Wɩɩsɛ sɩ́ dí Ɩzɩrayɛl nɩɛ sarya
4
1 Ɩzɩrayɛl nɩɛ, ɩ́ zesi Nyuutɩna Wɩɩsɛ há sʋ́ʋ́ ná!Bee wɩ́ɛ́, Nyuutɩna Wɩɩsɛ sɩ́ dí tɔ́ɔ́ ná nɩɛ sarɩ́ya,
beé wɩ́ɛ́, táŋa to tɔ́ɔ́ ná sɩɛrʋ,
nɩcɩ́tɩkɔ́ má tóó,
Wɩɩsɛ zɩmɛ́ má tóó.
2 Bʋra rɩ́ nyɩɛrʋ rɩ́
nɩɓʋ́ rɩ́ gáárʋ arɩ́ cɔ́rmʋ nɛ́ mɩŋ ráŋ,
nɩɛ́ dí bɩ́barɩ́ náŋá mɛ́,
aá ɓʋ́ʋ́sɛ náŋá tɛ́ŋ wuu mí.
3 Ɛ́ nɛ́ tɛ, tɔ́ɔ́ ná nɩɛ sɩ́ mɩŋ wííle mí,
nɩɛ ná wuu há mɩ́ŋ ráŋ sɩ́ koŋŋi;
arɩ́ baka balla arɩ́ bána nyúú diíwiisi.
Mʋʋ náŋwʋlɛ́ má tɩɩ sɩ́ nyɩ́ɩ́kɛ.
Wɩɩsɛ bʋ́l vʋk'ɔɔsa wɩ́bɔma wɩ́ɛ́
4 Amá rɩ́ nɛrɔ wuu sʋ́ʋ́ nɔ́ŋɔ wɩ́bɔma wɩ́ɛ́ bʋ́lʋ́,
rɩ́ nɛrɔ wuu sɩ́ wɩ́ɛ́ bʋ́l cɩ́nʋ́ nɔ́ŋɔ mɛ́;
bee wɩ́ɛ́, Ɩzɩrayɛl nɩɛ nɩhɛ̃́ nɩɛ ná há bʋ́l wɩ́ɛ́ aá cɛ́ vʋ́k'ɔɔsa mɛ́ nɛ́.
5 Ɩzɩrayɛl nɩɛ sɩ gɛ́nnɛ ɓallɛ wɔhɔ,
ká rɩ́ wɩlaabʋlla ná má há mɩnɩ́ dɩhɩ̃́ gɛ́nnɛ ɓallɛ tɩtáŋ,
ká rɩ́ŋ zɔ́kɩ́ maá.
6 Zɩmɛ́ há muríŋ nɩɛ nɛ́ tɛ,
zɔ́krʋ́ períwó.
Bee wɩ́ɛ́, ɩ é, ɩ vɛ́ zɩmɛ́ tá,
ɛ́ wɩ́ɛ́, ŋ má lɩ́sɩ́ ŋ vʋ́k'ɔ́ɔ́sɛ tʋtʋmɛ́ ná mɛ́.
Anɛ ɛ́ ɩ há sʋ́llɩ́ Wɩɩsɛ wɩ́bilé ná wɩ́ɛ́,
ŋ má sɩ́ sʋ́llɩ́ bɛlɛ wɩ́ɛ́.
7 Anɛ ɛ́ vʋk'ɔɔsa ná há púle kɩ́ŋkáŋ,
ɓa wɩ́ɛ́ ná ɓa há ɛ́ɛ́ zɔ́kɩ́ŋ mɛ́ má púló ɛ́ nɛ́:
Ɛ́ wɩ́ɛ́, ŋ sɩ́ a rɩ́wɔ́ píŋ ná bɩrmɛ hɩ̃́ɩ̃́sɛ.
8 Ŋ nɩɛ wɩ́bɔma nɛ́ ká vʋ́k'ɔ́ɔ́sa ná ɓɩdííle,
kaá yíkíŋ nɩɛ rɩ́wɔ́ tʋŋ wɩ́zɔ́kɛ́ ná ɓa tɩɩ háá tʋmɛ́.
9 Wɩ́ɩ́ ná há sɩ́ péríŋ nɩɛ, ʋ nɛ́ sɩ́ peri vʋ́k'ɔɔsa má;
Ɛ́ nɛ́ tɛ, ŋ sɩ́ a rɩ́wɔ́ díwó wɩ́'állɛ ná wɩɩla,
ŋ sɩ́ bɛ́ŋsɩ́wɔ́ cɛ́rwɔ́ wɩ́zɔ́kɛ́.
10 Ɓa sɩ́ dí ɓɩɛ ká sɩ́ vɔ́ksʋ́,
ɓa sɩ́ cɔrmɛ ká sɩ́ púlú,
bee wɩ́ɛ́, ɓa vɛ́ Nyuutɩna Wɩɩsɛ tá.
Ɩzɩrayɛl nɩɛ cɔrmɛ wɩ́ɛ́
11 Cɔ́rmɛ rɩ́ dɩvɛ́ŋ arɩ́ dɩvɛ́ŋfɛlɛ ɔ́ɔ́ ɓa a nɩbursi.
12 Ŋ nɩɛ́ vʋ́rwɔ́ daa veno ní,
ɓa deŋgulí ní bʋ́l wɩ́ɛ́ aá pɔ́wɔ́,
bee wɩ́ɛ́, cɔrmɛ sabɩɩna nɩ́ɩ́ tɛ́lwɔ́,
ɓa tʋ́ŋ cɔ́rmɛ a kɛ́kɩ́wɔ́ Wɩɩsɛ mɛ́.
13 Pallɛ nyunni ɓóŋɓóŋ ní ɓaá ɔsɛ vʋka,
aá nyɩkɛ áŋsáŋsɛwa dúŋdúóme daha, arɩ́ tuuni ná ɓa há yɩrɛ́
sɛɛnɛ, pepiliye rɩ́ terebɛŋtɛ ná há kéŋ fɩ́ɛ́la wérí mʋ́ʋ́la.
Ɛ́ nɛ́ tɛ, ɩ́ tolé sɩ́ tʋ́tʋ́ŋ nɩlɩɩlɩ́wɩ́ɛ́,
ká rɩ́ɩ́wa biháála maá tʋ́ŋ cɔ́rmɛ.
14 Amá ŋ waá a rɩ́ɩ́wa tolé díwó nɩlɩ́ɩ́lɩwɩ́ɛ́ ná wɩɩla,
ŋ waá a rɩ́ɩ́wa biháála ná díwó cɔ́rmɛ ná wɩɩla,
Bee wɩ́ɛ́, ɓa é, vʋ́k'ɔɔsa tɩɩ nɩ́ɩ́ cɔ́rmɛ́ rɩ́ ɛ́ hácɔ́rma,
ká ɓa rɩ́ Wɩcʋɔlɩjɩɩsɛ hácɔ́rma ná má hé naŋá aá ɔsɛ vʋka.
Nɩɛ ná há wɩ wɩ́zɩmɛ́ kené kiri zɔ́krʋ har nɛ́.
15 Ɩzɩrayɛl, rɩɩ nɛ́ píí tɩɩ hé cɔ́rmɛ mɛ́,
rɩ́ Ziida é pɔ́ʋ́ tɩɩ mɛ́, a sɩ́ ɛ́ tʋ́mʋ́.
Ɩ́ sɩ́ Gilgal mʋ́,
ɩ́ sɩ́ Bɛtavɛŋ mʋ́,
rɩ́ ŋmɩ́ɛ́sɛ́ bʋlɛ́:
«Nyuutɩna Wɩɩsɛ há wómmó yɩr mɛ́!»
16 Bee wɩ́ɛ́, Ɩzɩrayɛl nɩɛ pɩ́ɩ́rɔ́, anɛ nɔmaá há pɩ́ɩ́rɛ́ ɛ́,
mʋ́l né mí, Nyuutɩna Wɩɩsɛ sɩ́ nʋɔlɩ́wɔ́,
anɛ pieŋse, a kaa mʋ́ poljɛlɛ sɩɛrʋ.
17 Ɩfɩrayɩŋ púú tɩɩ hé venni ɓaarɛ́ mɛ́: Ɩ́ lóú ráŋ!
18 Ɓa há dé mɩŋ sɩ́ŋ nyɔ́ɛ́ tenné mí ní
ká ɓa há bɩ́rɛ́ zʋ cɔ́rmɛ;
ká rɩ́wɔ́ dí hɩ̃ɩ̃sɛ a tɩ́ŋwɔ́ vʋka ná wɩ́ɛ́.