2 SAN JUAN
San Juanpa K'art'a T'êepema P'ãda
Tachi Ak'õrepa wãarata jara pëidade jara bùk'a<R>p'anapataadaipia bù
1
1 Mù, Juan, Cristode ijãapataarã ak'ùpari waibùa. Mùa na k'art'a p'ãru parã ijãapataarãmaa, Tachi Ak'õrepa parã jùrùt'erada perã Cristode ijãapataadamerã. Wãara mùa parã k'inia iru bù. Mùa aupaita parã mãgá k'inia iru bù–e. Jõma Tachi Ak'õrepa wãarata jara pëida k'awa p'anùùrãpa parã auk'a k'inia iru p'anù. 2 Mùa parã mãgá k'inia iru bù ma wãarata âraweda tachi t'ãride bapari perã mãik'aapa ichita bait'ee perã tachi ome. 3 Wãara Tachi Ak'õre mãik'aapa iru Warra Jesucristo t'ãri pia p'anapata tachi ome. Mapa ãrapa tachi pia ak'ù p'anadait'ee. Ma awara tachi chupùria k'awaadait'ee mãik'aapa k'ãiwee p'anapidait'ee. Mãgá wãara p'anadai Tachi Ak'õrepa k'inia bùk'a mãik'aapa chik'inia p'anapataadai iru ome.4 Mù o–îa beeji k'awaak'ãri parãdepemaarã ûk'uru p'anapata Tachi Ak'õrepa wãarata jara pëidade jara bùk'a. 5 Ârá, âpemaarã Cristo k'aurepa, mùa parãmaa enenee nâbù tachi chik'inia p'anapataadamerã. Mùa mãga jarak'ãri, jara–e bù ne–inaa parãpa waide k'awada–e p'anù. Tachia naa Cristode ijãadak'ãriipa ma jarada ûridooda. 6 Nãgá tachia ak'ùpidai Tachi Ak'õre mãik'aapa awaraarã k'inia iru p'anù: oodak'ãri Tachi Ak'õrepa jara bùk'a. Iruata jara bù tachi chik'inia p'anapataadamerã. Parãpa mãga ûrijida naaweda Cristode ijãadak'ãri.
K'îrak'aupai seewa jarateepataarã t'îupidai parã t'ãide
7 Ma Tachi Ak'õrepa jarada mùa parãmaa k'irãpapi k'inia bù, na p'ek'au eujãde seewa–idaa beerã chok'ara paraa perã. Mãgùùrãpa ijãadak'aa Jesucristo na p'ek'au eujãde ba cheji eperã jîp'aak'a. Jaradak'aa Jesucristo Tachi Ak'õre Warra. Mãgá tachia k'awa p'anù ãchia seewa jaratee nipapata. Ãchi Anticristo jîak'aarã. 8 K'îrak'aupai ijãadai ãchia jara p'anù. Mãga ijãaruta pùrã, jõpidait'ee jõma parãpa oomaa p'anù Tachi Ak'õre–it'ee. Mùa k'inia bù parãpa atadamerã jõma Tachi Ak'õrepa k'îsia iru bù teeit'ee ichideerãmaa ùt'ari, oopatap'edaa perã irua oopi bùk'a.
9 Eperãpa jararu pùrã Cristopa jarateedak'a oo–e pait'ee, ichia ma jarateeda k'ãyaara Tachi Ak'õre net'aa waapùara k'awa bairã, mãgà eperãpa wãara Tachi Ak'õre k'awa–e bù. Jõdee chi Cristopa jarateedak'a oo bùpa wãara ijãapari Tachi Ak'õre Warrade mãik'aapa Tachi Ak'õre k'awa bapari. 10 Maperã mãgee Cristopa jarateedak'a ooda–e p'anùùrãdepema aba parã t'ãide cheru pùrã, iru auteebaidaik'araa bù. Mãgee jarateepataarã parãmaa chepidaik'araa bù. 11 Parãdepema abaapa mãgee eperã auteebairu pùrã, k'aripait'ee irua waapùara k'achia oomerã ijãapataarãmaa, irua seewa jaratee bù k'aurepa.
12 Mùa parãmaa waa jara k'inia bù, mamîda k'art'a p'ãdade mãga oo k'inia–e. Parã ak'ùde wã k'inia bù, k'îrapite pedeedait'ee. Mãgá tachi o–îa p'anadait'ee.
13 Parã âpemaarã Cristo k'aurepa, chi nãpema Tachi Ak'õrepa jùrùt'eradaarã Cristode ijãadamerã, parãmaa ichiaba salude tee pëiruta.
Mãgapai paji.