Jawaab al-Rasuul Buulus le Filimuun
1
Jawaab minni ana Buulus al-masjuun fi chaan al-Masiih Isa wa min akhuuna Timuutaawus.
Wa naktib leek inta,
ya habiibna wa rafiigna fi l-khidme Filimuun
2 wa jamaaʼat al-muʼminiin al-yilimmu fi beetak wa akhutna Abfiyya wa akhuuna Arkhibba al-misilna yitaabiʼ kalaam Rabbina misil askari yitaabiʼ kabiirah.
3 Al-salaam wa l-rahma aleekum min Allah Abuuna wa Rabbina Isa al-Masiih.
4 Ya Filimuun,
ayyi wakit al-nisalli,
nifakkir foogak wa nachkur Allah Rabbi
5 achaan simiʼt khabar iimaanak be Rabbina Isa wa be mahabbitak le kulla l-saalihiin.
6 Wa nasʼal leek Allah kadar be l-alaakha al-indak maʼa akhwaanak al-muʼminiin talga irfe be ziyaada fi kulla l-kheer al-indina fi l-Masiih.
7 Wa be l-sahiih ya akhuui,
khabar hana mahabbitak antaani farha kabiire wa chajaaʼa chadiide achaan al-cheyy al-inta sawweetah farrahaahum le l-saalihiin.
8 Wa achaan da,
nidoor natlub minnak cheyy waahid.
Indi hagg fi l-Masiih le naamurak tawwaali achaan tisawwi al-cheyy al-nidoorah.
9 Wa laakin aniina nirraayado wa achaan da,
yabga leyi akheer kan nigaddim leek talab wa inta tafhamni.
Wa ana al-nihajji leek ana Buulus safiir al-Masiih al-haaliiyan masjuun fi chaanah.
10 Wa nigaddim leek talab fi chaan wileedi Alfaayid* al-ana bigiit leyah abuuh wakit ana gaaʼid fi l-sijin.
11 Awwal hu ma indah leek faayde laakin be l-sahiih hassaʼ hu bigi naadum indah faayde katiire bilheen.
Hu indah faayde leek inta wa leyi ana kula.
12 Wa ana gaaʼid nigabbilah leek maʼa l-jawaab da wa da gaasi leyi achaan nagram leyah bilheen.
13 Be l-sahiih,
dawwart hu yagood hini maʼaayi.
Ana gaaʼid fi l-sijin fi chaan bichaarat al-Masiih wa naʼarif kadar inta tidoor tisaaʼidni.
Wa kan Alfaayid yagood maʼaayi,
hu yagdar yisaaʼidni fi badalak inta.
14 Laakin ma dawwart nisawwi ayyi cheyy al-bukhussah illa kan inta khassadt beyah.
Wa misil da,
tisawwi al-kheer ma achaan ana asartak leyah laakin achaan inta chilt niiye leyah be nafsak.
15 Akuun fi chaan da bas,
Allah farragah minnak wakit chiyya achaan hassaʼ yigabbil leek wa yagood maʼaak daayman.
16 Wa ma yabga battaan abdak bas laakin yabga akheer min abdak.
Hu bigi akhuuk al-mahbuub.
Akiid ana nihibbah laakin inta waajib tihibbah be ziyaada achaan hu abdak al-khaali wa be Rabbina al-Masiih hu bigi akhuuk.
17 Zeen.
Naʼarif kadar inta tajʼalni ana muchaarikak fi l-iimaan.
Wa natlub minnak takrub Alfaayid gawi misil tidoor takrubni ana gawi.
18 Kan hu sawwa leek cheyy fasil walla indah deen fi raasah kula,
kallifni beyah ana.
19 Ana Buulus karabt al-galam wa naktib al-kalaam da be iidi «
Ana bas nikaffiik ».
Wa inta ligiit al-haya al-jadiide be kalaami ana bas wa laakin ma nidoor nihajji leek be l-cheyy al-waajib tisawwiih leyi.
20 Aywa ya akhuui,
aniina akhwaan be l-Masiih wa nidoor minnak faayde chiyya.
Antiini farah fi l-Masiih be ziyaada.
21 Ana muʼakkid kadar titaabiʼ kalaami.
Ana gaaʼid naktib leek wa fi galbi naʼarif inta tisawwi ziyaada min al-gultah leek kula.
22 Wa maʼa l-kalaam da,
nuguul leek jahhiz leyi bakaan fi beetak achaan naji nagood maʼaak.
Narja Allah yasmaʼ duʼaaku fi chaani wa yatluguuni gariib.
23 Akhuuna Abfuraas al-gaaʼid maʼaayi fi l-sijin fi chaan al-Masiih Isa,
hu yisallimak.
24 Wa maʼaayah al-akhwaan al-yakhdumu maʼaayi Markhus wa Aristaarkus wa Diimaas wa Luukha.
25 Aleekum niʼmat al-Rabb Isa al-Masiih.