Ɓa sɩ́ ko yoo la Zerizalɛmɛ tɔ́ɔ́ (Ezekiyɛl rɩ́ Zerizalɛmɛ yoé wɩ́ɛ́)
4
1 Zesi, nɩbiino bio «Pi warɛ bilí sɩ́ɛ́, a tuuri Zerizalɛmɛ tɔ́ɔ́ cuunó hoú dahá. 2 Ɛ́ har mɛ́, ŋmʋ́ŋsɛ lalyóóre há cɩnɛ́ kílú, rɩ́ yɩla há tɩɛkʋ zeŋ ná mɛ́, rɩ́ butuoni rɩ́ lalyóóre pulli arɩ́ lalyóórícɩ́ksɛ a kíllú wuu. 3 Ka rɩ́ pi hɔjɛlɔ bilí rɩ́ tɔ́ɔ́ ná pɛkɛ́ anɛ́ zeŋ, ká bel tɔ́ɔ́ ná cúrútútú a tɔ́ʋ́ hé: Anɛ́ dɩŋdɔmɔ há ko tɔ́ʋ́ hé ɛ́. Kanɩ́ tɩɩ malla nɛ́ ɛ́, ŋ makɛ aá pá Ɩzɩrayɛl nɩɛ.4 «Pɩnɩ́ nɛgʋɔ samá mɛ́, a la Ɩzɩrayɛl nɩɛ wɩ́bɔma a cɩ́ɩ́nɩ́ tɩɩ. Cɩ́ɩ́nɩ́wɔ́ wɩ́bɔma a kaá ja tapʋlɛ ɛ ɩ há pɩnɩ́ samá ná mɛ́. 5 Ŋ sɩ́ a rɩ́ɩ́ cɩ́ɩ́nɩwɔ́ a peri tapʋ́lɛ ná nʋɔ a perwó wɩ́bɔma ná bɩŋsɛ nʋɔ: Zotoro mɛɛ́sɩbaná rí fí (390). Ɩ sɩ́ cɩ́ɩ́nɛ́ Ɩzɩrayɛl bɛlɛ wɩ́bɔma a peri ɛ nɛ́. 6 Ɛ́ tapʋlɛ nʋɔ nɛ́ cesé, ɩ baá sɩ́ pɩnɩ́ neduu samá mɛ́ a cɩ́ɩ́nɛ́ Ziida bɛlɛ má wɩ́bɔma tapʋlɛ mɛɛ́sɛllɛ. Ŋ sɩ́ a rɩ́ tapʋ́l wuu a bɩná. 7 Ʋ har mɛ́, ɩ sɩ́ bɩrɩ́ sɩ́ɛ́ cáásɛ Zerizalɛmɛ há ká tɔ́ɔ́ ɓa tɔ́ɔ́ hé, a tɛrɩ́ nɛ́wuoli a cáásʋ; ka láŋ nʋɔ wɩ́ɛ́ bʋ́l pá Zerizalɛmɛ nɩɛ. 8 Ŋ sɩ́ a rɩ́wɔ́ vɔwɩ́ rɩ́ ŋmɛ́sɛ, a makɛ rɩ́ɩ́ sɩ wolli bɩrɩ́ neduu rɩ́rɩ́ nɛgʋɔ, a kaá ja tapʋlɛ ná ɩ há tɔ́ʋ́ hé há tenné.
9 Ɩ sɩ́ ja bile, rɩ́ ɔ́rzɛ, rɩ́ siiwie rɩ́ sɩ́ŋsuóŋ rɩ́ mɩpʋmma arɩ́ ɓɩdiili ná ɓa yɩrɛ́ épótirɛ, a píwó wuu hé naŋá mɛ́ gbaŋa sɩɛrʋ a ŋmʋ́sɩ́wɔ́, a pii wasɛ dɩ́pɛ́ŋwa. Rɩ́wɔ́ nɛ́ ɛɩ́ ɓɩdiile tapʋ́la zotoro mɛɛ́sɩbaná rí fi ná wuu ɩ há pɩnɩ́ sama mɛ́. 10 Ɓa nɛ́ sɩ ɛɩ́ ɓɩdiile: kal wuu ɓɩdííli kaŋ mʋɔsɔ́ nɛ́ ka gɩramɛwa zɔwɛllɛ rí mɛɛ́rɛ (220). Ɛ nɛ́ mɔhɛ̃́ rɩ́ɩ́ dídí tapʋl wuu. 11 Ɩ nyínyɔ́lɛ sɩ́ a óŋmaksɛ: kal wuu litiri balá; ɛ nɛ́ rɩ́ɩ́ nyínyɔ́ ɛ tɛ́ŋ wuu mí. 12 Ɩ sɩ́ pi ɔ́rzɛ mɩŋ duŋsi a wasɛ nɩbiino bɩna dahá anɛ́ mɩŋdúŋsi wási (ŋmɔmu). Ɩ mɔhɔ̃́ rɩ́ wasʋ́ nɩɛ wuu sɩ́ɛ́ mɛ́ nɛ́, a dí.» 13 Nyuutɩna Wɩɩsɛ sɛ́: «Nyɛ́ nɛ́ rɩ́ Ɩzɩrayɛl bɛlɛ dídí busunnu ɓɩdiile, duowa ná sɩɛrʋ ŋ há sɩ́ kírwó hé.» 14 Ɛ nɛ́ ŋ sɛ́! «Ɓoo, Nyuutɩna Wɩɩsɛ, ŋ há wɩ busunnu zʋɛ́ ná! A pɔ́ŋ heŋbiiri wuu mí a ko aá lɛ́ zaa, ŋ há wɩ omo há sʋ́wʋ́ tɩɩ mɛ́, ɛ́ rá má dííre naŋdíkɩɛsʋ́ dié. Busunnu namɩɛ há wɩŋ nʋɔ zʋɛ́ ná.» 15 «Ɛ nɛ́ ʋ bʋlɩ́ŋ rɩ́ bʋlɛ́: «Ɛ wɩ́ɛ́, ŋ sɩ pi nɔbɩna pɛɩ́ rɩ́ɩ́ wasɩ́ ɓɩdiili ná ɓa dahá ka ta nɩbiinɔ bɩná ná.» 16 Ʋ bʋlɩ́ŋ rɩ́ bʋlɛ́: «Nɩbiino bio, ŋ sɩ́ zɔkɛ Zerizalɛmɛ tɔ́ɔ́ sɩɛrʋ vʋ́ʋ́ra wuu. Ɓa sɩ́ kersíwó ɓɩdííle aá dí sazɔkɔ sɩɛrʋ, a maksɩ́wɔ́ nyii aá nyɔ́ hewíŋ sɩɛrʋ. 17 Bee wɩ́ɛ́ ɓɩdiile rɩ́ nyii sɩ murí, rɩ́ nɩɛ ná wɩɩla a sʋsɛ sʋɔrɛ; a tɩŋwɔ́ wɩ́bɔma wɩ́ɛ́.»