Dahab fi maaʼuun hana tiine
4
Wa khalaas Allah bas rahamna be l-khidme di wa achaan da,
abadan ma naksalo minha.
2 Wa aniina abeena ma taabaʼna al-haal al-tijiib al-eeb wa la l-zunuub al-yisawwuuhum al-naas be achiir.
Naabo ma nisawwu cheyy be najaada wa abadan ma nibaddulu kalaam Allah.
La.
Laakin nikallumu al-hagg be kalaam waadih wa nikhallu galib hana ayyi naadum yachhad le haalna al-adiile giddaam Allah.
3 Wa kan al-bichaara al-niballukhuuha ma tinfahim,
hi ma tinfahim illa le l-muwaddiriin.
4 Al-naas al-ma muʼminiin dool guluubhum masduudiin achaan Ibliis* amaahum.
Hu yidoor yadharhum ma yichiifu al-nuur al-majiid hana l-Masiih al-niballukhu beyah fi l-bichaara.
Al-Masiih hu suurat Allah.
5 Wa l-kalaam al-niballukhuuh ma bukhuss nufuusna.
Niballukhu be Isa al-Masiih wa nuguulu hu bas al-Rabb.
Wa aniina khaddaamiin bas wa nakhdumu leeku fi chaanah.
6 Achaan Allah bas al-gaal <Khalli al-nuur yidaawi fi ust al-dalaam>
wa hu nawwar guluubna achaan naʼarfu nuur Allah al-majiid al-gaaʼid fi wijih Isa al-Masiih.
7 Wa l-baraka al-indina di misil dahab saafi al-gaaʼid fi maaʼuun hana tiine.
Wa da yiwassif kadar al-gudra al-ajiibe al-nakhdumu beeha min Allah bas wa ma minnina aniina.
8 Aniina yidaayuguuna fi ayyi bakaan laakin ma yiwaggufuuna.
Wa aniina mulhayyiriin laakin ma waddarna al-acham.
9 Wa l-naas yitaʼʼubuuna laakin Allah ma yikhalliina.
Yarmuuna laakin ma yidammuruuna.
10 Al-Masiih tiʼib wa maat.
Wa fi ayyi bakaan aniina kula natʼabo mislah achaan hayaat Isa tinchaaf fi jisimna.
11 Aniina hayyiin wa laakin daayman yisallumuuna le l-moot fi chaan khidmitna le Isa.
Wa da yabga leena achaan hayaat Isa tinchaaf fi jisimna al-yumuut.
12 Wa khalaas,
aniina niʼiichu fi ust al-moot achaan intu talgo al-haya al-abadiiye.
13 Maktuub fi l-Kitaab <Ana aamant wa achaan da kallamt>.
Wa aniina kula indina iimaan misil al-iimaan da.
Aniina muʼminiin wa achaan da nikallumu.
14 Wa naʼarfu kadar Allah al-baʼas Rabbina Isa min ust al-maytiin yabʼasna aniina kula maʼa Isa wa yiwaddiina maʼaaku fi hadaratah.
15 Wa kulla khidmitna di le faayditku.
Wa nakhdumu achaan barakat Allah talhag kulla l-naas wa humman yachkuru Allah ziyaada wa khalaas kulluhum yimajjudu Allah.
16 Achaan da abadan ma naksalo.
Sahiih,
jisimna gaaʼid yumuut wa laakin al-haya al-jadiide gaaʼide tiziid fi guluubna kulli yoom.
17 Wa l-taʼab al-indina hassaʼ da,
hu khafiif wa ma yitawwil.
Laakin al-taʼab da yijahhizna le l-majd al-aziim al-abadan ma yikammil.
18 Wa ma nukhuttu baalna fi l-binchaaf.
Nukhuttu baalna fi l-ma binchaaf.
Achaan al-binchaaf yikammil wa laakin al-ma binchaaf ma yikammil abadan.