Davidi kenú tɩɩ mʋ́ féŋsi Filisiti nɩɛ sɩɛrʋ
27
1 Davidi bɩ́ɩ́nʋ́ tɩɩ mɛ́ ká bʋlɛ́: «Kal nɔ́ŋɔ, Sayul sɩ́ ɓʋ́ŋ. Lúrí tóó áá láŋ rɩŋ nɛ́ wɩ fɛ́ɩ́ mʋ́ Filisiti nɩɛ tɔ́ɔ́. Ɛ́ é Sayul báá wáá kírí tɩŋɩ́ŋ mɛ́ Ɩzɩrayɛl dɩtɩ́llɛ wuu; ɛ́ wɩ́ɛ́ ŋ sɩ́ lú a lʋ́ʋ́ nɛ́sɛ mɛ́. 2 Ɛ́ nɛ́ Davidi isi, ʋ rɩ́rʋ́ nɩɛ zɔwalgo a mʋ́ Mahɔkɛ bio Akisi há ká Gatɛ tɩ́náwa kuóro rɩ́. 3 Ɓa wuu mʋ́ɔ́ mɩŋ Akisi dɩhɩ̃́ Gatɛ mɛ́, nɛrɔ wuu rɩ́rʋ́ jaa nɩɛ, arɩ́ Davidi rɩ́rʋ́ háála bɛllɛ, Ahinɔmɛ há lɛ́ Zɩzɩrayɛl, arɩ́ yúháálɔ Abigayi há lɛ́ Karmɛl, Nabal yúháálɔ. 4 Ɓa ko bʋl pá kuóro Sayul rɩ Davidi fɔ́ʋ́ mʋ́ Gatɛ, ɛ́ nɛ́ ʋ báá wʋ́ʋ́ jɛ́ɩ́.5 Kal oro, Davidi bʋ́l Akisi rɩ́ bʋlɛ́: «Kuóro rɩ nɛ́ néé rɩɩ cóŋ wɩɛ, rɩ́ɩ́ páŋ ŋmɛ́nɔ rɩ́ŋ ké tɔ́wíísi nyáŋ náŋɔ mɛ́. Béé rí tɛ ŋ mɔ rɩ́ŋ kéní dɩhɩ̃́ kuótɔ́ɔ́ mɛ́>>. 6 Ɛ́ kal tɩɩ, Akisi pí Sɩkɩlagɛ tɔ́ɔ́ pɔ́ʋ́. Ɛ́ nɛ́ tɛ a kaa ko áá lɛ zaa, Ziida kuóre nɛ́ tɩ́llɛ Sikilagɛ.
7 Davidi ké Filisiti nɩɛ tɔ́ɔ́ mɛ́ biná sɩ́ɩ́ arɩ́ caŋsɛ baná. 8 Davidi rɩ́rʋ́ nɩɛ ké Sɩkɩlagɛ mɛ́ káá yo Gesuritiwa, rɩ́ Girizitiwa arɩ́ Amalɛsitiwa, bee wɩ́ɛ́ ɓa nɛ́ fa ká dʋ́ŋdʋ̃́ʋ̃́ nɩɛ a ké Suri dɩtɩ́llɛ a kaa mʋ́ lɛ Ezipiti tɔ́ɔ́. 9 Davidi yó ɛ́ tɔ́ɔ́ ná nɩɛ, a ɓʋ́ báála rɩ́ háála, ká lɔ́wɔ́ pieŋse arɩ́ nɛsɛ, kokúsi arɩ́ nyʋ́kmawa, a rɩ́wɔ́ gɛnnɛ, a kaa bɩrɛ ko Akisi dɩhɩ̃́. 10 Akiisi há bɔ́sɛ́ Davidi: «Ɩ́ zaa yó nɛ́ɛ́wa rɛ́>> » Ɛ́ nɛ́ Davidi sɛ́: «Ziida dɩtɩ́llɛ Nɩgɛɛvɛ rɩ́, Yeramelitiwa dɩtɩ́llɛ Nɩgɛɛvɛ rɩ́, arɩ́ Kenitiwa dɩtɩ́llɛ Nigɛɛvɛ. 11 Davidi ɓʋ́ báála rɩ́ háála a makɛ rɩ́wɔ́ sɩ́ Gatɛ mʋ́ rɩ́ bʋl wɩ́ɛ́ ná há wɩ cɛ́rɛ́ a rɩ́rʋ́, rɩ́ bʋlɛ́: «Ná Davidi há ɔ́ɔ́ ná.» Ʋ há ké Filisiti nɩɛ tɔ́ɔ́ ná mɛ́, ʋ́ʋ́ a ɛ́ nɛ́ tɛ́ŋ wuu mí. 12 Ɛ́ nɛ́ Akisi la Davidi dí a bʋlɛ́: «Davidi ɔ́ɔ́ ʋ tɔ́ɔ́ Ɩzɩrayɛl nɩɛ sɩɛrʋ lʋ́ʋ́. Ɛ́ wɩ́ɛ́, ʋ sɩ́ áŋ tʋtʋnnʋ́ a káá mʋ́ wuu.»