amá ɓɩdííli losu raá;
nyinyʋɔ́sɛ sɩ́ kɛ́sɛ nɩɛ, amá nyii nyinyʋɔ́sɛ raá.
Nyuutɩna Wɩɩsɛ wɩ́bʋlɛ losu,
arɩ́rʋ́ nyinyʋɔ́sɛ nɛ́ sɩ́ kɛ́sɩ́wɔ́.
12 Ɓa sɩ́ pɔ́ tɔ́ɔ́ ná wɩpomí nédu,
ká gʋɔrɛ a ko mʋ́ lʋ́ʋ́ wɩzʋʋlɔ́,
a pɔ́ wɩpomí nágʋɔ, a ko mʋ́ lɩ wɩɩsɛ dɩpomí;
aá ja Nyuutɩna Wɩɩsɛ wɩbʋ́lɛ rɩ́wɔ́ zesi,
amá ɓa wʋ́ʋ́ wuó ná.
13 «Ɛ́ kal,
nyinyʋɔ́sɛ sɩ́ bɛklɛ hápʋɔsɩwéré arɩ́ bápʋɔsɛ́.
14 Nɩɛ ná háá ŋmɩ́ɛ́sɛ Samari veno ná yɩr mɛ́, a bʋlɛ́:
«Daŋ, ɩ veno wómmó!
Bɛrsɩ́ba, ɩ ŋmɛ́ŋkísi ná wómmó!»
Ɓa sɩ́ ɓallɛ ká báá sɩ́ wóllí isi.