Wɩ́ɩ́ balá nɩ́ɩ́ dɛllɛ nɩɛ wuu
9
1 Ŋ kɩɛ́lɛ wɩ́ɛ́ nyáŋ aá ja rɩ́ŋ zɩŋwɔ́ mʋ́ʋ́la: Ŋ noú rɩ́ nɩtáŋnnɛ arɩ́ wɩ́zɩnna wɩ́állɛ ná wuu mɩŋ Wɩɩsɛ nɛ́sɛ mɩ́ nɛ́. Ká nɩbiino sɩɛrʋ wɩ́cólle arɩ́rʋ́ sahɔɔ wɩ́ɛ́ ná wuu, ká ɓɩlɩ́ɩ́ Wɩɩsɛ sɩ́ɛ́ mɛ́. 2 Ɓa wuu ká oŋ balá: Wɩ́ɩ́ ná há sɩ́ perí nɩtaŋá, nɛ́ sɩ́ perí nɩbɔma má. Ɛ wɩ́ɩ́ balá nɛ́ há sɩ́ pérí nɩweré, arɩ́ busunnu nɩɛ, a perí nɩɛ ná há ɔsɛ vʋka, arɩ́ nɩɛ ná má há wɩ vʋka ɔsɛ. Cakʋ́ toó nɩwero rɩ́ nɩbɔmɔ pɛkɛ́, nɛrɔ ná há tá nʋɔ Wɩɩsɛ sɩ́ɛ́, arɩ́ nɛrɔ ná há wɩ nʋɔ tɛɛ́ pɛkɛ́; ɛ wɩ́ɩ́ balá nɛ́ sɩ́ perwó wuu. 3 Ɛ wɩ́ɩ́ ká wɩ́tɔ́k rɛ́ dúníé né mɩ́, ʋ balá ná nɛ́ sɩɛ́ wálmɛ́ nɩɛ wuu.Ʋ ɔɔ nɩɛ sabɩŋsɛ bɩrsɛ hé bɔŋbɔŋ mɛ́, ɓa hiẽŋso wuu mɩ́ ɓa dé cʋʋlɛ tʋtʋmɛ́ mɛ́ aá tʋ́ŋ a kaá ja lɛlɛ tɔ́ɔ́ mʋɩ́. 4 Ɛ wɩ́ɛ́, nɩ́wommé dʋŋɔ́ nɛ́ há wó yɩɛla aa ka. Ka váwómmi cɩ́có kɩ́ŋkáná ɓɩsʋwɛ mɛ́. 5 Bee wɩ́ɛ́, nɩ́wommé ɩ̃wɔ́ sʋʋ nʋɔ mɛ́, amá nɩ́sʋsɛ é baá wɩ wɩ́ɩ́ wuu ɛ̃, ɓa báá wɩ yɩɛla wuu kene aá dɛllɛ, bee wɩ́ɛ́ nɩɛ sʋ́llɩ́wɔ́ wɩ́ɛ́. 6 Cólle, rɩ́ susúfɔɔ́ ná ɓa fa há kene, arɩ́wɔ́ sahɔɔ, rɩ́wɔ́ banɔnnɛ ná ɓa fa há kené; ɓa wuu daarɔ. Tíé nyúú rɛ́ ɓa báá wɩ ker wuu kené nɩɛ sɩɛrʋ.
Hiẽso ka Wɩɩsɛ zílé ní
7 Mʋ́, a dí ɓɩdiile rɩ́ sɩɛrʋ tɔ́rɛ, ká nyɔ dɩvɛ́ŋ má rɩ́ tɛ́ŋ pɔ́rɛ́. Bee wɩ́ɛ́, Wɩɩsɛ ɔsɩ́ wɩ́ɛ́ pɛɩ́. 8 Pɔ́, tɛ́ŋ wuu mɩ́ rɩ́ gɛnnɛ sɩ́ busunnu kanʋ́, ká rɩ́ nʋʋ má sɩ́ nyúú mɩ́ caasʋ́. 9 Ɩ haŋpɔháálɔ ná ɩ há jɛɛ, ló rɩ́ sɩɛrʋ tɔ́rʋ́ nyúú, ɩ tʋmɩ́ tɛ́ŋpɔ́ɔ́wɩɛ rɩ́rʋ́ ɩ dúníé nyuu tapʋ́lɛ ná Wɩɩsɛ há pɛɩ́ mɛ́. Bee wɩ́ɛ́, ɩ dúníé nyúú hiẽso wahála ná né tume nɛ́ ɛ́. 10 Ɩ hiéso mɩ́, wɩ́ɩ́ ná wuu ɩ há wólle aá tʋ́ŋ arɩrɩ́ doé, tʋmʋ́ rɩ́rɩ́ sɩɛrʋ. Bee wɩ́ɛ́, lɛlɛ tɔ́ɔ́ mɛ́ tʋtʋmɩ́ baá wɩ ráŋ wuó tʋ́ŋ, fá ɩɔ̃́ má tó ráŋ, zɩmɛ́ arɩ́ wɩ́zɩmɛ́ má wɩ nyʋ́ɔ́rɛ kené ráŋ.
Nabɔmɔ ko aá wurí ní
11 Dúníé né mɩ́, ŋ kɩɛ́lɔ ná: Nɩɛ ná há sɛ́ ɓa wó fɛɛ, rá wɩ kiré púpú,
bɩbárá rá wɩ lal yoó dí,
zɩmɛ́ tɩ́nawa rá wɩ ɓɩdiile kené,
wɩ́zɩnna má rá wɩ ɓɩɛ kené,
ka, yɩrɛ (pɩ́ŋ) tó nɩɛ ná há sɩ́ wʋɔ́ nɛ́ ɛ̃ wɩ́ɛ́ wuu ker ní. Bee wɩ́ɛ́ ɓa wuu keŋwó tɛ́ŋ, a kaŋwɔ́ nyúbɔŋ má. 12 Nɩbiine wɩ cié ɛ̃, a nɛ́ ɛ ná naŋwʋllɛ há wɩ ɛ̃ kaá ɓallɛ filewa mɛ́ ɛ́;
a nɛ́ diíwiisi há ɓallɛ filewa mɛ́ ɛ́,
nɩbiine má wɩɩla tɛ́ŋ mɛ́, ɓa wʋ́ mɛ́ ɩ̃ kʋ́ɔ́ ko ɓallɩ́wɔ́ nyúú.
Nɩyaarɔ zɩmɛ́ wɩ́ɛ́
13 Ŋ baá ná zɩmɛ́ wɩ́ɩ́ nɔ́ŋɔ dúníé né mɩ́, ʋ caasɛ koríŋ paa. 14 Ʋ nɛ́ ká: Tɔ́ɔ́ oro rɩ́ mɩnɛ́ ʋ nɩɛ wɩ kaŋ. Kuóro oro má há keŋ doé kɩŋkaŋ isi hoú lalyóóre ná naŋá mɛ́; ɓa ko ja dɩzʋɛ́ rɩ́wɔ́ tɩ́ŋ róŋ mɩ́ a zʋ yó tɔ́ɔ́ ná. 15 Amá, ɛ tɔ́ɔ́ sɩɛrʋ nɩyaarɔ há keŋ zɩmɛ́ má fa mɩŋ róŋ a wó tɔ́ɔ́ ná la aá ta a tɩ́ŋʋ́ zɩmɛ́ ná mɛ́. Amá nyúbɔŋ, nɛ́ŋ oro wuu wɩ ɛ yaarɩ́tɩɩnɔ há keŋ zɩmɛ́ wɩ́ɛ́ bɔsɛ. 16 Ɛ nɛ́ ŋ sɛ́: Zɩmɛ́ cɩ́có hɩɛ̃sɛ mɛ́. Amá nabɔŋ wɩ́ɩ́ nɛ́ ká; nɩɛ há wɩ nɩyaarɔ zɩmɛ́ kené tʋtʋŋ, a wʋ́ʋ́ nʋɔ wɩ́bʋlɛ má zesí. 17 Rɩ́ lʋ́ɔrɛ zesi zɩmɛ́ tɩ́na wɩ́bʋlɛ, ɓa keŋ nyʋ́ɔ́rɛ a kɩllɛ nɛrɔ ná má há sʋʋ́ nɛ́ keŋ zɩmɛ́ nɩcʋllɛ sɩɛrʋ aá kɔ kʋ́ɔ́lɛ́. 18 Zɩmɛ́ pɛ lalyoóro mɩ́ a kɩ́llɛ lalyoorícɩ́ksɛ.Nɩ́tɔ́k balá nɩ́ɩ́ zɔkɛ oŋkana.